Tuba Mambu Yina Ketungaka mpi ya Kepesaka Kikesa

NSANGU yina Nzambi mepesaka beto na kulonga kele nsangu ya mbote. Yezu kutubaka nde: “Beno fweti longa ntete Nsangu ya Mbote na makanda yonso ya bantu.” (Mar. 13:10) Yezu kupesaka beto mbandu ntangu yandi ‘zabisaka Nsangu ya Mbote ya Kimfumu ya Nzambi.’ (Luka 4:43) Biblia kebingaka mpi nsangu yina bantumwa kulongaka nde “Nsangu ya Mbote” mpi “Nsangu ya Mbote ya Kristo.” (1 Tes. 2:2; 2 Kor. 2:12) Nsangu ya mutindu yai ketungaka mpi kepesaka bantu kikesa.

Na kuwakana ti mambu ya “Nsangu ya Mbote ya mvula na mvula” yina “wanzio ya nkaka ke kwenda kuluta na kati-kati ya zulu” kutubaka, beto kesongaka bantu nde: “Beno wa Nzambi boma, beno pesa yandi lukumu!” (Kus. 14:6, 7) Na bisika yonso beto kezabisaka bantu mambu yina metala Nzambi ya kyeleka, zina na yandi, bikalulu na yandi, bisalu na yandi ya kuyituka, lukanu na yandi ya zola, mukumba na beto na ntwala na yandi, mpi mambu yina yandi kelombaka beto. Nsangu ya mbote ketubilaka mpi mutindu Yehowa tafwa bantu ya mbi yina kepesaka yandi ve lukumu mpi kebebisaka luzingu ya bantu yankaka. Kansi beto kele ve ti kiyeka ya kusambisa bantu yina beto kelongaka. Mpusa na beto ya ngolo kele nde bantu mingi kundima nsangu ya Biblia na mpila nde yo kuma kibeni nsangu ya mbote sambu na bo.​—Bing. 2:20-22; Yoa. 5:22.

Kusadila Ve Mingi Bansangu Yina Kepesaka Mpasi ti Mawa. Ya kyeleka, kele ti mambu yina kepesaka ve kikesa na luzingu. Beto kekangaka ve meso na beto na mambu yai. Sambu na kuyantika disolo, nge lenda basisa dyambu mosi yina kele na mabanza ya bantu ya teritware na beno mpi beno tubila yo na bunkufi. Kansi yo kele mfunu mingi ve na kutubila yo ntangu mingi. Mbala mingi bantu kewaka bansangu ya mawa, yo yina kutuba mambu yina kesepidisa bo ve lenda sala nde bo buya kuyamba to kuwila beto. Na luyantiku ya disolo na nge, sala ngolo na kubenda dikebi ya muwi na bakyeleka ya Ndinga ya Nzambi yina kepesaka kikesa. (Kus. 22:17) Ebuna, ata muntu yango kezola ve kulanda na kuwa disolo, nge tabikila yandi nsangu mosi ya kikesa yina yandi tayindulaka. Kusala mutindu yai lenda sala nde yandi vanda ti luzolo ya kuwidikila nge na okazio yankaka.

Mutindu mosi mpi, kana nge kele ti disolo ya kusala, kufulusa ve bawi na nge ti bansangu yina tapesa bo ve kikesa kaka sambu yo kele mingi. Kana mutubi kulutisa ntangu mingi na kutubila kaka mambu yina baluyalu ya bantu kekuka ve kusala, bansangu ya nku mpi ya mubulu, mpi kupanzana ya mansoni na mutindu mosi ya mbi, yo lenda lembisa bantu nitu. Tubila bansangu ya mpasi to ya mawa na disolo na nge kaka kana yo tasadisa nge na kulungisa lukanu mosi ya mfunu. Bansangu fyoti mpamba ya mutindu yai lenda monisa bantu mfunu ya disolo na nge. Yo lenda sadisa mpi na kumonisa bikuma yina kusalaka nde dyambu mosi buna kusalama mpi sadila yo sambu na kumonisa nde kaka Biblia ketubila mutindu ya mbote ya kuyidika yo. Na bisika yina yo kelomba nde nge sala yo, tubila yo na mutindu mosi ya sikisiki kukonda kulutisa ntangu mingi na mambu yango.

