Bamvutu Na Bangyufula Na Beno

◼ Keti beto fwete samba na ntangu beto kelonguka Biblia ti muntu na ntwala ya kyelo?

Kuyantika mpi kusukisa kulonguka ya Biblia ti kisambu kevandaka mbote mingi. Na nzila ya kisambu, beto kelombaka Yehowa mpeve santu sambu yo sadisa beto na ntangu ya kulonguka. (Luka 11:13) Kusala kisambu kemonisa mpi longoki nde kulonguka na yandi ya Biblia kele dyambu mosi ya mfunu, mpi yo kelongaka yandi mutindu ya kusamba. (Luka 6:40) Yo yina, yo kele mfunu na kusala kisambu ti longoki kukonda kusukinina. Kansi, sambu mambu kevandaka ya kuswaswana, ntwadisi fwete sadila luswasukusu ntangu yandi ketala kana yandi fwete sala to ve kisambu na ntangu yandi kelonguka Biblia ti muntu na ntwala ya kyelo.

Dyambu ya mfunu ya kutadila kele kisika yina beno kelonguka. Kana kulonguka kesalamaka mbala na mbala mpi beno kelonguka na kisika yina bantu ketudila beno ve dikebi, beno lenda sala kisambu ya nkufi na kinsweki, na luyantiku mpi na nsuka ya kulonguka. Kansi, kana kusala mpidina lenda benda dikebi ya bantu to kusala nde longoki kudiwa ve mbote, yo lenda vanda mbote na kuvingila tii kilumbu beno lenda longuka na kisika mosi ya mwa kingenga. Yo vanda konso kisika yina beno kelonguka, beno fwete sadila luswasukusu sambu na kutala nki ntangu beno fwete samba.—Tala Kisalu na Beto ya Kimfumu ya Marsi 2005, lutiti 6.