Baefezo 3:20—“[Nzambi] Ke na Kiyeka ya Kusala Mambu Mingi Yina Me Luta Mambu Yina ya Beto Ke Lombaka ti ya Beto Ke Banzaka”

“Ntangu yai Nzambi lenda sala mingi kibeni kuluta mambu yonso yina beto ke lombaka to ke yindulaka na kuwakana ti ngolo na yandi yina ke salaka na beto. Nkembo kuvanda na yandi.”​—Baefezo 3:20, 21, Mbalula ya Nsi-Ntoto ya Mpa.

“Lukumu kuvanda na Nzambi, yina ke na kiyeka ya kusala mambu mingi yina me luta mambu yina ya beto ke lombaka ti ya beto ke banzaka, Nzambi yina ke salaka na lusadisu ya ngolo yina ke salaka na beto. Lukumu na yandi kumonika.”​—Baefezo 3:20, 21, Bible en Kituba.

Ntendula ya Baefezo 3:20

Ntumwa Polo vandaka kundima nde Nzambi lenda pesa mvutu na bisambu mpi kulungisa mambu yina bantu ya ke sambilaka yandi ke vingilaka; yandi lenda sala yo na mitindu yina bo ke yindula ve nde yo lenda salama. Yandi lenda pesa bamvutu na bisambu na bo na mitindu ya kuyituka kuluta mpila bo vandaka kuyindula to kuvingila.

“Nzambi . . . lenda sala na kuwakana ti ngolo na yandi yina ke salaka na beto.” Verse 21 ke tuba nde muntu ya ke salaka mambu yina kele Yehowa Nzambi.a Na verse yai, Polo sonikaka nde: “Nkembo kuvanda na yandi, na nzila ya dibundu mpi na nzila ya Kristu Yezu.” (Yoane 20:31) Diaka, Nzambi lenda pesa beto ngolo, to kikesa, yina beto kele ti mfunu na yo sambu na kusala luzolo na yandi.​—Bafilipi 4:13.

Na verse 20, ntumwa Polo monisaka kima mosi ya mfunu na yina me tala makuki ya Yehowa ya kusadisa bantu ya ke sambilaka yandi. Ntangu mukanda mosi pesaka ntendula ya bangogo ya bo me balula nde “Nzambi yina lenda,” yo tubaka mambu yai: “Verse ke tuba ve kaka nde Nzambi kele ti makuki ya kusala kima mosi to nde mbala ya nkaka yandi ta sala yo; yo ke tendula nde yandi kele ti ngolo ya kusala yo.” Nduku na beto ya kele muntu lenda vanda ti nzala ya kusadisa beto kansi bantangu ya nkaka yandi ta kuka ve kusala yo; kansi Yehowa ke vandaka ntangu yonso ti makuki ya kusala konso kima yina kele mfunu sambu na kusadisa bantu ya ke sambilaka yandi mpi kupesa mvutu na bisambu na bo. Yandi mpamba kele ti ngolo mpi kiyeka ya kukonda ndilu.​—Yezaya 40:26.

“Nzambi lenda sala mingi kibeni kuluta mambu yonso yina beto ke lombaka to ke yindulaka.” Yehowa lenda sala mingi kuluta kupesa bantu ya ke sambilaka yandi mambu mingi to mambu “mingi kibeni kuluta.” Yandi lenda sadisa bo na mitindu yina me luta kibeni mambu yina bo lenda mona bonso kikalulu ya kukaba ya nene kibeni.

Bangogo “kuluta mambu yonso yina beto ke lombaka to ke yindulaka” ke longa beto kima ya nkaka na verse yai. Ntangu yandi ke tuba nde “kuluta mambu yonso yina beto ke lombaka to ke yindulaka,” Polo ke zola nde Bakristu yonso kuzaba nde Nzambi lenda sadisa bo na mitindu yina bo yindulaka ve. Bible en Kituba ke balula kitini ya ntete ya verse 20 mutindu yai: “Nzambi, yina ke na kiyeka ya kusala mambu mingi yina me luta mambu yina ya beto ke lombaka ti ya beto ke banzaka.” Bantangu ya nkaka, Bakristu lenda yindula nde bampasi na bo kele ngolo kibeni yo yina mpila ya kuyidika yo kele ve. Mbala ya nkaka bo ke zaba nkutu ve nki bo lenda lomba na kisambu. Kansi mayele ya Yehowa ya kubakisa diambu yina mpi makuki na yandi ya kusadisa ke vandaka ve ti bandilu. Na ntangu ya me fwana, yandi lenda yidika konso diambu ya mpasi, mpi yandi ta sala yo na mitindu yina bo yindulaka ve ata fioti. (Yobi 42:2; Yeremia 32:17) Na ntwala nde yandi sala yo, yandi ke pesaka bo ngolo ya kukanga ntima na bampasi; ee, ya kukanga ntima ti kiese!​—Yakobo 1:2, 3.

Mambu ya Bo Ke Tubila na Baverse ya Kele na Ntwala mpi na Nima ya Baefezo 3:20

Mukanda ya Baefezo kele mukanda yina ntumwa Polo sonikilaka Bakristu yina vandaka kuzinga na mbanza ya Efezo na Asie mineure; bubu yai yo kele na kati ya insi Turquie. Na mukanda yai, Polo sonikaka mambu yina yandi tubaka na kisambu sambu na bo. (Baefezo 3:14-21) Yandi sambaka sambu bo landa mbandu mutindu Yezu vandaka kusala, kuyindula mpi kusala mambu na zola, mpi na mutindu yina kuzaba zola ya Kristu; diambu yai ke tadila Bakristu yonso. Na nsuka ya kisambu na yandi, Polo kumisaka Nzambi mpi tubaka mambu ya kele na Baefezo 3:20, 21.

Tala video yai ya nkufi sambu na kumona na bunkufi mambu yina kele na mukanda ya Baefezo.