Keti Nge Zabaka Yo?

Sambu na nki Biblia ke vutukilaka mambu ya nkaka?

BANTANGU ya nkaka, bantu yina sonikaka Biblia vandaka kuvutukila bangogo ya nkaka mbala na mbala. Mbala ya nkaka bo salaka mutindu yina sambu na bikuma yai tatu:

Ntangu yina bo sonikaka yo. Na Izraele ya ntama, bantu mingi vandaka ve ti bakopi ya Nsiku. Mbala mingi bo vandaka kuwa yo ntangu bo vandaka kuvukana na nzo-tenta. (Kul. 31:10-12) Kuna, bo vandaka kutanga yo sambu na bantu yonso. Ntembe kele ve nde ntangu bo vandaka kuwidikila yo ya kutelama na kimvuka ya bantu mingi, mambu mingi lendaka kukatula dikebi na bo. (Neh. 8:2, 3, 7) Yo yina yo vandaka mfunu mingi na kuvutukila bangogo ya mfunu sambu na kusadisa bantu na kuyibuka yo mpi na kusadila yo. Yo vandaka mfunu mingi na kuvutukila bangogo ya nkaka, mingi-mingi sambu na kusadisa bo na kuyibuka mambu ya fioti-fioti, mu mbandu mambu ya me tala bansiku yina Yehowa pesaka bo.​—Levi 18:4-22; Kul. 5:1.

Mutindu bo sonikaka Yo. Bo me sonikaka mikanda ya nkaka ya Biblia bonso bankunga, mu mbandu mukanda ya Bankunga , Nkunga ya Salomon mpi Bidilu. Bantangu ya nkaka bankunga vandaka ti bangogo yina bo vandaka kuvutukila mpi yo vandaka kusadisa bantu na kusimba yo na ntu. Mu mbandu beto tala bangogo yina kele na Nkunga 115:9-11. Yo ke tuba nde: “O Izraele, tudila Yehowa ntima​—Yandi kele lusadisu na bo mpi kitaninu na bo. O nzo ya Aroni, beno tudila Yehowa ntima​—Yandi kele lusadisu na bo mpi kitaninu na bo. Beno bantu yina ke waka Yehowa boma, beno tudila Yehowa ntima​—Yandi kele lusadisu na bo mpi kitaninu na bo.” Keti nge me mona mutindu kuvutukila bangogo yina vandaka kusadisa bantu yina ke yimba na kukanga bangindu yina ya mfunu mingi na mabanza mpi na bantima na bo?

Sambu na nki bo sonikaka yo. Bantangu ya nkaka bantu yina sonikaka Biblia vandaka kuvutukila bangogo ya mfunu mingi. Mu mbandu, ntangu Yehowa pesaka bantu ya Izraele nsiku ya kudia ve menga, yandi songaka Moize na kuvutukila mbala na mbala sambu na nki bo fwete dia yo ve. Yehowa zolaka kubula musonso nde luzingu ya konso kigangwa yina ke zingaka kele na menga. Yo yina menga ke monisaka luzingu. (Levi 17:11, 14) Na nima, ntangu bantumwa mpi bankuluntu na Yeruzalemi sonikilaka Bakristu mambu yina bo fwete buya sambu na kusepedisa Nzambi, bo bulaka diaka musonso na diambu ya me tala menga.​—Bis. 15:20, 29.

Ata Biblia ke vutukilaka bangogo ya nkaka, yo ke tendula ve nde Yehowa ke zola nde beto kuma ti kikalulu ya kuvutukila bangogo ya nkaka ya Biblia. Mu mbandu, Yezu tubaka nde: “Ntangu nge ke samba, kuvutukila ve mambu ya mutindu mosi mbala na mbala.” (Mat. 6:7) Kansi yandi tubilaka mambu yina beto fwete samba sambu na yo, yina ke wakana ti lukanu ya Nzambi. (Mat. 6:9-13) Ata beto ke vutukila ve bangogo ya mutindu mosi mbala na mbala ntangu beto ke samba, beto lenda samba sambu na mambu ya mutindu mosi mbala na mbala.​—Mat. 7:7-11.

Ndinga ya Nzambi kele ti kikuma ya mbote ya kuvutukila bangogo ya nkaka mpi bansa ya nkaka mbala na mbala. Yo kele mutindu mosi yina Longi na beto ya Nene ke longaka beto sambu beto baka mambote.​—Yez. 48:17, 18.