1 Piere 5:6, 7—‘Beno Kudikulumusa na nsi ya Diboko ya Ngolo ya Nzambi, Beno Pesa Yandi Mabanza na Beno Yina Yonso Ke Yangisa Beno’

“Yo yina, beno kudikulumusa na nsi ya diboko ya ngolo ya Nzambi, sambu yandi tombula beno na ntangu ya me fwana, na ntangu beno ke losa basusi na beno yonso na yandi sambu yandi ke kudibanzaka sambu na beno.”—1 Piere 5:6, 7, Mbalula ya Nsi-Ntoto ya Mpa.

“Yo yina, beno kudikulumusa na nsi ya diboko ya ngolo ya Nzambi, na mpila nde yandi ta tedimisa beno na kilumbu yina ya yandi me tulaka. Beno katula mabanza na beno yina yonso ke yangisaka beno, ebuna beno pesa yo na Nzambi, sambu yandi muntu ke talaka mambu na beno.”—1 Piere 5:6, 7, Bible en Kituba.

Ntendula ya 1 Piere 5:6, 7

Na bangogo yai, ntumwa Piere ke bwisa Bakristu ntima nde bo lenda samba Nzambi ti kivuvu sambu na bampasi mpi basusi na bo. Nzambi ke bakaka na mbalu bantu ya kudikulumusa, mpi ke pesaka bo matabisi mingi.

“Beno kudikulumusa na nsi ya diboko ya ngolo ya Nzambi.” Na Biblia, mbala mingi diboko ya Nzambi ke tendulaka ngolo na yandi ya kugulusa mpi ya kutanina. (Kubasika 3:19; Kulonga 26:8; Esdrasi 8:22) Bakristu ke kudikulumusaka na nsi ya diboko ya Nzaqmbi ntangu bo ke tudilaka yandi ntima. Bo ke ndimaka nde bo kele ti bandilu mpi nde bo lenda nunga ve bampasi bo mosi. (Bingana 3:5, 6; Bafilipi 4:13) Bo ke ndimaka nde Nzambi kele ti ngolo ya kusadisa bo na ntangu ya mbote mpi na mutindu ya mbote kibeni.—Yezaya 41:10.

“Sambu yandi tombula beno na ntangu ya me fwana.” Bantu yina ke kangaka ntima na bampasi lenda tula ntima nde nsuka-nsuka Nzambi ta tombula bo to ta futa bo. Yandi ta bika ve nde bo monisa bantu ya ke sambilaka yandi mpasi mvula na mvula to kuluta ngolo na bo. (1 Bakorinto 10:13) Kansi, kana bo landa kusala mambu ya mbote, Nzambi ta futa bo kibeni na “ntangu yina me fwana.”—Bagalatia 6:9.

“Na ntangu beno ke losa basusi na beno yonso na yandi sambu yandi ke kudibanzaka sambu na beno.” Bakristu lenda losila Nzambi basusi na bo yonso kana bo ke samba yandi na kudikulumusa yonso. Mukanda mosi ke tuba nde: “Verbe kulosa ke tendula kusala ngolo sambu na kulosa kima mosi ntama ti nge. Yo ke tubila kima yina muntu ke sala na luzolo yonso.” Kana Mukristu me losila Nzambi basusi na yandi, yandi lenda kuma kudiyangisa fioti mpi kubaka kima yina Biblia ke binga “ngemba ya Nzambi.” (Bafilipi 4:6, 7) Yandi lenda tula ntima nde Nzambi ke zola kusadisa yandi sambu yandi me zaba nde Nzambi ke kudibanzaka sambu na yandi mpi nde Nzambi lenda sadila ngolo na yandi ya mingi sambu na kusadisa yandi.—Nkunga 37:5; 55:22.

Mambu ya Bo Ke Tubila na Baverse ya Kele na Ntwala mpi na Nima ya 1 Piere 5:6, 7

Kapu 5 kele kapu ya nsuka ya mukanda ya ntete yina ntumwa Piere sonikilaka Bakristu. (1 Piere 1:1) Balongoki ya Kristu ya ntangu yina, kaka bonso balongoki na yandi ya bubu yai, ke kutanaka ti mambu mingi ya ke mekaka lukwikilu na bo mpi yo lenda sala nde bo vanda ti basusi. (1 Piere 1:6, 7) Sambu Piere zabaka bampasi yina bo vandaka kukutana ti yo, yandi sonikilaka bo mukanda ya ke pesa kikesa pene ya bamvu 62-64 ya ntangu na beto.—1 Piere 5:12.

Piere ke sukisa mukanda na yandi ti ngibusa ya ke pesa kikesa sambu na bantu yina ke kutana ti bampasi sambu na lukwikilu na bo. Kana bo bikala ya kudikulumusa mpi bo tula ntima na Nzambi, bo lenda tula ntima nde Nzambi ta sadisa bo na kukanga ntima. (1 Piere 5:5-10) Mambu ya Piere tubaka lenda pesa mpi kikesa na Bakristu ya bubu yai yina bo ke monisa mpasi.

Tala video yai ya nkufi sambu na kumona na bunkufi mambu yina kele na mukanda ya 1 Piere.