Bademo Ke Kusaka nde Bafwa Ke Zingaka

Biblia ke tuba nde Satana ke “kusaka ntoto ya mvimba.” (Kusonga 12:9) Satana ti bademo na yandi ke zolaka ve nde beto ndima mambu yina Biblia Ndinga ya Nzambi ke tubaka. Bo ke salaka yonso sambu na kundimisa bantu nde bafwa ke zingaka na insi ya bampeve. Beto tala inki mutindu bo ke salaka yo.

Dibundu ya Luvunu

Bantu, bambisi, bambisi ya masa, mpi bandeke — Bantu, bambisi, bambisi ya masa mpi bandeke: bo yonso kele mioyo

Mabundu mingi ke longaka nde konso muntu ke vandaka ti moyo yina ke kwendaka na insi ya bafwa kana muntu me fwa. Bo ke tubaka nde nitu ke fwaka, kansi moyo ke fwaka ve. Diaka, bo ke tubaka nde moyo lenda fwa ve, nde yo ke fwaka ve.

Kansi Ndinga ya Nzambi ke longaka ve mpidina. Biblia ke monisaka nde moyo kele muntu ya mvimba, kansi ve kima mosi ya ke vandaka na kati ya muntu. Mu mbandu, ntangu Biblia ke tubilaka mutindu Nzambi gangaka Adami, yo ke tubaka nde: “Mpi Yehowa Nzambi gangaka muntu na mfututu ya ntoto mpi yandi fulaka mpema ya luzingu na mbombo na yandi, ebuna muntu kumaka moyo ya ke zinga.” (Kuyantika 2:7, noti na nsi ya lutiti) Mpidina, bo pesaka ve Adami moyo; kansi yandi vandaka moyo.

Biblia ke bingaka mpi bambisi mioyo.—Kuyantika 1:20, 21, 24, 30.

Ngogo ya Biblia “moyo” ke tendula muntu yandi mosi. Yo yina, beto lenda yituka ve na kuzaba nde mioyo ke fwaka. Biblia ke tuba nde:

“Moyo yina me sala disumu kele moyo yina ta fwa.”—Ezekiele 18:4.
“Samsoni bingaka na ndinga ya ngolo nde: ‘Bika moyo na mono kufwa ti bantu ya Filistia!’”—Bazuzi 16:30, noti na nsi ya lutiti.
“Keti na Kisabatu nsiku ke pesa nswa ya kusala diambu ya mbote to ya kusala diambu ya mbi, ya kugulusa moyo mosi to ya kufwa yo?”—Marko 3:4.

Yo kele ve ti moyo yina ke fwaka ve ya ke zingaka kana muntu me fwa — Biblia ke monisa nde moyo ke fwaka

Baverse ya nkaka ya Biblia ke monisa nde bo lenda fwa moyo (Kuyantika 17:14), bo lenda fwa yo na mbele ya bitumba (Yozue 10:37), bo lenda fwa yo na kukangaka yo mpema (Yobi 7:15), bo lenda dindisa yo na masa (Yonasi 2:5). Yo ke monisa nde moyo ke fwaka.

Kana nge tanga Biblia banda na luyantiku tii na nsuka, nge ta mona ve kisika bo me sonikaka nde “moyo ke fwaka ve.” Moyo ya muntu kele ve mpeve. Dilongi ya ke tubaka nde moyo ke fwaka ve, kele ve dilongi ya Biblia. Kansi yo kele dilongi ya Satana ti bademo na yandi. Yehowa ke zolaka ve ata fioti malongi yonso ya luvunu ya mabundu ke longaka.—Bingana 6:16-19; 1 Timoteo 4:1, 2.

Banganga-Nkisi

Ntangu Polo kwendaka na nganga-nkisi mosi na Ene-dore, demo mosi tubaka nde yandi kele Samuele — Bademo ke ndimisaka kibeni nde bo kele bantu yina me fwaka

Satana ke sadilaka mpi banganga-nkisi sambu na kukusa bantu. Nganga-nkisi kele muntu mosi ya lenda baka bansangu ya me katuka mbala mosi na insi ya bampeve. Bantu mingi, yo vanda banganga-nkisi bo mosi, ke ndimaka nde bansangu yina ke katukaka na bampeve ya bafwa. Kansi mutindu beto me mona yo na Biblia, yo kele ve mpidina.—Longi 9:5, 6, 10.

Ebuna, bansangu yina ya luvunu ke katukaka na banani? Na bademo bo mosi. Bademo kele ti makuki ya kumona muntu ntangu yandi kele na luzingu; bo ke zaba inki mutindu yandi vandaka kutuba, luse na yandi vandaka inki mutindu, inki yandi vandaka kusala mpi inki yandi vandaka kuzaba. Yo yina, yo kele ve mpasi nde bo fulula bantu yina me fwaka.—1 Samuele 28:3-19.

Masolo ya Luvunu

Satana ke sadilaka mpi masolo ya luvunu na yina me tala bafwa sambu na kundimisa bantu mambu ya luvunu. Mbala mingi, masolo ya mutindu yina ke katulaka dikebi ya bantu na kieleka ya kele na Biblia.—2 Timoteo 4:4.

