Kyeleka na Yina Metala Armagedoni

“Bampeve ya mbi . . . kekwendaka na bamfumu ya ntoto ya mvimba . . . mpi tulaka bo na kisika yina ya bo ke bingaka na Kiebreo Armagedoni.” (Beto bantu metengimisa bisono.)​—KUSONGA 16:14, 16, New Revised Standard Version.

ARMAGEDONI kele zina ya kisika mosi buna. Kansi, yo kele ve kisika mosi ya kyeleka na ntoto.

Inki kele ntendula ya kyeleka ya ngogo “Armagedoni”? Sambu na inki mbala mingi bantu kewakanisaka ngogo yai ti dyambu bonso mvita?

Bo Vukisaka bo na Kisika Yina bo Kebingaka Armagedoni

Ngogo ya kisina ya Kiebreo yina bo mebalula na Armagedoni ketendula “Ngumba ya Megido.” Ata ngumba ya kyeleka ya mutindu yai kevandaka ve, Megido kele kisika mosi ya mezabanaka. Yo vandaka kisika mosi ya mfunu yina banzila zole mekutanaka na nordi-westi ya kisika yina dikanda ya Izraele ya ntama vandaka kuzinga. Bantu vandaka kunwana bamvita ya ngolo penepene ya kisika yina. Yo yina, bantu vandaka kuwakanisa zina Megido ti mvita.a

Kansi, ntendula ya kyeleka ya ngogo Megido kele ve sambu mvita vandaka kusalama kuna kansi, kikuma yina bamvita vandaka kusalama. Megido vandaka kitini ya Ntoto ya Lusilu yina Yehowa Nzambi pesaka bantu ya Izraele. (Kubasika 33:1; Yozue 12:7, 21) Yandi silaka na kunwanina bantu ya Izraele na ntwala ya bambeni na bo mpi yandi salaka yo. (Kulonga 6:18, 19) Mumbandu, na Megido Yehowa taninaka bantu ya Izraele na mutindu ya kuyituka na ntwala ya basoda ya Yabini Ntotila ya Kanana mpi ya Sisera mfumu ya basoda na yandi.​—Bazuzi 4:14-16.

Yo yina, ngogo “Armagedoni” kele ti ntendula ya nene ya kifwani. Bo kewakanisa yo ti mvita yina bangolo zole kenwana.

Mbikundulu yina kele na Kusonga ketubilaka ntangu yina mefinama ya Satana mpi bampeve ya mbi tapusa baluyalu na kuvukisa basoda na bo sambu na kutelamina kisalu ya bansadi ya Nzambi. Mvita yina tasala nde bantu mingi kufwa, ntangu Nzambi tanwanisa basoda yina.​—Kusonga 19:11-18.

Sambu na inki Nzambi yina Biblia kemonisaka bonso ‘Nzambi yina ke wilaka bantu mawa; yina kezolaka bantu mpi yina kewaka makasi nswalu ve,’ tafwa bantu mingi? (Nehemia 9:17) Sambu na kubakisa mambu yina Nzambi kesalaka, beto fwete pesa mvutu na bangyufula yai tatu: (1) Nani tayantika mvita? (2) Sambu na inki Nzambi tanwana mvita yina? (3) Inki bupusi ya mvula na mvula mvita yai tavanda ti yo na ntoto mpi na luzingu ya bantu?

1. NANI TAYANTIKA MVITA?

Armagedoni kele ve mvita yina Nzambi tafwa bantu. Kansi, Nzambi takotila bantu ya mbote na ntwala ya bantu yina tazola kufwa bo. Bantu tanwana mvita yai kele “bamfumu ya nene ya ntoto ya mvimba,” bantwadisi ya ntoto. Inki kele kikuma ya mvita yai? Sambu, na mutindu ya kubumbana Satana tayidika mambu sambu baluyalu mpi bimvuka ya basoda kunwanisa bantu yina kesambilaka Yehowa Nzambi.​—Kusonga 16:13, 14; 19:17, 18.

