Bangyufula yina keyufulamaka mbala na mbala na bayina nsangu meyangidisa

Ikele na bangyufula yina keyufulamaka mbala na mbala kuluta yankaka. Beto zikisa bamosi na yau.

Kana Nzambi ke zola, sambu na inki yandi kepesa nzila na mambi?

Yau ke kyeleka nde Nzambi mepesa nzila na mambi, mpi awa na ntoto ke na bamiliyo ya bantu mekudipesa na kusala mambi. Mumbandu, bau kebasisa bamvita, kelosa babombe na zulu ya bana, kebebisa ntoto na tiya mpi na nima yau kenata nzala. Bamiliyo ya bantu kekunuwa makaya mpi kekudipesa maladi ya cancer de poumon, to keta bizumba, ebuna mpidina bau kebaka maladi ya imbi, mpi dyaka bankaka kelutisa ndilu na kunwa malafu mpi kebaka maladi ya mbimbidi to ya cir­rho­se de foie. Bayina yonso kezola ve nde mambi kumana. Bau kezolaka ve nde mpasi kubwila bau sambu na mambi ya bau kesala. Na ntangu bau kebuka yina bau kunaka, bau kedilaka nde: “Sambu na inki kaka mono?” Yempi bau ketuba nde Nzambi ke muntu ya imbi, mutindu yau metubilama na Bingana 19:3 nde: “Ikele kilau ya muntu yina kebebisa nzila nandi, ebuna ntima nandi kedasukila Yahvé!” (Osty) Yempi kana Nzambi kandikilaka bau na kusala mambi, nga bau zolaka kubedisa yandi nde yandi mebotula kimpwanza na bau.

Kana Jéhovah mepesa nzila na mambi, mingimingi ke sambu na kupesa mvutu na ntembe yina Satana Diabulu basisaka nde bantu lunga vanda ve kwikama awa na ntoto na kusadila Nzambi na ntangu bau kekutana na minyoko mpi na bampasi. (Yobo 1:​6-12; 2:​1-10) Mutindu Jéhovah mepesa yandi nzila na kuzinga, yandi mepesa yandi nzila na kulungisa mabanza nandi. (Esode 9:16) Mutindu yandi mebaka lukanu nde yandi fwete nunga kaka na dyambu yina, Satana kefula na kumonisa bantu mpasi ya mpila na mpila, sambu na kubendumuna bau na Nzambi. (Nzayikusu 12:12) Ata mpidina, Yobo bikalaka kwikama, Yezu mpi. Bakristu ya kyeleka ya ntangu na beto mpi ke kwikama.​—⁠Yobo 27:5; 31:6; Matai 4:​1-11; 1 Petelo 1:​6, 7.

Mono lenda kwikila na paladisu ya ntoto sika wapi bantu tazinga kimakulu, keti yau kele ve ngindu ya luta kitoko ya tasalama ve?

Yina ke ngindu ya Bible ve. Kana yau kemonana bonso kima ya kuluta kitoko ya tasalama ve, ikele sambu bantu meyikama mingi na mambi tuka bamvunkama mingi. Ntangu Jéhovah salaka ntoto yandi tumaka na bakwedi ya ntete na kufulusa yau na babakala mpi bankento ya kulunga, ya lendaka sansa bimenina mpi bambisi na yau yempi, na sika ya kubebisa mweta, bau zolaka tanina kitoko na yau. (Tala lutiti 12 mpi 17.) Lusilu ya paladisu ikele ve nde meluta kitoko ya tasalama ve; nkutu, mambu ya mpasi ya ntangu na beto yai meluta imbi na kufula na kusalama.

Kukwikila balusilu yina ke dyambu ya bindimandima ve. “Lukwikilu kebutukaka na nima ya kuwa dyambu.” Muntu yina kelonguka Ndinga ya Nzambi kesengumunaka mayele na yau yonso, yandi kemonaka mpi nde lukwikilu nandi keyela.​—Roma 10:17; Ebeleo 11:⁠1.

