Yidika Diaka Kinduku na Nge ti Yehowa

KONSO mvula, mameme mingi yina kele mfunu mingi ke vutukaka na dibundu. ‘Kiese ke vandaka mingi kibeni na zulu’ ntangu konso dimeme ke vutukaka. (Luka 15:7, 10) Kana nge me vutuka na dibundu, zaba nde Yehowa, Yezu mpi bawanzio kele na kiese ya mingi kibeni mutindu nge me vutuka. Kansi nge lenda kutana ti mambu ya mpasi ntangu nge ke yidika diaka kinduku na nge ti Yehowa. Inki kele mambu yango ya mpasi mpi nki lenda sadisa nge?

MAMBU YA MPASI YINA NGE LENDA KUTANA TI YO

Bampangi mingi landaka kulemba nitu ata na nima ya kuvutuka na dibundu. Mbala ya nkaka nge ke bakisa mutindu ntotila Davidi waka. Ata ntangu Yehowa lolulaka yandi sambu na masumu na yandi, yandi tubaka nde: “Bifu na mono me lutila mono.” (Nk. 40:12; 65:3) Ata muntu me vutukila Yehowa, yandi lenda landa kudiyangisa to kuwa nsoni bamvula mingi. Bo basisaka mpangi Isabelle na dibundu mpi yandi salaka bamvula kuluta 20.a Yandi tubaka nde: “Yo vandaka mpasi kibeni sambu mono ndima nde Yehowa lenda lolula mono kibeni.” Kana nge lemba nitu, nge lenda lemba diaka na kimpeve. (Bing. 24:10) Sala bikesa sambu yo kumina nge ve.

Bampangi ya nkaka lenda wa boma nde bo ta kuka ve kusala mambu yina bo fwete sala sambu na kuyidika diaka kinduku na bo ti Yehowa. Ntangu mpangi Antoine vutukaka na dibundu, yandi tubaka nde: “Mono vilaka mambu mingi yina mono zabaka ntangu mono vandaka Mbangi ya Yehowa.” Mambu ya mutindu yina lenda sala nde bampangi ya nkaka kukuka ve kusala yonso yina bo lenda sala sambu na kuyidika diaka kinduku na bo ti Yehowa.

Beto baka mbandu mosi. Mupepe mosi ya ngolo me bula mpi yo me bebisa ngolo kibeni nzo ya muntu mosi. Yandi lenda lemba nitu kana yandi yindula ntangu mingi yina yo ta baka yandi mpi kisalu yonso yina yandi ta sala sambu na kutunga diaka nzo yina. Mutindu mosi, kana disumu ya nene yina nge salaka bebisaka kinduku na nge ti Yehowa, nge lenda yindula nde yo ta lomba nde nge sala kibeni ngolo sambu na kuyidika diaka kinduku na nge ti Yehowa. Kansi, kele ti mambu yina lenda sadisa nge.

Yehowa ke songa beto nde: “Beno kwisa mpi beto tula mambu na ndonga na kati na beto.” (Yez. 1:18) Nge me sala dezia ngolo sambu na ‘kutula mambu na ndonga.’ Yehowa ke zolaka nge sambu na bikesa yina. Kuvila ve nde mutindu nge me vutukila Yehowa, nge me sadisa yandi na kusadila mbandu na nge sambu na kumonisa Satana nde yandi kele luvunu.—Bing. 27:11.

Mutindu nge me vutuka na dibundu, nge me monisa nde nge ke kwenda pene-pene ya Yehowa mpi yandi ke tuba nde yandi ta kwisa mpi pene-pene na nge. (Yak. 4:8) Yo kele mbote mutindu bampangi me mona nde nge me vutuka diaka na dibundu kansi nge fwete sala diaka mambu ya nkaka. Nge fwete landa kukumisa ngolo zola na nge sambu na Tata na nge mpi Nduku na nge, Yehowa. Inki mutindu nge lenda sala yo?

KUDITUDILA BALUKANU YINA NGE TA KUKA KULUNGISA SAMBU NA KUYIDIKA DIAKA KINDUKU NA NGE TI YEHOWA

Sala yonso sambu na kuditudila balukanu yina nge ta kuka kulungisa. Ntembe kele ve nde nge me vila ve mambu ya mfunu yina nge longukaka na yina me tala Yehowa mpi mambu yina yandi ta sala na bilumbu ke kwisa. Kansi ntangu yai, nge fwete vutukila diaka bikalulu na nge ya kusala mambu ya kimpeve mbala na mbala. Mu mbandu, kulonga nsangu ya mbote mbala na mbala, kukwenda na balukutakanu mbala na mbala mpi kukangama ti bampangi. Beto tadila balukanu yina nge lenda kuditudila.

