Lano kaba Kut Kan Wan? U Jisu u la Ong Kumno

PYRKHAT ÏA AR TYLLI KI JINGONG JONG U JISU SHAPHANG KA JINGKUT:

“Namar kata to sharai, naba phim tip lymne їa ka sngi lymne їa ka por.”​—MATHAÏOS 25:13.

“To sumar, to sharai, to duwai ruh, naba phim tip lano ka long kata ka sngi.”​—MARKOS 13:33.

Ym don uwei ruh uba tip lano ka jingkut jong kine kiei kiei baroh kin wan. Dei tang U Blei uba tip ïa ‘ka sngi bad ka por’ lano kaba kut kan wan. (Mathaïos 24:36) Hato kane ka mut ba ngin ym tip lano kaba kut kan wan? Em, kam dei kumta. U Jisu u la ïathuh ha la ki synran ban peit thuh ïa ki katto katne ki jingjia kiban pyni ba kaba kut ka la jan.

KI DAK

Kine ki jingjia ki dei ki dak jong “kaba wai noh kane ka pyrthei.” U Jisu u la ong: “Ka kynja bynriew kan ïeng ïaleh ïa ka kynja bynriew, bad ka hima ruh ïa ka hima, bad kin long ki ’nemsniew bad ki jingïapthem ruh, bad ki jingkhynñiuh jumai ha shibun ki jaka.” (Mathaïos 24:3, 7) U la ong ruh ba kan sa don “ki jingïapthem”—ki jingpang khlam. (Lukas 21:11) Hato mynta phi ïohi ïa kine ki jingjia ba u Jisu u la ïathuhlypa?

Bun ki briew mynta ki jynjar namar ki thma, ka jingkyrduh bam, u jumai bad ka jingpang kawei hadien kawei. Kum ka nuksa, ha u snem 2004, la khie u jumai bah tsunami ha ka Indian Ocean, kaba la shim noh ïa ka jingim jong 2,25,000 ngut ki briew. Hapoh lai snem, ka khlam COVID-19 ka la shim noh ïa ka jingim jong 69 lak ngut ki briew ha satlak ka pyrthei. U Jisu u la ïathuh ba kum kine ki jingjia ki pyni ba kaba kut jong kine kiei kiei kiba sniew ka la jan.

“KI SNGI KIBA KHATDUH”

Ka Baibl ka batai ïa ka por shuwa ka jingkut kum “ki sngi kiba khatduh.” (2 Petros 3:3, 4) 2 Timothi 3:1-5 ka ong ba ha ki sngi kiba khatduh, ka akor ka burom jong ki briew kan nang hiar dor. (Peit ïa ka Synduk “Ka Jinglong jong ki Briew Shuwa ka Jingkut jong ka Pyrthei.”) Hato phi ïohi ba ki briew mynta ki pyrkhat tang ïalade, ki long kiba lalot, kiba dom riang bad kibym don jingieid? Kane ruh ka dei kawei na ki dak kaba pyni ba ka jingkut jong ka pyrthei ka la jan.

Haduh lano kine ki sngi kiba khatduh kin neh? Katkum ka Baibl, ki sngi kiba khatduh kin neh “tang khyndiat por.” Te U Blei un sa “pynjot noh ïa kita kiba pynjot ïa ka pyrthei.”​—Jingpynpaw 11:15-18, 12:12.

KA PYRTHEI PARADAIS KA LA JAN!

U Blei u la buh lypa ïa ka sngi bad ka por ban pynjot noh ïa kiei kiei kiba sniew jong kane ka pyrthei. (Mathaïos 24:36) Nalor kata, ka dang don shuh ka khubor babha. U Blei ‘um mon ïano ïano ruh ban jot noh.’ U ai ïa ngi ïa ka lad ban tip ïa ka mon jong u bad ban kohnguh ïa u. Balei? (2 Petros 3:9) Namar u kwah ïa ngi ban lait im, bad ban im ha ka pyrthei bathymmai, ha kaba ka pyrthei kan long ka paradais.

U Blei u la pynïaid ïa ka kam ïalap ban hikai ïa ki briew ha satlak ka pyrthei khnang ba kin tip kumno ban ïoh shong ha ka pyrthei bathymmai kaban synshar da ka Hima jong u. U Jisu u la ong ba ïa ka khubor babha shaphang ka Hima U Blei yn ïalap “ha ka pyrthei baroh” kawei. (Mathaïos 24:14) Ha satlak ka pyrthei, ki Nongsakhi U Jehobah ki la pynlut da ki spah lak kynta ban ïalap bad ban hikai ïa ki briew shaphang ka khubor jong ka Baibl. U Jisu u la ong ba ïa kane ka kam ïalap yn pyndep ha ka pyrthei baroh kawei shuwa ba kaba kut kan wan.

Ka jingsynshar jong u briew ka la jan kut. Hynrei, ka khubor babha ka long ba phi lah ban lait im na ka jingkut jong ka pyrthei bad phin ïoh ban shong ha ka pyrthei paradais kaba U Blei u la kular. Ha ka lynnong kaba bud, ngin sa ïa peit kumno phi lah ban im ha kata ka pyrthei bathymmai.