Mukanda ya Nto-Kimvuka

Bampangi na Beto Bambangi ya Yehowa:

Bampangi ya luzolo, beto kele na kyese ya kusonikila beno mukanda yai! Beto kele ti mawi ya mutindu mosi ti ntumwa Yoane, yina kutubaka nde yandi ‘vandaka kuzola mingi’ bampangi na yandi Bakristu mpi kusepelaka sambu bo vandaka kulanda kaka “mambu ya kieleka na luzingu na bo.” (2 Yoa. 1, 4) Kyeleka kele mpenza lusakumunu sambu na beto yonso! Yo mekatulaka beto na kimpika ya Babilone ya Nene mpi ya malongi ti binkulu na yo yina kepesaka ve Nzambi lukumu. Kulemfuka na kyeleka mesadisaka beto na kukuma bantu yina kele na zola, ntima ya mbote, mpi ya kewilaka bankaka mawa. Mpi kyeleka mekangudilaka beto nzila ya kuvanda bunkete na meso ya Nzambi mpi yo mepesaka beto kivuvu ya luzingu ya mvula ya mvula.

Beto kele mpi na kyese sambu na mpeve ya Yehowa yina ketwadisaka mpi kepesaka beto ngolo konso kilumbu! Beto ketula ntima nde beno sepelaka na kutadila bitini ya kuswaswana ya ngidika yai ya zola ya mekatuka na Yehowa na Balukutakanu na beto ya Distrike “Mpeve ya Nzambi Ketwadisaka Beto” ya beto mesala ntama mingi ve. Mutindu makambu ya nsi-ntoto kelanda na kubeba, yo kele mfunu nde beto tula ntima na ngolo ya mpeve santu ya Yehowa sambu yo twadisa beto na bilumbu ya mbi yina kele na ntwala.

Beto kendima nde beno waka kyese na ntima na beno ntangu beno tangaka na Annuaire masolo ya kitoko ya bampangi yina kukangaka ntima na bampasi mingi sambu na lukwikilu na bo. Mpi yo kepesa mpenza kyese na kuyindula nde mingi na kati ya bampangi yai ya kwikama kubakaka mbotika ntama mingi ve ntangu bo kutanaka ti bampasi yango to bankaka kuvandaka mebaka ntete ve mbotika. Beto kezola bo mingi mpenza sambu na kwikama na bo mpi sambu bo nwaninaka lunungu! Ya kyeleka, mbandu na bo ya mbote kekumisa ngolo lukanu na beto ya kulanda na kuvanda ya kwikama na Kimfumu ata beto kutana ti bampasi ya nki mutindu.​—⁠1 Tes. 1:​6-8.

Bampangi ya luzolo ya babakala mpi ya bankento, beto mezaba nde kele ti mambu mingi ya metala mbongo mpi mambu yankaka yina beno fwete nwana ti yo sambu na kulanda kuvanda na bangwisana ya bumosi mpi ya zola na mabuta na beno. Sambu na bankaka na kati na beno, yo kele mpasi nkutu sambu na kupesa maboko mbala na mbala mpi na kwikama yonso na kisalu ya kusamuna Kimfumu mpi na bisalu yankaka ya mfunu ya dibundu. Kikuma yo yina, na nima ya masolo mpi ya bisambu mingi, beto salaka mwa bansoba na balukutakanu ya dibundu yantika na Yanuari 1, 2009. Beto ketula ntima nde beno tasadila mpenza mbote bangidika yai na mpila nde beno lutisa ntangu mingi na kulonguka na beno mosi mpi ya dibuta.

Na balukutakanu mingi ya nene mpi ya distrike ya mvula yai, beto vandaka na kyese mingi na kumona bantu mingi ya kulungisaka mambu ya bo kelombaka sambu na kubaka mbotika. Bankaka na kati na bo kuvandaka baleke mpenza. Bibuti, beto kesikisa beno na mutindu beno mesansaka bana na beno na kuzola kyeleka mpi na mutindu beno syamisaka bo na kudipesa na Yehowa ntangu bo kele baleke. Mutindu baleke yai kukutanaka ti bampasi mingi na nzo-nkanda kansi bo lungisaka mambu ya bo kelombaka sambu na kubaka mbotika kemonisa nde bo bakaka formasio ya mbote na nzo.​—⁠Nk. 128:​1-6.

Beto kevila ve kuyela ya nene na kisalu ya kulonguka Biblia ti bantu, yina kusalamaka mingimingi sambu na kisalu ya kikesa yina bamisionere mpi bapasudi-nzila ya nene kusalaka. Nto-Kimvuka kesepelaka mingi na bikesa ya nene yina bampangi na beno ya babakala mpi ya bankento ya ntoto ya mvimba kesala na kuzabisa bantu ya ntima ya masonga nde “Kwisa!”, mpi na kubinga bantu yonso yina kele na nzala ya masa na ‘kubaka masa ya moyo ya mpamba.’ (Kus. 22:17) Beto kezodila kukwisa ya mbote na dibuta na beto ya ntoto ya mvimba na bantu 289678 yina kumonisaka kudipesa na bo na kubakaka mbotika ya masa na mvula yai ya meluta.

Beto tayibukaka mbala na mbala bangogo yai ya ntumwa Yoane, yina kusonikaka nde: “Nsi-ntoto kele na kuluta ti mpusa na yo mpi, kansi muntu yina kesalaka luzolo ya Nzambi kezingaka kimakulu.” (1 Yoa. 2:​17, NW) Beto kezinga mpenza penepene ya ntangu yina nsi-ntoto yai ‘taluta’! Yo kele mayele na kutula na kisika ya ntete na luzingu na beto kusala luzolo ya Nzambi mpi ‘kukangula meso.’ (Mat. 24:42) Kana beto sala mutindu yina beto tabokuta ve ata fyoti mpi beto tabaka mambote ya ntima ya mbote ya Yehowa.​—⁠Yez. 63:⁠7.

Beto kebanza nde masolo ya mbote ya mekatuka na bansi mingi yina kele na Annuaire ya mvula yai tapesa beno yonso kikesa ya kutula mambote ya Kimfumu na kisika ya ntete na luzingu na beno. Beto kezola kundimisa beno nde beto keyindulaka beno ntangu yonso na mabanza ti na bisambu na beto mpi nde beto kezolaka beno mingi mpenza. Bika Yehowa kupesa beno balusakumunu na yandi ya mingi.

Bampangi na beno,

Nto-Kimvuka ya Bambangi ya Yehowa