Solula ti Yehowa mbala na mbala. Tata na nge ke zaba mbote nde yo lenda vanda mpasi na kusamba yandi mutindu nge ke landa kudiyangisa sambu na disumu yina nge salaka. (Bar. 8:26) Ata mpidina, “kwamina na kisambu,” songa Yehowa nde nge ke zola kibeni kuyidika kinduku na nge ti yandi. (Bar. 12:12) Mpangi Andrej ke tuba nde: “Mono vandaka kudiyangisa mingi sambu na disumu yina mono salaka mpi mono vandaka kuwa nsoni. Kansi ntangu yonso yina mono vandaka kusamba, mono vandaka kuwa mbote. Mono kumaka ti ngemba mingi ya mabanza.” Kana nge ke zaba ve mambu yina nge lenda tuba na kisambu, tala bisambu yina ntotila Davidi salaka ntangu yandi balulaka ntima. Bisambu yango kele na Nkunga 51 mpi Nkunga 65.

Longuka Biblia mbala na mbala. Yo ta sadisa nge na kukuma ti lukwikilu ya ngolo mpi zola na nge sambu na Yehowa ta kuma ngolo. (Nk. 19:7-11) Mpangi Felipe ke tuba nde: “Mono lembaka na kimpeve mpi mono pesaka Yehowa mpasi sambu mono vandaka ve kutanga Biblia konso kilumbu mpi mono vandaka ve kulonguka yo mbala na mbala. Mono zolaka diaka ve kupesa Yehowa mpasi. Yo yina mono salaka yonso sambu na kulonguka Biblia mbala na mbala sambu yo tanina mono.” Nge lenda sala mpi bonso mpangi Felipe. Kana nge ke zola nde bo sadisa nge na kupona masolo ya kulonguka ntangu nge ke longuka nge mosi, nge lenda lomba mpangi mosi ya kuyela na kimpeve na kusadisa nge.

Yidika mpi kinduku na nge ti bampangi. Bampangi ya nkaka yina vutukaka na dibundu, yindulaka nde bampangi ya nkaka ta wila bo makasi. Mpangi Larissa tubaka nde: “Mono vandaka kuwa nsoni mingi. Mono bakisaka nde mono pesaka bampangi mpasi. Bangindu yina wumelaka mingi.” Ndima nde bankuluntu mpi bampangi ya nkaka ke zola kusadisa nge sambu na kuyidika diaka kinduku na nge ti Yehowa. (Tala lupangu, “Mambu Yina Bankuluntu Lenda Sala.”) Bo kele na kiese sambu nge me vutuka na dibundu. Bo ke zola mpi nde nge vanda na kiese.—Bing. 17:17.

Inki nge lenda sala sambu na kukangama ti bampangi na dibundu? Kwenda mbala na mbala na balukutakanu mpi longa nsangu ya mbote ti bampangi mbala na mbala. Inki mambote nge ta baka? Mpangi Felix tubaka nde: “Bampangi vandaka kuzola nde mono vutuka na dibundu. Bo yambaka mono mbote. Bo yonso sadisaka mono na kudiwa nde mono me vutuka diaka na dibundu, nde Yehowa me lolula mono mpi nde mono lenda landa kusadila yandi diaka.”—Tala lupangu, “Mambu Yina Nge Lenda Sala”

KUYAMBULA VE

Satana ta landa kutindila nge “mipepe mingi ya ngolo” sambu yo pusa nge na kuyambula kusala bikesa ya kuyidika diaka kinduku na nge ti Yehowa. (Luka 4:13) Sala yonso sambu na kuyidika diaka nzo na nge ya kimpeve mpi kumisa yo ngolo ntangu yai.

Yehowa tubaka mambu yai sambu na mameme na yandi: “Mono ta sosa yina me vila, mono ta vutula yina ke yungana-yungana, mono ta kanga babande na yina me lwala, mpi mono ta pesa yina me lemba kikesa.” (Ezek. 34:16) Yehowa me sadisaka bampangi mingi kibeni na kuyidika diaka kinduku na bo ti yandi. Ndima nde yandi ke zola mpi kusadisa nge na kulanda kukumisa kinduku na nge ti yandi ngolo.