Inki mutindu mono lenda vutula na baseki yina ketuba nde Bible kewakana ve na Nkenda mpi na science?

Arkyolozi ya Bible kendimisa pwelele bukyeleka ya Bible. Sambu na yina ketadila science, yau mesobana ve na Masonuku. Mambu yai melandana awa nansi tubamaka tuka ntama na kati ya Bible na ntwala nde bantu ya science kusengumuna yau: ndonga yina ke na mweta na beto na mutindu mosi ya kuyilama ntangu yau vandaka salama, bunkongolo ya ntoto, ya mesimbama ata na kima mosi ve, mpi nzyetolo ya bandeke.​—⁠Genese, mukapu ya 1; Isaya 40:22; Yobo 26:7; Yelemia 8:⁠7.

Kulungana ya bambikudulu kendimisa nde Bible mesonama na ngolo ya mpeve ya Nzambi. Daniel zabisaka na bamvunkama meluta kukwisa mpi kubwa ya bimfumu ya ngolo ya ntoto, yempi kukwisa ya Mesiya mpi lufwa nandi. (Daniel, mikapu 2, 8; Dn 9:​24-27) Bubu yai bambikudulu yankaka ya Bible ke na kulungana, dyambu yina kepesa beto nzila na kuzaba nde beto kezinga na “bilumbu ya nsuka.” (2 Timoté 3:​1-5; Matai, Mt mukapu 24) Muntu fwana ve na kuzabisa mambu ya mpidiyai na ntwala. (Isaya 41:23) Sambu na kuzaba dyaka bantendula yankaka mbotembote, nge lenda tanga mikanda zole yina sonamaka na la Société Watch Tower na ntu-dyambu ketuba La Bible: Parole de Dieu ou des hommes? mpi La vie: comment est-elle apparue? Evolution ou création?

Inki mutindu mono tazaba na kupesa mvutu na bangyufula yina ketadila Bible?

Nge fwete longuka Bible mpi kuyindula na ntima malongi na yau, lomba na Nzambi na kutwadisa nge na nzila ya mpeve santu nandi. (Bingana 15:28; Luka 11:​9-13) Tala yai Bible ketuba: “Kansi kana muntu mosi na kati na beno ke na mayele ve, bika yandi lomba yau na Nzambi, ebuna Nzambi tapesa yandi yau; sambu Nzambi kekabaka na zola yonso na bantu ya ntima ya mbote.” (Yakobi 1:⁠5) Ikele dyaka na mikanda yankaka yina ketendulaka Bible ya nge lenda sadila sambu na kusadisa nge. Bantendula ya munoko mpi ke mfunu mingi. Yibuka dyaka bantendula yina Filipo pesaka na mwisi Etiopia. (Bisalu 8:​26-35) Na bayina nsangu keyangidisa, ba Témoins de Jéhovah mendima na kukumila bau na banzo na bau sambu na kusadisa bau na kulonguka Masonuku, ya ofele. Kuvanda ve na ketiketi na kulombila bau lusadisu yina.

Sambu na inki bantu mingi kemengaka ba Témoins de Jéhovah yempi bau kekandikila mono na kulonguka ti bau?

Bantu kumengaka kisalu ya kusamuna ya Yezu, yandi bumbilaka ve na kuzabisa yau na balongoki nandi nde bau mpi takutana na basakuba to na bamambu ya mpidyai. Kilumbu mosi bantu yitukaka na malongi ya Yezu, ebuna bambeni nandi ya mabundu tubilaka bau nde: “Keti beno mpi, yandi mekusa beno? Keti na kati ya bamfumu to bafarizyè, ke na muntu ata mosi kekwikila yandi?” (Yoane 7:​46-48; 15:20) Mingi ya bayina kebuyisa nge na kulonguka kumosi na ba Témoins kezaba bau mbotembote ve, to bau ke na bangindu ya imbi sambu na ba Témoins. Longuka na ba Témoins de Jéhovah, ebuna nge tamona nge mosi kana nde nge tayela to tayela ve na yina ketadila mbakisa ya Masonuku.​—⁠Matai 7:​17-20.

