‘Tanina Bumosi ya Mpeve’
NTUMWA Polo songaka Bakristu ya Efezo na ‘kukanga ntima na mambu ya bantu ya nkaka na zola mpi na kusala ngolo na kutanina bumosi ya mpeve na ngemba yina ke vukisaka beto.’—Baef. 4:2, 3.
“Bumosi” ya beto ke vandaka ti yo kele bumosi ya mpeve, disongidila nde mpeve santu ya Yehowa ke sadisaka beto na kuvanda ti yo. Kansi mutindu ntumwa Polo tubaka yo, yo ke lombaka nde konso Mukristu kusala ngolo sambu na “kutanina bumosi” yango.
Yindula nde muntu mosi me kabila nge lele mosi ya mpa. Nani kele ti mukumba ya kuyobisa yo mpi ya kuyidika yo? Nge mosi. Sambu na nki? Sambu kana nge me sala yo ve, yo ta beba mpi yo ta vanda foti na nge mosi.
Mutindu mosi mpi, bumosi kele dikabu yina Nzambi me pesaka beto. Yo yina, konso muntu fwete sala ngolo sambu na kutanina yo. Kana beto ke wakana ve ti mpangi mosi, beto fwete kudiyula nde: ‘Keti mono ke sala yonso sambu na kuwakana diaka ti yandi mpi kutanina bumosi ya mpeve?’
“SALA NGOLO” SAMBU NA KUTANINA BUMOSI
Mutindu Polo tubaka yo, bantangu ya nkaka yo lenda vanda mpasi na kutanina bumosi ya mpeve, mingi-mingi ntangu mpangi mosi me sala to me tuba kima yina me pesa beto mpasi. Keti yo ta lomba kaka nde beto solula ti yandi sambu na kusonga yandi mutindu beto ke kudiwa? Mpidina ve. Kansi kana nge ke zola kusolula ti yandi, nge lenda kudiyula ntete nde: ‘Keti kusolula ti yandi ta yidika mambu to yo ta vanda bonso kulosa mafuta na tiya?’ Bantangu ya nkaka, yo ta vanda mfunu nde nge lolula yandi mpi nge tala kaka na meso.—Bing. 19:11; Mar. 11:25.
Kudiyula nde: ‘Keti kusolula ti yandi ta yidika mambu to yo ta vanda bonso kulosa mafuta na tiya?’
Ntumwa Polo tubaka nde beto fwete ‘kanga ntima na mambu ya bantu ya nkaka na zola.’ (Baef. 4:2) Mukanda mosi ke tuba nde beto lenda balula mpi bangogo yai nde “kubaka bo kaka mutindu bo kele.” Yo ke tendula nde beto fwete zaba nde bampangi ke salaka mpi bifu bonso beto. Ya kieleka, beto ke salaka bikesa ya kuvanda ti bikalulu ya mbote, disongidila ya kulanda mbandu ya Yehowa na mambu yina beto ke sala, ke tuba mpi ke yindula. (Baef. 4:23, 24) Ata mpidina, beto yonso ke salaka bifu. (Bar. 3:23) Kana beto ke vila ve mambu yai, yo ta sadisa beto na kuvanda ntima-nda ti bampangi mpi na kulolula bo sambu na “kutanina bumosi ya mpeve.”
Dibundu ta vanda na bumosi mpi na ngemba kana beto kele ti kikalulu ya kulolula bampangi na beto mpi ya kuvila mambu ya mbi yina bo me sala beto. Bangogo ya Kigreki ya bo me balula nde “ngemba yina ke vukisaka beto” na Baefezo 4:3, bo me balula yo nde “misisa” na Bakolosai 2:19. Misisa ke vukisaka mikwa. Mutindu mosi mpi, ngemba mpi zola ke sadisaka beto na kulanda kuvanda ti kinduku ya mbote ti bampangi ata bo me tuba to me sala kima yina beto me sepela ve ti yo.
Yo yina, kana mpangi mosi me tuba to me sala kima ya me pesa nge mpasi, lolula yandi mpi luta na kima ya nkaka na kisika ya kuyindula kaka kima yina yandi me sala. (Bak. 3:12) Ntembe kele ve nde, nge mpi me tubaka to me salaka kima yina me pesaka mpangi ya nkaka mpasi sambu beto yonso kele bantu ya kukonda kukuka. Kana beto ke vila ve mambu yai, beto ta sala yonso sambu na “kutanina bumosi ya mpeve.”