Mbala mingi, mpila kevandaka ve mpi yo kevandaka ve mbote na kukatula bansangu yonso ya kepesaka mpasi ti mawa na disolo na nge. Kima ya mpasi kevandaka ya kuvukisa mambu ya mbote ti ya mbi na mpila nde mambu yina yonso kupesa bantu kikesa. Sambu na kulungisa lukanu yai, nge fwete zaba mambu yina nge tatuba, yina nge takatula, mpi bisika yina nge tanyata. Na Disolo na Zulu ya Ngumba, Yezu kulongisilaka bawi na yandi na kubuya banzila ya balongi ya bansiku ti ya Bafarize yina vandaka kusosa kaka mambote na bo mosi, mpi yandi pesaka bo mwa bambandu sambu na kutendula dyambu yango. (Mat. 6:1, 2, 5, 16) Kansi, olie ya kulutisa ntangu mingi na kutubila bambandu ya mbi ya bantwadisi ya mabundu yango, Yezu kumonisaka mfunu ya kubakisa banzila ya kyeleka ya Nzambi mpi ya kuzitisa yo. (Mat. 6:3, 4, 6-15, 17-34) Yo butaka bambuma mingi ya mbote.

Kutuba na Mutindu Yina Kepesaka Kikesa. Kana bo mepesa nge disolo ya ketubila kitini mosi ya kisalu ya Bukristu na dibundu na nge, sala yonso na kupesa bantu kikesa olie ya kutuba mambu yina talembisa bo. Nge mosi fwete sala ngolo na kusala mambu yina nge kesyamisa bankaka na kusala. (Roma 2:21, 22; Baeb. 13:7) Bika nde zola, kansi makasi ve, kuvanda na kisina ya mambu ya nge ketuba. (2 Kor. 2:4) Kana nge ketula ntima nde bampangi na nge Bakristu kezolaka kusepedisa Yehowa, mambu ya nge ketuba tamonisa kivuvu yina, mpi yo tabuta bambuma ya mbote. Tala mutindu ntumwa Polo kutubilaka kivuvu ya mutindu yai na 1 Tesalonika 4:1-12; 2 Tesalonika 3:4, 5; mpi Filemoni 4, 8-14, 21.

Bantangu yankaka yo kele mfunu nde bankuluntu kukebisa bampangi sambu na bikalulu ya kukonda mayele. Kansi kudikulumusa tasadisa bo na kuzinga ti bampangi na bo ti mpeve ya mawete. (Gal. 6:1) Kutuba na bo fwete monisa nde bo kezitisaka bampangi yankaka na dibundu. (1 Pie. 5:2, 3) Biblia kelongisila baleke ya babakala na kubakisa kibeni dyambu yai. (1 Tim. 4:12; 5:1, 2; 1 Pie. 5:5) Kana yo kele mfunu na kunganina, na kulongisila, na kusungika mambu, yo fwete salama na kuwakana ti mambu yina Biblia ketubaka. (2 Tim. 3:16) Mutubi fwete sadila ve verse ya Biblia na kisika yina mefwana ve to kusoba ntendula na yo sambu na kusimba ngindu ya yandi kezolaka mingi. Ata ntangu yo kelomba nde nge pesa bandongisila sambu na kusungika dyambu mosi ya mbi, ndinga ya nge kesadila na disolo na nge lenda vanda ya mbote kana nge monisa ntete mpila yina bantu lenda bwa ve na dyambu yango, mutindu ya kuyidika makambu, ya kununga mambu ya mpasi, ya kusongisa ngindu mosi ya mbi, mpi mutindu bansiku ya Yehowa ketaninaka beto.​—Nk. 119:1, 9-16.

Na ntangu nge keyidika disolo na nge, tula dikebi ya mingi na mutindu nge tasukisa konso ngindu ya mfunu mpi disolo ya mvimba. Mbala mingi, bantu kevilaka nswalu ve mambu yina mutubi ketubaka na nsuka. Keti mambu yango tapesa bantu kikesa?

Na Ntangu Nge Kesolula ti Bakristu Yankaka. Bansadi ya Yehowa kesepilaka na mabaku ya kuvukana ti Bakristu yankaka na balukutakanu ya Bukristu. Yo kevandaka bantangu ya kupesana kikesa na kimpeve. Biblia kelongisila beto na ‘kupesana kikesa’ na ntangu beto kevukanaka na bisika na beto ya lusambu. (Baeb. 10:25) Beto fwete sala yo ve kaka na badiskure ti bakomantere na beto na balukutakanu kansi beto fwete sala yo mpi na masolo na beto na ntwala mpi na nima ya balukutakanu.

