“Kwisa Kulanda Mono”
1. Na bangonda yina kekwisa, Kulonguka ya Biblia ya Dibundu tapesa beto inki dibaku?
1 Masolo ya luzingu ya Yezu na ntoto ya kele na Ba evanzile iya ketubilaka mambu mingi ya metala Mwana ya Nzambi. Sambu Bakristu fwete landa mbote-mbote “mbandu” na yandi, beto fwete kudibongisa mbote mpi kutula dikebi ya ngolo ntangu beto tatadila mukanda “Kwisa Kulanda Mono” na Kulonguka ya Biblia ya Dibundu yina tayantika na mposo ya Marsi 1 na bandinga yankaka. (1 Pie. 2:21; Mar. 10:21) Beto fwete tula dikebi ya mingi na mambu ya luzingu ya Yezu yina lenda pesa beto kikesa na kisalu ya kusamuna.
2. Inki mutindu mbandu ya kukanga ntima ya Yezu lenda natila beto mambote?
2 Mbandu Yina Yezu Kupesaka: Keti bo mezengilaka nge dezia ndinga na ntangu nge vandaka kusamuna nzo na nzo? Kana beto mekutana ti mambu ya mutindu yina, beto lenda bakisa ntendula ya bangogo yai ya Yezu: “Kana bo vandaka kumonisa mono mpasi, bo ta monisaka beno mpasi mpi.” (Yoa. 15:20) Ya kyeleka, konso ntangu ya bantu kebuyaka kuwa beto yo kevandaka ve mbangika. Ata mpidina, kyese yina kuvandaka na ntwala na yandi kele kima yina kusadisaka Yezu na kukanga ntima na mimekamu mpi na bampasi ya mitindu yonso. Beto mpi lenda sala ngolo sambu Yehowa kundima beto mpi kufuta beto sambu na kwikama na beto. Yo tasadisa beto sambu beto ‘lemba ve, kansi beto tula kikesa.’ (Baeb. 12:2, 3; Bing. 27:11) Ntangu beto kekwamina na kisalu ya kusamuna, beto lenda tula mpi ntima nde Yezu Kristu tasadisa beto.—Mat. 28:20.
3. Inki mutindu beto lenda tadila kisalu ya kusamuna mutindu Yezu vandaka kutadila yo?
3 “Sambu Yina Kele Kisina ya Mambu ya Nzambi Tindilaka Mono”: Kisalu ya kusamuna Kimfumu kuvandaka na kisika ya ntete na luzingu ya Yezu. (Luka 4:43) Yandi kudipesaka na luzolo yonso na kisalu ya kusamuna. Yandi vandaka kumona nde yandi fwete sala yo nswalu-nswalu, mpi yandi vandaka kusosa ntangu yonso mabaku ya kutuba mambu ya metala Kimfumu. Sambu beto kele balongoki ya Yezu, kulanda mbandu na yandi ketwadisa beto na wapi? Na ntangu beto kesala mambu na beto ya konso kilumbu, keti kele ti bantu yina beto lenda zabisa bo nsangu ya mbote? Bika zola ya Kristu kupusa beto na kuzabisa nsangu ya mbote na bantu mingi mpenza!—2 Kor. 5:14.
4. Na nki mitindu beto lenda tomisa kisalu na beto ya kusamuna?
4 “Ata Mbala Mosi Ve Muntu Me Tubaka Mambu Mutindu Muntu Yai Ke Tuba”: Mutindu ya kulonga ya Yezu vandaka kuyitukisa bawi na yandi. (Yoa. 7:46; Mat. 7:28, 29) Inki kuswaswanisaka yandi ti balongi yankaka? Yandi vandaka kuzola bakyeleka yina yandi vandaka kulonga, yandi vandaka kuzola bantu yina yandi vandaka kulonga, mpi yandi vandaka kusadila bametode mingi. Kana beto kelanda mbandu ya Longi ya Nene, beto lenda tomisa kisalu na beto ya kusamuna.—Luka 6:40.
5. Inki fwete vanda lukanu na beto ntangu beto kelonguka mukanda “Kwisa Kulanda Mono”?
5 Yai kele mwa bimvwama ya kemonana na luzingu ya Yezu. Inki bimvwama yankaka beto lenda zwa? Ntangu nge ketadila luzingu ya Yezu na Kulonguka ya Biblia ya Dibundu, vanda na lukanu ya ‘kuzaba zola’ ya Kristu na kulandaka bangogo mpi bisalu na yandi.—Ef. 3:19.