Babiro ya Ke Salaka Kisalu ya Kubalula Mikanda mpi Bavideo Yina Ke Natilaka Bantu Mingi Mambote

Bampangi mingi ya kele na bimvuka yina ke salaka kisalu ya kubalula mikanda mpi bavideo, ke salaka kisalu yai na Babiro ya Ke Salaka Kisalu ya Kubalula Mikanda mpi Bavideo (RTO). Bo ke salaka yo ve na Betele (Biro ya Filiale). Sambu na nki kusala kisalu ya kubalula na RTO kele mfunu mingi? Inki bisadilu bampangi ya ke salaka kisalu yango ke vandaka ti yo mfunu sambu na kusala mbote na RTO? Kunata kimvuka ya bampangi yina ke salaka kisalu ya kubalula na kisika yina bantu ke tubaka ndinga yina bo ke balula ke kumisaka kisalu na bo nki mutindu?

RTO ke sadisaka bampangi yina ke salaka kisalu ya kubalula na kuzinga kisika mosi ti bantu mingi yina ke tubaka ndinga ya bo ke balula. Karin kele na kati ya bampangi yina ke salaka kisalu ya kubalula. Yandi ke balulaka na ndinga Bas allemand. Yandi ke tuba nde: “Banda beto me kwisaka na RTO awa na Cuauhtémoc, na Chihuahua na insi Mexique, beto ke tubaka ntangu yonso ndinga Bas allemand ti bampangi ya nkaka ya ke salaka kisalu ya kubalula mpi na kisalu ya kulonga nsangu ya mbote. Beto ke tubaka yo mpi ntangu beto ke kwendaka kusumba bima. Beto ke zinga kibeni ti bantu yina ke tuba ndinga na beto. Beto ke waka bangogo yina beto vandaka kuwa diaka ve banda ntama, mpi beto ke longuka bangogo yina bantu ke sadila.”

James ke sadilaka Yehowa ti bampangi yina ke salaka kisalu ya kubalula na ndinga Frafra na insi Ghana. Yandi ke tuba nde bantangu ya nkaka, yandi ke vukanaka ve ti bampangi ya dibuta ya Betele. Kansi yandi ke tuba diaka nde: “Mono ke zolaka kusadila Yehowa na RTO. Kulonga nsangu ya mbote na ndinga ya bwala mpi kumona mutindu bantu ke sepela ti nsangu yango ke pesaka mono kiese mingi.”

Inki bampangi na beto ke salaka sambu na kubaka lukanu ya kutula RTO na bwala mosi buna? Joseph kele na kati ya bampangi yina ke sadilaka Yehowa na Departema ya Ke Talaka Kisalu ya Kutunga na Ntoto ya Mvimba na Wawick na New York, na États-Unis. Yandi ke tuba nde: “Kima ya ke pesaka beto mpasi kele nde babwala ya nkaka ke vandaka ve ti kura to masa to mpi Internet yina beto ke vandaka ti yo mfunu sambu na kubaka mambu ya kubalula. Yo yina ntangu beto ke tadilaka kisika ya kutula RTO, yo ke lombaka nde beto tadila babwala mingi yina bantu ke tubaka ndinga yango yina.”

Mbala mingi sambu na kusala mambu nswalu mpi kukonda kubasisa mbongo mingi, bo ke tulaka RTO na Nzo ya Balukutakanu ya Nene, na Nzo ya Kimfumu, to na nzo mosi ya bamisionere mpi bampangi ya ke salaka kisalu ya kubalula ke kwendaka kuna kaka sambu na kusala kisalu na bo. Kana bisika bonso yina kele ve, bampangi lenda baka nswa ya kusumba banzo yina bampangi ya ke salaka kisalu yango ya kubalula lenda vanda mpi kisika ya kutula babiro yina bo lenda sadilaka kisalu na bo. Kana mpusa ya bampangi yina ke salaka kisalu ya kubalula me soba, bampangi lenda teka kukonda mpasi banzo yina, mpi mbongo yina bo me tekila yo, bo lenda sadila yo kisika yina mpusa kele mingi.

Bisadilu Sambu na Kulanda Kusala

Na mvu ya kisalu 2020, beto basisaka mbongo ya badolare bamilio 13 sambu bisalu kulanda kusalama na ba RTO. Bampangi ya ke salaka kisalu ya kubalula na ba RTO ke vandaka ti mfunu ya ba-ordinatere, baprograme ya informatique, ba-apareyi ya bo ke kotisilaka ndinga, Internet mpi bima ya nkaka ya mfunu. Mu mbandu ordinatere mosi lenda vanda ntalu ya badolare kiteso ya 750. Bo ke tulaka na ba-ordinatere yango baprograme ya informatique yina bantu ya mumbongo ke tekaka. Bo ke tulaka mpi programe mosi (Watchtower Translation System) na ba-ordinatere yango. Programe yai ke sadisaka bampangi yina ke salaka kisalu ya kubalula na kuyidika kisalu na bo mpi na kuzwa kukonda mpasi mikanda ya nkaka yina bo ke sadilaka.

