Bamvutu na Bangyufula na Beno

◼ Keti Bambangi ya Yehowa fwete kabulaka bakaseti ti ba CD yina bo mekotisa badiskure na kati to bakopi ya badiskure?

Badiskure ya mesimbama na Biblia kesyamisaka beto mpi kepesaka beto ngolo. (Bis. 15:32) Yo yina, yo kele mbi ve na kuzola kukabula bansangu yai ya kepesaka kikesa ti bantu yina kuvandaka ve na balukutakanu. Sambu beto kele ti ba apareyi ya mutindu na mutindu ya kukotisa ndinga bubu yai, beto lenda kotisa diskure na bakaseti to na ba CD mpi kupesa yo na bantu yankaka kukonda mpasi. Bankaka kele ti badiskure mingi ya bo mekotisaka na bakaseti to ba CD, yika mpi badiskure yina bo salaka bamvula mingi meluta, mpi ti kikuma ya mbote bo kedefisaka badiskure yango to kesalaka bakopi na yo sambu na banduku na bo. Bankaka mesalaka basite ya Internet mpi metulaka badiskure na basite yango sambu muntu yonso kusala kopi na yo.

Na kutuba ya mbote, yo kele kwa yo mbi ve kana beto kekotisa badiskure na bakaseti to ba CD sambu na beto mosi to sambu na bantu ya dibuta na beto. Dyaka, bankuluntu lenda baka bangidika sambu na kutula badiskure na bakaseti to ba CD sambu na bantu ya dibundu yina kele na mavimpi ya mbote ve mpi ya lenda kwisa ve na balukutakanu. Kansi, beto kele ti bikuma ya mbote ya kukabula ve bakaseti ti ba CD yina bo mekotisa badiskure na kati to bakopi ya badiskure.

Sambu mbala mingi bo kesalaka badiskure na kutadilaka bampusa ya dibundu, yo lenda salama kukonda mpasi nde beto bakisa na mutindu ya mbi dyambu mosi ya bo metuba na diskure yina kele na kaseti to na CD yina ketambula, sambu beto mezaba ve na nki dibaku bo salaka diskure yina. Dyaka, yo tavanda mpasi sambu beto zikisa nani kusalaka diskure yango mpi nki ntangu, sambu beto tula ntima nde mambu yina diskure yango ketuba kele ya mpa mpi ya masonga. (Luka 1:1-4) Dyaka, kukabula bakopi ya badiskure to bakaseti ti ba CD yina bo mekotisa badiskure na kati lenda pusa bantu yankaka na kutudila bankaka dikebi yina mefwana ve to kusosa nde bo pesa bo lukumu.—1 Kor. 3:5-7.

Mpika ya kwikama mpi ya mayele kesalaka ngolo sambu na kupesa madya ya kimpeve na kiteso ya mefwana mpi na “ntangu ya mbote.” (Luka 12:42) Yo ketadila mpi ngidika ya badiskure yina kesalamaka na mabundu ya Bambangi ya Yehowa mpi dyambu yina metala kukotisa ndinga na bakaseti yina beto lenda baka na site ya Internet jw.org yina mezabanaka. Beto lenda tula ntima nde mpika ya kwikama mpi ya mayele mpi Nto-Kimvuka na yo tapesaka beto bima yina beto kele na yo mfunu sambu na kuvanda ngolo na lukwikilu.—Bis. 16:4, 5.