Yezu Ke Samuna na Galilea mpi Me Pesa Bantumwa na Yandi Formasio

Yezu me samuna ti kikesa yonso banda bamvula kiteso ya zole. Keti ntangu yai yandi fwete samuna diaka mingi ve mpi kupema? Ve, Yezu me yalumuna kisalu na yandi ya kusamuna; yandi me kwenda ‘na bambanza yonso mpi na babwala yonso ya Galilea, yandi ke longa na basinagoga na bo mpi ke samuna nsangu ya mbote ya Kimfumu mpi ke belula bamaladi ya mitindu yonso mpi bifu ya mitindu yonso.’ (Matayo 9:35) Mambu yina yandi me mona me ndimisa yandi nde yandi fwete yalumuna kisalu na yandi ya kusamuna. Kansi, inki mutindu yandi ta sala kisalu yango?

Ntangu Yezu ke kwenda, yandi me mona bantu yina kele na mfunu ya lusadisu mpi ya kikesa na kimpeve. Bo kele bonso mameme ya me konda ngungudi, bo ke niokwama mpi ke yungana. Yandi me wila bo mawa mpi me zabisa balongoki na yandi nde: “Ya kieleka, bima ya kukatula na bilanga kele mingi, kansi bansadi kele fioti. Yo yina, beno bondila Mfumu ya kisalu ya kukatula bima na bilanga na kutinda bansadi na kisalu na yandi ya kukatula bima na bilanga.”—Matayo 9:37, 38.

Yezu me zaba mambu yina yandi lenda sala sambu na kusadisa bantu yina. Yandi me binga bantumwa 12, yandi me kabisa bo zole-zole disongidila bimvuka sambanu mpi me tinda bo na kukwenda kusamuna. Na nima yandi me pesa bo bansiku ya pwelele, yandi me tuba nde: “Beno kwenda ve na nzila ya makanda, mpi beno kota ve ata na mbanza mosi ya bantu ya Samaria; kansi beno landa kukwenda na mameme ya me vilaka ya nzo ya Izraele. Na ntangu beno ke kwenda, beno samuna nde: ‘Kimfumu ya zulu me kuma pene-pene.’”—Matayo 10:5-7.

Kimfumu yina bo fwete samuna kele yina Yezu tubilaka na kisambu ya mbandu. ‘Kimfumu me kuma pene-pene’ na mutindu Yezu Kristu, yina Nzambi me ponaka na kuvanda Ntotila, kele pana. Kansi, inki mambu ta ndimisa nde balongoki na yandi ke monisa kibeni Kimfumu yai? Yezu me pesa bo kiyeka ya kubelula bambefo mpi nkutu ya kufutumuna bafwa; bo fwete sala mambu yina yonso ya ofele. Ebuna, inki mutindu bantumwa ta lungisa bampusa na bo mosi, mu mbandu madia na bo ya konso kilumbu?

Yezu me zabisa balongoki na yandi na kuyidika ve bima yina bo ta sadila na nzietelo yina. Bo fwete nata ve saki sambu na kutula wolo, arza, to kwivre. Bo fwete nata mpi ve saki ya kutula madia sambu na nzietelo, to bilele ya nkaka to basandale ya nkaka. Sambu na nki? Yezu me pesa bo kivuvu nde: “Nsadi me fwana na kubaka madia na yandi.” (Matayo 10:10) Bantu yina balongoki ta kutana ti bo mpi bayina ta sepela na nsangu na bo ta lungisa bampusa na bo ya mfunu. Yezu me tuba nde: “Na konso kisika yina beno ke kota na nzo mosi, beno bikala kuna tii ntangu beno ta katuka na kisika yina.”—Marko 6:10.

Yezu me pesa bo mpi bansiku na mutindu bo fwete zabisa bantu nsangu ya Kimfumu. Yandi me tuba nde: “Ntangu beno ke kota na nzo, beno pesa bantu ya nzo yina mbote. Kana nzo yina me fwana, bika nde ngemba ya beno me zodila yo kuvanda na nzo yina; kansi kana yo me fwana ve, bika nde ngemba na beno kuvutukila beno. Na konso kisika yina muntu ke yamba beno ve to ke wa ve mambu na beno, ntangu beno ke basika na nzo yina to na mbanza yina, beno pupula makulu na beno sambu na kukatula mfututu.”—Matayo 10:12-14.

Yo lenda salama nde, mbanza ya mvimba to bwala ya mvimba kubuya kundima nsangu na bo. Inki ta kumina mbanza to bwala yina? Yezu me monisa nde Nzambi ta sambisa bo ngolo. Yandi me tuba nde: “Ya kieleka mono ke tubila beno nde, na Kilumbu ya Kusambisa, yo ta vanda pete mingi sambu na Sodome ti Gomore kuluta sambu na mbanza yina.”—Matayo 10:15.