Sambu na inki ba Témoins kekwendaka na banzo ya bantu yina ke na mabundu na bau tuka ntama?

Sambu bau kezola landa mbandu ya Kristu. Yezu vandaka kukwenda na ba Yuda. Bau vandaka tuka ntama na dibundu na bau, kansi, na mambu mingi lusambu yina bau vandaka landa vandaka na luswaswanu na Ndinga ya Nzambi. (Matai 15:​1-9) Ba nsi yonso ke na mabundu, ata na ba nsi yina kebingamaka “ya bukristu” to “ya bumpani.” Yau ke mfunu mingi nde balukwikilu na beto kuwakana na malongi ya Bible. Ba Témoins kesalaka kikesa na kusadisa nkweno na bau na dyambu yina, mpidina bau kemonisaka zola na bau sambu na nkweno.

Keti ba Témoins kebanzaka nde dibundu na bau ke kaka yau mosi lusambu ya kyeleka?

Konso nani yina kezitisa dibundu nandi fwete kwikila nde yau ke dibundu ya kyeleka. Sambu na inki, kana ve, keti yandi lenda landa yau? Tala ndongisila yai mepesama na ba­kris­tu nde: “Beno zikisa mambu yonso; ebuna beno simba yina ke mbote.” (1 Tesalonike 5:21) Yau kelomba nde beto fwete zaba kana malongi yina bau kelonga kewakana na Bible; sambu lukwikilu ke kaka mosi. Ikele yau Efeso 4:5 ketuba: ‘Mfumu ke kaka mosi, lukwikilu kaka mosi, mbotika kaka mosi.’ Yezu bedisaka ngindu ya bindimandima, ya meyalumuka na nsungi na beto nde banzila ke mingi, mabundu ke mingi ya kenata kaka na lugulusu. Yau ke mpidina ve sambu Kristu tubaka nde: “Kyelo ke fyoti kibeni, mpi nzila yina kenata bantu na luzingu ke nkàkà mingi, yempi bantu fyoti kemona yau.” Kana ve, nga bau meyantikaka na kusosa dibundu yankaka.​—⁠Matai 7:⁠14.

Keti ba Témoins kekwikilaka nde kaka bau mpamba bantu taguluka?

Ve. Bamiliyo na bamiliyo ya bantu ya ntama, bayina vandaka ve ba Témoins de Jéhovah, tafutumuka yempi tabaka dyaka luzingu. Bantu mingi ya ntangu na beto lenda kuyamba kyeleka na ntwala ya “mbungulu ya nene” yempi kubaka dyaka lugulusu. Na ndambu yankaka Yezu tubaka nde beto lenda fundisa muntu ve. Beto ketalaka mpi kemonaka kaka yina ke na kumonika na meso; kansi Nzambi, ketalaka na ntima. Ata kima mosi lenda kusa yandi ve, yempi yandi kezonzaka na nkenda. Ikele na maboko ya Yezu, kansi na maboko na beto ve yandi mepesa mfundusu.​—⁠Matai 7:​1-5; 24:⁠21.

Bayina kekwendaka na balukutakanu ya ba Témoins de Jéhovah keti bau fwete pesa makabu?

Sambu na yina ketadila dyambu ya kupesa makabu ntumwa Paulo tubaka nde: “Bika nde konso muntu kupesa mutindu yandi mekana na kupesa, kansi mpi yandi kubokuta ve na ntima to kupusama ve, sambu Nzambi kezolaka muntu yina kepesa na kyese.” (2 Korinte 9:⁠7) Nsinsani kesalamaka ve na ba Salles du Royaume to na bisika ya balukutakanu ya nene ya ba Témoins de Jéhovah. Nge lenda mona kaka tumwa basanduku sika wapi muntu yina kezola pesa makabu lenda tula yau na kati. Muntu yankaka lenda zaba ve ntalu yina bankaka mepesa. Bankaka lenda pesa mingi, kansi bankaka ata kima mosi ve. Yezu monisaka inki mutindu yau lenda salama ntangu yandi tubilaka sanduku ya tempelo ya Yeruzalem mpi bayina vandaka kutula makabu na kati. Kima ke mfunu mingi, ke ntalu ya mbongo ve, kansi kele zola ya kupesa mpi kusadila yau na nkadilu ya ntima ya mbote.​—⁠Luka 21:​1-4.

