Keti Mono Fwete Samba Basantu?

Mvutu ya Biblia

Ve. Biblia ke tubaka nde beto fwete samba kaka Nzambi, na zina ya Yezu. Yezu songaka balongoki na yandi nde: “Tala mutindu beno fweti samba Nzambi: ‘Tata na beto kele na zulu, zina na nge ya santu kuvanda ya lukumu.’” (Matayo 6:9, Bible en Kituba) Yandi songaka ve ata fioti balongoki na yandi na kusambila basantu, bawanzio to muntu ya nkaka na kisika ya kusambila Nzambi.

Diaka, Yezu songaka balongoki na yandi nde: “Mono kele nzila mpi kieleka mpi luzingu. Ata muntu mosi ve ke kwisaka na Tata kana yandi kwisa ve na nzila na mono.” (Yoane 14:6) Nzambi me pesaka kaka Yezu nswa ya kubondila sambu na beto.—Baebreo 7:25.

Keti yo kele mbi kana mono ke samba Nzambi mpi basantu?

Nzambi tubaka mambu yai na Bansiku Kumi: “Mono MFUMU Nzambi, Nzambi na nge, mono kele Nzambi mosi ya zwa.” (Kubasika 20:5, Bible en Kituba) Na nki mutindu Nzambi kele “zwa”? Biblia Mbalula ya Nsi-Ntoto ya Mpa ke tubaka nde yandi “ke lombaka nde bo kangama kaka na yandi.” Nzambi ke zolaka nde beto samba mpi beto sambila kaka yandi.—Yezaya 48:11.

Nzambi ke waka mpasi kana beto ke samba muntu ya nkaka, nkutu ata basantu to bawanzio. Ntangu ntumwa Yoane sosaka kusambila wanzio mosi, wanzio buyisaka yandi mpi tubaka nde: “Ve, kusamba mono ve! Kansi samba Nzambi! Sambu beto ti bampangi na Nge ya nkaka yina zaba mambu ya kieleka yina ya Yesu songaka, beto yonso ke sadilaka Mfumu mosi.”—Kusonga 19:10, Bible en Kituba.