DILONGI 4

Sadila Bangogo ya Mbote na Ntwala ya Kutanga Baverse

Matayo 22:41-45

NA BUNKUFI: Yidika mabanza ya bawi na ntwala ya kutanga verse.

Zaba kikuma ya ke pusa nge na kutanga verse. Na ntwala ya kutanga konso verse, benda dikebi ya bawi na ngindu ya mfunu yina nge ke zola kutubila na verse yina.

Tula dikebi na baverse yina kele na ntwala mpi na nima ya verse yango. Zikisa nde bansangu ya nge ke pesa sambu na muntu yina tubaka bangogo yina nge ke tanga to yina sonikaka mukanda yina, kele ya siki-siki.
Pesa kiyeka mingi na Biblia. Ntangu nge ke longa bantu yina ke kwikilaka na Nzambi, benda dikebi na bo na Biblia, “Ndinga ya Nzambi” mpidina nge ta monisa nde yo kele ti mayele ya kuluta mbote.
Pesa bantu mpusa ya kutanga verse. Yula ngiufula yina verse ta pesa mvutu, tubila diambu mosi yina verse ta sadisa na kununga yo to tubila munsiku mosi yina disolo mosi ya Biblia ta monisa pwelele.

Yindula mambu yina bawi na nge ke zabaka dezia sambu na disolo mpi na verse ya nge ke tubila. Ntangu nge ke zola kutanga ata verse yina bantu me zabaka, sadila bangogo ya mbote na ntwala ya kutanga yo mpi sadisa bantu na kutadila yo na mutindu ya mpa.