Bakala mosi ke landa bampangi zole ya ke longa nsangu ya mbote, yandi ke yindula nde mpangi mosi kele mpangi na yandi ya bakala yina fwaka — Bantu ya nkaka ke tubaka nde bo monaka bantu yina fwaka

Na Afrika, yo kele ti masolo mingi ya ke monisaka nde bo monaka bantu yina fwaka ke zinga na nima ya lufwa na bo. Mbala mingi bo ke monaka bo ntama ti bisika yina bantu yango vandaka kuzinga. Kansi kudiyula nde: ‘Keti yo me fwana kibeni na kuyindula nde muntu yina kele ti kiyeka ya kukatuka na bafwa mpi ya kuzinga diaka kukwenda kuzinga ntama ti kisika yina bantu ya dibuta na yandi mpi banduku na yandi ke zingaka?’

Diaka, keti yo lenda vanda mpi ve nde muntu yina me fwanana kaka ti muntu yina me fwaka? Mu mbandu, ntangu bampangi zole vandaka kulonga nsangu ya mbote na bwala mosi, bo monaka mununu mosi ya bakala ke landa bo na nima. Yandi salaka dezia mwa bangunga banda yandi vandaka kulanda bo. Ntangu bo yulaka yandi sambu na nki yandi ke landa bo, yandi tubaka nde yandi monaka nde muntu mosi na kati bo zole kele bonso mpangi na yandi ya me fwaka mwa bamvula me luta. Yo kele masonga nde yandi vandaka kudikusa. Kansi yandi buyaka kundima nde yandi me kudikusa. Sesepi yindula fioti inki mambu mbuta yina kwendaka kusonga banduku na yandi mpi bantu yina ke zingaka kisika mosi ti yandi.

Bambonameso, Bandosi mpi Bandinga

Bademo ke sadilaka bandosi, bambonameso, mpi na ndinga ya bantu ya me fwaka sambu na kukusa bantu

Ntembe kele ve nde nge me zaba mambu ya kuyituka yina bantu me monaka, me waka, to me lalaka na bandosi. Mbala mingi mambu ya mutindu yina ke pesaka bantu yina ke kutanaka ti yo boma. Marein ke zingaka na Westi ya Afrika. Mbala mingi, yandi vandaka kuwa ndinga ya nkaka na yandi ya nkento yina me fwaka ke binga yandi na mpimpa. Nkaka yina muntu butaka mama na yandi. Marein vandaka kuboka mpi kutedimisa bantu yonso ya nzo na bo. Nsuka-nsuka, yandi vandaka kuyindula diaka ve mbote.

Sesepi, kana bafwa ke zingaka kibeni, keti yo me fwana na kuyindula nde bo lenda pesa bantu yina bo ke zolaka boma? Ata fioti ve. Mambu yina ya luvunu ke katukaka na bademo.

Ebuna, inki beto lenda tuba sambu na bansangu yina lenda sadisa bantu mpi kupesa bo kikesa? Mu mbandu, na Sierra Leone, Gbassay vandaka kubela. Yandi lalaka ndosi mpi yandi monaka tata na yandi yina me fwaka ke songa yandi nde: yandi fwete kwenda na nti mosi, yandi baka dititi na yo, yandi vukisa yo ti masa ebuna yandi nwa yo. Na ntwala ya kusala yo, yandi fwete solula ve ti muntu. Yandi salaka mpidina mpi yandi belukaka.

Nkento ya nkaka tubaka nde kilumbu mosi na mpimpa, bakala na yandi yina me fwaka, basikilaka yandi. Yandi tubaka nde bakala na yandi vandaka kitoko mpi lwataka bilele ya kitoko.

Bansangu yina mpi bambonameso yina ke monanaka bonso nde yo kele ya mbote mpi ya mfunu. Keti yo ke katukaka na Nzambi? Ve. Yehowa kele “Nzambi ya kieleka.” (Nkunga 31:5) Yandi lenda ndima ve ata fioti kutudila beto mutambu to kukusa beto. Kaka bademo bantu ke salaka mpidina.

Kansi, keti yo ke vandaka ti bademo ya mbote? Ve. Ata bantangu ya nkaka, yo lenda monana nde bademo lenda sadisa bantu, bo yonso bo kele mbi. Ntangu Diabulu solulaka ti Eva, yandi monanaka bonso nduku na yandi. (Kuyantika 3:1) Kansi inki kuminaka Eva na nima ya kuwa Diabulu mpi ya kusala mambu yina yandi songaka yandi? Yandi fwaka.

Dibuta ya Eva ke nata nitu na yandi — Satana songaka Eva nde yandi ta fwa ve. Eva ndimaka yandi, kansi nsuka-nsuka yandi fwaka

Nge me zaba nde muntu ya mbi lenda vanda ve nduku ya bantu yina yandi ke zola kukusa mpi kuyiba. Kingana mosi ya Afrika ke tubaka nde: “Meno ya mpembe, ntima ndombe.” Diaka, Ndinga ya Nzambi ke tuba nde: “Satana yandi mosi ke landaka kudikitula bonso wanzio ya nsemo.”—2 Bakorinto 11:14.

Nzambi ke sadilaka diaka ve bandosi, bambonameso to ndinga ya bantu yina ke monanaka ve sambu na kusolula ti bantu awa na ntoto. Yandi ke twadisaka bantu mpi ke longaka bo nzila ya Biblia. Biblia lenda kumisa muntu “ya kufwana kibeni sambu na konso kisalu ya mbote.”—2 Timoteo 3:17.

Yo yina, ntangu Yehowa ke songaka beto nde beto keba na mayele ya mbi ya Diabulu, yandi ke salaka yo sambu yandi ke zolaka beto. Yandi me zaba nde bademo kele bambeni ya mbi kibeni.