Ata yo kele mbi ve na kusolula mambu ya luzingu ya konso kilumbu, beto kebakaka kikesa ya kuluta mingi na masolo yina ketubilaka mambu ya kimpeve. Yo lenda vanda baeksperiansi ya beto kekutanaka na yo na kisalu ya santu. Kutudila bankaka dikebi ya masonga kepesaka mpi kikesa.

Beto fwete keba sambu na kulanda ve mambu yina kelutaka na inza. Ntangu yandi sonikilaka Bakristu ya Efezo, Polo kutubaka nde: “Beno bika luvunu! Konso muntu kutubila mpangi na yandi mambu ya kieleka.” (Ef. 4:25) Kutuba mambu ya kyeleka na kisika ya kutuba mambu ya luvunu ketendula kupesa ve lukumu na bima to na bantu yina inza kesambilaka. Mutindu mosi mpi, Yezu kutubaka nde “kiese ya kimvwama ke kusaka.” (Mat. 13:22) Yo yina ntangu beto kesolula ti bantu yankaka, beto fwete pesa ve lukumu na mambu yai ya luvunu na kutubilaka mingi mpusa ya kuzwa bima ya kinsuni.​—1 Tim. 6:9, 10.

Ntangu yandi kepesa bandongisila sambu na mfunu ya kupesa bampangi kikesa, ntumwa Polo kelongisila beto na kukonda kusambisa to kufyotuna mpangi mosi yina lenda buya na kusala mambu yankaka sambu yandi “ke na lukwikilu ya ngolo ve,” disongidila, sambu yandi kebakisa ve mbotembote mambu yonso yina ketubilaka kimpwanza ya Bukristu. Ya kyeleka, sambu masolo na beto kupesa bantu yankaka kikesa, beto fwete tadila luzingu na bo yina melutaka mpi kiteso yina bo meyelaka na kimpeve. Yo tavanda mawa kibeni na ‘kusala kima mosi yina lenda benda bampangi na beto na kusala masumu’!​—Roma 14:1-4, 13, 19.

Bantu yina kenwanaka ti mambu ya mpasi na luzingu na bo, mu mbandu maladi yina kemanaka ve, kesepilaka mingi ti masolo yina kepesaka kikesa. Ziku muntu ya mutindu yai kesalaka kikesa mingi sambu na kukwenda na balukutakanu. Bantu yina mezaba bampasi na yandi lenda yula yandi nde: “Nge kele nki mutindu?” Ntembe kele ve nde yandi tasepela na dikebi na bo. Kansi, mbala yankaka yandi kezolaka ve kutubila-tubila mavimpi na yandi sambu yo kelembisaka yandi nitu. Bangogo ya kemonisa ntonda mpi yina kesikisa yandi lenda pesa yandi kyese. Keti nge kemona banzikisa yina kemonisa nde ata na kati ya bampasi yandi kezolaka kaka Yehowa mpi kekangaka ntima? Keti bakomantere na yandi kepesaka nge kikesa? Keti yo tapesa ve kikesa mingi kuluta kana nge tubila bikesa na yandi mpi mambu yina yandi kesalaka sambu na kusadisa dibundu olie ya kutubila mambu yina yandi kesalaka mbote ve?​—1 Tes. 5:11.

Sambu masolo na beto kupesa bantu kikesa, yo kevandaka kibeni mfunu na kutadila dibanza ya Yehowa na mambu yina beto ketubila. Na Izraele ya ntama, Yehowa kupesaka ndola na bantu yina kutubaka mambu ya mbi sambu na mimonisi na yandi mpi bayina kubokutaka sambu na mana. (Kut. 12:1-16; 21:5, 6) Beto kemonisaka nde beto kebakaka mambote na bambandu yina kana beto kezitisa bankuluntu mpi kemonisa ntonda na madya ya kimpeve yina mpika ya kwikama mpi ya mayele kepesaka.​—1 Tim. 5:17.

Yo kevandaka mpasi ve na kuzwa mambu ya mbote ya kutuba na ntangu beto kesolula ti bampangi na beto Bakristu. Kansi, kana muntu mosi ketuba mambu ya mbi sambu na mpangi yankaka, beto sala kikesa na kutwadisa disolo na mambu yina kepesaka kikesa.

Yo vanda beto keta kimbangi, beto ketuba na estrade to beto kesolula ti bampangi Bakristu, beto fwete sadila luswasukusu sambu na kubasisa na kati ya kimvwama yina kele na ntima na beto ‘kaka mambu ya mfunu yina lenda sadisa bantu yina ke wa beto.’​—Ef. 4:29.