Mutindu Nge Lenda Bakisa Biblia

2. Tanga ti Mabanza ya Mbote

Keti nduku mosi metelaka nge dezia mambu ya mbi sambu na muntu mosi yina nge mekutanaka ntete ve ti yandi? Nsukansuka, ntangu nge kutanaka ti muntu yango, keti mambu yina nduku na nge kusongaka nge kusalaka nde nge mona ve mbote mambu mpi bikalulu ya mbote ya muntu yango? Dyambu ya mutindu mosi lenda salama na yina metala Biblia.

NTUMWA POLO kumonisaka dyambu yina lenda salama kana beto ketanga ve Biblia ti mabanza ya mbote. Yandi sonikaka mutindu yai sambu na Bayuda yankaka ya ntangu na yandi: “Mono keta kimbangi sambu na bo nde bo kele ti kikesa sambu na Nzambi; kansi ve na kuwakana ti nzayilu ya sikisiki.”​—Roma 10:2, NW.

Bayuda yankaka ya mvu-nkama ya ntete vandaka kubuya kundima kyeleka yai yina Masonuku ya Kiebreo kutubilaka pwelele: Yezu kuvandaka Mesia. Yezu ya bwala Nazareti kulungisaka bambikudulu mpi mambu yonso yina Masonuku kutubaka na yina metala Mesia. Kansi, dibanza mosi ya mbi mpenza kukangaka Bayuda mingi ya ntangu na yandi nzila na kubakisa Ndinga ya Nzambi.

Inki beto lenda longuka na mbandu yai? Yo kele mfunu na kutanga Biblia ti mabanza ya mbote. Kuvanda dezia ti bangindu ya mbi na yina metala Biblia lenda kanga mutangi nzila na kubakisa kyeleka ya Biblia.

Mu mbandu, profesere mosi ya kelongaka mambu ya dibundu na Nordi ya Caroline, na États-Unis, kutubaka nde Biblia kele “kibeni mukanda yina bantu mesonikaka, yo kele mpenza ti bangindu ya bantu; mingi na kati ya bangindu yango meswaswana ti yankaka mpi ata ngindu mosi ve kepesaka lutwadisu ya kyeleka ya kemonisa mutindu beto fwete zinga.” Kana muntu kebaka Biblia bonso “mukanda yina bantu mesonikaka,” keti yo tapusa yandi ve na kubuya lutwadisu to minsiku yina yandi kezolaka ve?

Kansi, Biblia kesyamisaka beto na kulonguka yo ti kikesa yonso. Na yina metala bantu ya Berea na ntangu ya Polo, Masonuku ketuba nde: “Bo ndimaka nsangu ya Nzambi na luzolo yonso. Konso kilumbu bo vandaka kuzikisa mbote-mbote na mukanda ya Nzambi sambu na kutala kana mambu yina ya Paulo vandaka kutuba vandaka kwenda kiteso mosi.” (Bisalu 17:11) Bonso bantu ya Berea, nge fwete tanga Biblia ti mabanza ya mbote. Tanga Ndinga ya Nzambi ti mabanza ya mbote, ti mpusa ya ngolo ya kuzaba nsangu ya kitoko ya Munkwa na yo.