Na bansi yankaka bubu yai bantu ketubila mingi kimpwanza ya kutuba mpi ya kusola dibundu, ngindu yina kemonisa nde baluyalu tasala yonso sambu na kufwa to kubuyisa lusambu lenda vanda mpasi na kundima. Kansi, mvita ya mutindu yina salamaka na mvu-nkama ya 20 mpi yo kesalama bubu yai.b Ata mpidina, bamvita yina salamaka meswaswana ti yina bo kefwanisa ti Armagedoni sambu na mambu zole ya nene. Ya ntete, Armagedoni tasalama na ntoto ya mvimba. Ya zole, mutindu Yehowa Nzambi tasala mambu taluta mutindu yandi salaka na ntangu ya ntama. (Yeremia 25:32, 33) Biblia kebingaka mvita yina “bitumba ya kilumbu ya nene” ya Nzambi Nkwa Ngolo Yonso.

2. SAMBU NA INKI NZAMBI TANWANA?

Yehowa kelongisilaka bantu yina kesambilaka yandi na kuzinga na ngemba mpi na kuzola bambeni na bo. (Mishe 4:1-3; Matayo 5:43, 44; 26:52) Yo yina, bo tabaka ve minduki sambu na kuditanina ntangu mvita yina tasalama. Kana Nzambi kusala ve mambu sambu na kugulusa bantu na yandi, bo tafwa bo. Kansi, lukumu ya Yehowa Nzambi tavanda na kigonsa. Kana bambeni ya bantu ya Nzambi kufwa bo, yo tamonisa nde Yehowa mekonda zola, lunungu to makuki ya kusadisa bo. Dyambu ya mutindu yai lenda salama ve!​—Nkunga 37:28, 29.

Nzambi kezolaka ve kufwa bantu, yo yina yandi kekebisaka bo na mambu yina yandi tasala. (2 Piere 3:9) Na nzila ya masolo yina kele na Biblia, yandi keyibusa beto mambu yonso yina yandi salaka sambu na bantu yina vandaka kunyokula bantu na yandi. (2 Bantotila 19:35) Biblia kekebisa mpi nde na bilumbu kekwisa ntangu Satana ti bantu na yandi tanwanisa bantu ya Nzambi, Yehowa tasadila ngolo na yandi sambu na kufwa bantu yina tanyokula bansadi na yandi. Ya kyeleka, Ndinga ya Nzambi bikulaka nde Yehowa tafwa bantu ya mbi. (Bingana 2:21, 22; 2 Tesalonika 1:6-9) Na ntangu yina, ntembe kele ve nde bantu yina tanwanisa bantu ya Nzambi tabakisa nde bo kele na kunwana ti Nzambi Nkwa Ngolo Yonso.​—Ezekiele 38:21-23.

3. INKI BUPUSI YA MVULA NA MVULA MVITA YAI TAVANDA TI YO?

Mvita ya Armagedoni, tagulusa bantu mingi. Ya kyeleka, yo tavanda luyantiku ya nsungi mosi ya ngemba na zulu ya ntoto.​—Kusonga 21:3, 4.

Mukanda ya Kusonga ketubila “ndonga mosi ya bantu mingi” yina ata muntu mosi ve lenda tanga ya taguluka na mvita yina. (Kusonga 7:9, 14) Na lutwadisu ya Nzambi, bantu yina taguluka tasala mambu na mpila nde ntoto kuvutuka Paladisu yina Yehowa kanaka tuka luyantiku.

Keti beto kezaba ntangu yina bo tanwanisa bantu ya Nzambi?

[Banoti na nsi ya lutiti]

[Kifwanisu ya kele na lutiti 6]

Yehowa Nzambi taninaka bantu na yandi na ntangu ya ntama

[Kifwanisu ya kele na lutiti 7]

Yehowa tatanina dyaka bantu na yandi na mvita ya Armagedoni