DISOLO YINA KELE NA LUTITI YA ZULU | KIMFUMU YA NZAMBI—SAMBU NA NKI YO KE MFUNU SAMBU NA NGE?

**Kimfumu ya Nzambi—Sambu na Nki Yo Ta Vanda Mfunu Sambu na Nge?**

Ntembe kele ve nde masolo ya me luta me sadisa nge na kubakisa nde Kimfumu ya Nzambi kele mfumu mingi sambu na Bambangi ya Yehowa. Ziku na masolo yango, nge me sepela na balusakumunu yina Kimfumu ya Nzambi ta nata. Nge lenda kudiyula kana balusilu yango ta lungana kibeni.

Olie nge kwikila mambu yonso ya nge ke wa, nge fwete vanda mayele. (Bingana 14:15) Beto lenda fwanisa mayele na nge ti ya bantu ya Berea ya ntama.a Ntangu bo zabisaka bantu ya Berea nsangu ya mbote ya Kimfumu na mbala ya ntete, bo ndimaka ve mbala mosi nde mambu yango vandaka ya kieleka. Kansi, bo vandaka kufimpa Masonuku mbote-mbote “sambu na kuzaba kana mambu yango vandaka mutindu yina.” (Bisalu 17:11) Na kikongo ya nkaka, bantu ya Berea vandaka kufwanisa nsangu ya mbote yina bo waka ti mambu yina Masonuku ke tubaka. Nsuka-nsuka, bo ndimaka nde nsangu ya mbote katukaka kibeni na Ndinga ya Nzambi.

Bambangi ya Yehowa ke lomba nge na zola yonso na kusala mutindu mosi. Na nsadisa ya programe na beto ya kulonguka Biblia ya ofele, beto ke pesa nge dibaku ya kufwanisa mambu yina Bambangi ya Yehowa ke kwikilaka sambu na Kimfumu ya Nzambi ti mambu yina Biblia ke longaka.

Katula mambu yina nge ta longuka sambu na Kimfumu ya Nzambi, kulonguka Biblia lenda sadisa nge na kubaka bamvutu na bangiufula ya nkaka ya mfunu ya luzingu, mu mbandu:

Beto katukaka na wapi?
Lukanu ya luzingu kele nki?
Sambu na nki Nzambi me pesaka nzila na bampasi?
Inki ke kuminaka beto kana beto me fwa?
Keti ntoto ta fwa?
Inki kele kinsweki sambu na kuvanda na kiese na dibuta?

Kuluta yonso, kana nge longuka Biblia yo ta sadisa nge na ‘kukwenda pene-pene na Nzambi.’ (Yakobo 4:8) Diaka, kana nge kwenda pene-pene ya Nzambi nge ta mona nde Kimfumu na yandi kele mfunu mingi sambu na nge bubu yai mpi kimakulu. Yezu zabisaka Tata na yandi na kisambu nde: “Yai ke tendula luzingu ya mvula na mvula, bo longuka na kuzaba nge, Nzambi mosi kaka ya kieleka, mpi muntu yina nge tindaka, Yezu Kristu.”—Yoane 17:3.

Bambangi ya Yehowa lenda sadila mukanda yai sambu na kulonguka Biblia ti nge.

Sambu na kulomba nde muntu kulonguka ti nge Biblia ya ofele, yula Mbangi ya Yehowa mosi to fulusa formilere yina kele na www.jw.org. (Bweta LOMBA NDE MUNTU KULONGUKA TI NGE BIBLIA na lutiti ya luyantiku)

a Berea vandaka mbanza mosi na Masedonia ya ntama.

Kikuma Yina Yandi Ke Zolaka Kimfumu ya Nzambi

Ntama mingi ve, bo pesaka Folake mwana-nkento mosi ya bamvula kumi devware na nzo-nkanda sambu na kusonika disolo ya vandaka na ntu-diambu “Mambu Yina Mono Ke Zolaka Mingi na Nsi-Ntoto Yai.” Folake ponaka na kusonika kikuma yina yandi ke zolaka kuzabisa bantu ya nkaka mambu ya me tala Kimfumu ya Nzambi.

Folake sonikaka nde “Kimfumu ya Nzambi kele luyalu mosi ya kieleka. Kansi yo ke monanaka ve mpi nge lenda mona yo ve ata nge me lwata maneti!”

Folake tubilaka balusakumunu ya Kimfumu yina yandi ke vingilaka ti mpusa ya ngolo. Na nima ya kutubila bampasi yina Kimfumu ta manisa, yandi sonikaka nde: “Yo ke pesaka mono mawa ntangu mono ke monaka bantu ke zinga na babala-bala mpi bana mingi ke fwa ti nzala na bisika mingi na ntoto.” Yandi yikaka nde: “Mono ke vandaka diaka na kiese ntangu mono ke tangaka Yezaya 65:21.” Sambu na bantu yina ta zinga na nsi ya Kimfumu ya Nzambi, Biblia ke sila nde: “Bo ta tunga banzo, bo ta zinga muna; bo ta kuna bilanga ya vinu, bo ta dia bambuma na yo.”

Folake tubaka nde yandi ke vingilaka ti mpusa yonso ntangu yina Nzambi ta katula maladi yonso na nsadisa ya Kimfumu na yandi. Na disolo na yandi, yandi tubilaka Kusonga 21:4 yina ke tuba nde Nzambi “ta kusula mansanga yonso na meso na bo. Lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve.” Yandi vutukilaka bangogo na yandi ya luyantiku sambu na kusukisa nde kutubila mambu ya me tala Yehowa mpi Kimfumu na yandi kele mambu yina yandi ke zolaka mingi na nsi-ntoto yai. Yo ke pwelele nde, leke yai ya nkento ke zolaka Kimfumu ya Nzambi mingi kibeni!