Bo ke pesaka mpi bampangi ya ke salaka kisalu ya kubalula bisadilu ya bo ke kotisilaka ndinga sambu yo sadisa bo na kukotisa ndinga na babiro na bo. Ntangu maladi ya coronavirus yantikaka, mambu monisaka nde bisadilu yina vandaka kibeni mfunu. Bantu vandaka kubasika diaka ve na banzo. Bampangi mingi ya ke salaka kisalu ya kubalula nataka bisadilu yango na banzo na bo mpi yo sadisaka bo na kulanda kukotisa ndinga sambu na mikanda mpi bavideo yina bo vandaka kubalula.

Mbala mingi, bampangi ya babwala yina ba RTO kele ke sadisaka bampangi ya ke salaka kisalu ya kubalula. Bo ke tangaka mbote-mbote mikanda yina bampangi me balula mpi bo ke tadilaka yo. Bampangi yai ke sadisaka mpi na kuyidika ba RTO mpi kutula yo bunkete. Cirstin ke sadilaka Yehowa na RTO ya kele na Cape Town na Afrique du Sud. Yandi kele na kati ya bampangi yina ke balulaka na ndinga Afrikaans. Yandi ke tuba nde: “Bampangi mingi ya ke longaka nsangu ya mbote mpi bayina ke longaka nsangu yango ntangu yonso ke vandaka ti dibaku ya kusadila makuki na bo.”

Bampangi ya ke salaka mambu yina na luzolo yonso ke sepelaka ti dibaku yina. Mpangi-nkento mosi ya ke pesaka maboko na RTO mosi buna ke tuba nde kusala na RTO kele kima mosi ya ke pesaka kikesa. Bampangi ya nkaka ya babakala mpi ya bankento ya ke zingaka na babwala yina ba RTO kele ke kwendaka mpi kukotisa ndinga. Juana kele mpangi mosi ya ke salaka kisalu ya kubalula na ndinga Totonac na Veracruz na Mexique. Yandi ke tuba nde: “Awa ya beto kele pene-pene ya bambanza yina bantu ke tubaka ndinga na beto, yo me kuma pete sambu bampangi na beto ya babakala mpi ya bankento kusadisa sambu na kukotisa ndinga sambu na mikanda mpi sambu na bavideo.”

Kansi, keti ba RTO me sadisaka bampangi ya ke salaka kisalu ya kubalula na kukuma kubalula diaka mbote kuluta? Bantu mingi ya ke tangaka mikanda yina bampangi ke balulaka ke tubaka nde yo kele mutindu yina. Cédric kele mpangi mosi ya ke sadilaka Yehowa ti bampangi yina ke salaka kisalu ya kubalula na ndinga Kongo na République démocratique du Congo. Yandi ke tuba nde: “Bampangi ya nkaka ya babakala mpi ya bankento vandaka kubinga mikanda na beto ya Kikongo nde ‘Kikongo ya mikanda ya Watch Tower,’ sambu bampangi vandaka kusonika ve Kikongo mutindu bantu ke tubaka yo. Kansi bubu, bo me kumaka kutuba nde bo me kuma kubalula mikanda na beto na Kikongo ya bilumbu yai, Kikongo yina bantu ke tubaka konso kilumbu.”

Andile kele mpangi yina ke sadilaka Yehowa ti bampangi yina ke salaka kisalu ya kubalula na ndinga Xhosa na Afrique du Sud. Yandi ke tuba mpi mambu ya mutindu mosi. Yandi ke tuba nde: “Bantu mingi ke songaka beto nde bo me mona nde beto me yidika mutindu na beto ya kubalula mikanda. Yo vanda bana ya fioti yina vandaka kutanga Nzozulu ya Nkengi na Kingelesi me kuma sesepi kutanga yo na Xhosa. Bo ke sepela kibeni ti Mbalula ya Nsi-Ntoto ya Mpa yina bo me tomisa, sambu bo me sonika yo na mutindu bantu ke tubaka.”

Mbongo yonso ya bo ke sadilaka sambu na kutula ba RTO, kuyidika yo mpi kulungisa bampusa ya bampangi yina ke sadilaka Yehowa kuna ke katukaka na makabu ya luzolo yina bampangi ke pesaka sambu kisalu yai kusalama na ntoto ya mvimba, yo vanda makabu yina bampangi ke pesaka na nzila ya Internet na donate.jw.org.