Luka 2:14—“Ngemba Kele awa na Nsi-Ntoto na Kati ya Bantu Yina ya Yandi Ke Ndimaka”

“Nkembo na Nzambi kuna na zulu, mpi ngemba na ntoto na kati ya bantu yina Nzambi ke ndimaka.”—Luka 2:14, Mbalula ya Nsi-Ntoto ya Mpa.

“Lukumu kele na Nzambi kuna na zulu, ngemba kele awa na nsi-ntoto na kati ya bantu yina ya yandi ke ndimaka.”—Luka 2:14, Bible en Kituba.

Ntendula ya Luka 2:14

Bangogo yai ya kukumisa, yina bawanzio tubaka ntangu Yezu butukaka, ke monisa nde Nzambi ke ndimaka bantu yina ke kwikilaka na Yezu mpi bantu yango lenda vanda na ngemba.

“Nkembo na Nzambi kuna na zulu.” Na nsadisa ya mambu yai, bawanzio ke monisa pwelele nde Nzambi me fwana na kubaka lukumu yonso. Mambu yina vandaka kubenda dikebi na mutindu kubutuka ya Yezu mpi kisalu na yandi ya kulonga zolaka kupesa Yehowaa Nzambi nkembo. Mu mbandu, Yezu vandaka kutuba ntangu yonso nde mambu ya yandi vandaka kulonga vandaka kukatuka na Nzambi, mu mbandu ntangu yandi tubaka nde: “Mambu ya mono ke longa kele ve ya mono, kansi yo kele ya muntu yina tindaka mono.” (Yoane 7:16-18) Ntangu Yezu salaka bimangu, mbala mingi bantu yina vandaka kumona yo “yantikaka kupesa Nzambi nkembo.” (Luka 5:18, 24-26; Yoane 5:19) Ata lufwa ya Yezu sadisaka na kupesa Nzambi lukumu. Yo kangulaka nzila sambu Nzambi kulungisa lukanu na yandi ya nene ya kufulusa ntoto ti bantu ya mbote mpi ya ke zolaka ngemba.—Kuyantika 1:28.

“Ngemba na ntoto.” Ngemba yai ke tendula mambu mingi kansi yo ke suka ve kaka na kukonda bitumba. Yo ke tadila ngemba, pima ya kati, yina muntu lenda vanda ti yo kaka kana Yehowa ke ndima yandi. Na nsadisa ya Yezu, bantu lenda vanda ti kinduku ya mbote kibeni ti Nzambi. (Yakobo 4:8) Sambu yandi kele Ntotila ya Kimfumu ya Nzambi, Yezu ta tula ngemba ya kimakulu na ntoto ya mvimba.—Nkunga 37:11; Luka 1:32, 33.

“Bantu yina Nzambi ke ndimaka.” Bangogo yai ke tubila bantu yina Nzambi ke ndimaka sambu bo ke kwikilaka na masonga yonso na yandi mpi na muntu yina yandi tindaka, disongidila Yezu. Yo ke tubila ve luzolo ya Nzambi sambu na bantu yonso ata bo kele ti bikalulu ya nki mutindu mpi ke salaka mambu ya nki mutindu, yo ke tadila mpi ve ntima ya mbote yina bantu lenda monisa. Bambalula ya nkaka ya Biblia, mu mbandu King James Version, ke balulaka mambu yai nde “luzolo ya mbote sambu na bantu.” Kasi, bamaniskri ya ntama ya mbote ya Kigreki ke ndima mutindu Mbalulu ya Nsi-Ntoto ya Mpa mpi bambula mingi ya bilumbu yai ke tubila ngindu ya ngemba ya kati ya bantu yina Nzambi ke ndimaka.—Tala “Luka 2:14 Na Bambalula ya Nkaka ya Biblia.”

Mambu ya Bo Ke Tubila na Baverse ya Kele na Ntwala mpi na Nima ya Luka 2:14

Luka kapu 2 ke tubila bamvula ya ntete ya luzingu ya Yezu na ntoto. Ntangu fioti na nima ya kubutuka na yandi, wanzio mosi monanaka na bangungudi yina vandaka “kuzinga na nganda mpi kukengila bitwisi na bo na mpimpa.”b (Luka 2:4-8) Wanzio zabisaka “nsangu ya mbote yina ta pesa bantu yonso kiese mingi;” yandi songaka bangungudi nde: “Bubu yai, na mbanza ya Davidi, bo me butila beno Ngulusi, yina kele Kristu, Mfumu.” (Luka 2:9-11) Yandi songaka bangungudi kisika bo lenda mona bebe yina me katuka kubutuka, mpi na nima bo monaka bawanzio mingi ke pesaka Nzambi lukumu. Ntangu bangungudi kumaka na Betelemi, bo monaka Maria na Yozefi mpi Yezu yina vandaka bebe. (Luka 2:12-16) Na nima ya kusonga bo mambu ya kuyituka yina bo monaka, bangungudi vutukaka sambu na kukeba bitwisi na bo, “bo vandaka kupesa Nzambi nkembo mpi kukumisa yandi sambu na mambu yonso ya bo waka mpi monaka.”—Luka 2:17-20.

Luka 2:14 Na Bambalula ya Nkaka ya Biblia

“Nkembo na Nzambi kuna na zulu, mpi na ntoto ngemba na bantu yina yandi ke ndimaka.”—Luka 2:14, New International Version.

“Nkembo na Nzambi kuna na zulu, mpi ngemba na ntoto na bantu yina yandi ke zolaka!”—Luka 2:14, Good News Translation.

“Nkembo na Nzambi na zulu, mpi na ntoto ngemba na kati ya bantu yina yandi ke zolaka!”—Luka 2:14, English Standard Version.

Tala video yai ya nkufi sambu na kumona na bunkufi mambu yina kele na mukanda ya Luka.