Kana mono kituka Témoin de Jéhovah, keti mono mpi fwete samuna?

Kana nge kezaba nde kubika fyoti lusilu ya Nzambi ya paladisu ya ntoto nansi ya luyalu ya Kimfumu ya Kristu talungana, nge tavanda kaka na lukanu mosi na ntima na nge: ya kutuba na bankweno, sambu yau ke nsangu ya mbote!​—⁠Bisalu 5:​41, 42.

Mpidina nge tamonisa nde nge ke longoki ya Yezu Kristu. Na Bible, Yezu mebingama na zina ya “temwe ya kwikama mpi ya kyeleka.” Ntangu yandi vandaka awa na ntoto, Yezu samunaka, nde: “Kimfumu ya Nzambi mekuma penepene,” ebuna yandi tindaka balongoki nandi na kusamuna. (Nzayikusu 3:14; Matai 4:17; 10:⁠7) Na nima, Yezu pesaka bau ntuma yai: “Beno kwenda kukitula bantu ya makanda yonso balongoki na mono  . . . beno longa [bau].” Yandi zabisaka mpi nde na ntwala nsuka kukwisa “nsangu yai ya mbote ya Kimfumu tasamunama na ntoto ya mvimba ya bantu sambu na kitemwe na makanda yonso.”​—⁠Matai 28:​19, 20; 24:⁠14.

Mitindu ya kusamuna nsangu ya mbote ke mingi. Nge lenda tubila yau na masolo na nge ti banduku na nge to na bantu ya kuzabana. Nge lenda tubila yau mpi na nzila ya kusonikila muntu mukanda to na nzila ya telefone. Nge lenda mpi kutindila bantu yina nge kezaba mikanda ya la Société yina ketendula Bible. Mutindu bau ke na zola ya kukutana na muntu yonso, ba Témoins kekwendaka kyelo na kyelo.

Na kati ya Bible ikele na mbokolo yai: “Mpeve mpi nkento ketuba mbala na mbala nde: ‘Kwisa!’ Ebuna konso muntu yina mewa, bika nde yandi vutula: ‘Kwisa!’ Ebuna konso muntu yina ke na kiwini yandi kwisa, yina mezola, yandi baka masa ya luzingu, kukonda kufuta.” (Nzayikusu 22:17) Bayina ketuba na bamfinangani na bau sambu na Paladisu ya ntoto mpi mambu ya kitoko yina tavanda kuna na kati fwete sala yau na zola yonso, sambu luzolo ya mpidyai kekatukaka na ntima na bau.

Beto ke na kivuvu nde ziku nge ke na bangyufula yankaka ya kuyufula sambu na yina ketadila ba Témoins de Jéhovah mpi sambu na balukwikilu na bau. Mbalankaka nge kendima ve yankaka kati na yau. Sambu kisika ke mingi ve awa na lutiti yai, mpila ya kupesa mvutu na mambu yonso ikele ve. Kana mpila kele, sambu na inki ve kukutana na ba Témoins de Jéhovah ya bwala to ya nzyunga na beno, to na Salle du Royaume na bau sika balukutakanu na bau kesalamaka, to ntangu bau takokula na kyelo ya nzo na nge na mpila nde nge yufula bau? Nge lenda mpi kutinda bangyufula na nge na biro ya la Société Watch Tower ya mfinama na beno. Tala b’adresse yai melandana awa nansi.