LYNNONG 51
Kumno Phi Lah ban Pynsngewbha ïa U Jehobah da ka Ktien ka Thylliej jong Phi?
Ha ka por ba U Jehobah u la thaw ïa ngi, u la ai sngewbha ïa ngi ïa ka bor ban kren. Hato u don jingsngew ba kumno ngi pyndonkam ïa ka? Hooid! (Pule Jakob 1:26.) Te kumno ngi lah ban pyndonkam ïa ka ha ka rukom kaba pynsngewbha ïa u?
1. Kumno ngi lah ban pyndonkam bha ïa la u thylliej?
Ka Baibl ka ong ïa ngi ban “ïapyntngen paralok, bad . . . ïatei paralok.” (1 Thessaloni 5:11) Hato phi ithuh ïano ïano ba donkam jingpyntngen? Kaei kaba phi lah ban leh ban ïarap ïa ki? Pynthikna ïa ki ba phi phikir ïa ki. Lehse phi lah ban ïathuh ïa ki ïa kaei kaba phi sngewtynnad shaphang jong ki. Phi lah ruh ban pyni ïa kawei ka dkhot Baibl kaban pynshlur ïa ki. Don shibun ki dkhot Baibl kiba phi lah ban jied. Kynmaw ruh ba ka rukom kren jong phi ka lah ban pynshlur ne pynduh mynsiem ïa kiwei. Te pyrshang barobor ban kren da ki ktien kiba bha bad kiba jai jai.—Proberb 15:1.
2. Ngi dei ban kiar na ki ktien kiba kumno?
Ka Baibl ka ong: “Wat ai ba kano kano ka ktien sih kan mih na ka shyntur jong phi.” (Pule Ephesos 4:29.) Kane ka mut ba ngim dei ban pyndonkam ïa ki ktien jakhlia ne ktien sniew, bad ngin ym kren beiñ ne pynmong ïa ka jingsngew jong kiwei. Ngi dei ruh ban kiar na ka jingkren lorni bad na ka jingkren lamler.—Pule Proberb 16:28.
3. Kaei kaban ïarap ïa ngi ban kren ha ka rukom kaban tei ïa kiwei?
Bunsien kaei kaba ngi kren ka pynpaw ïa kaei kaba don hapoh jong ngi. (Loukas 6:45) Te ngi dei ban pynmlien ïalade ban pynleit jingmut tang ha kiei kiei kiba bha, kiba hok, kiba khuid, bad ha kiei kiei kiba dei ban ïaroh. (Philippi 4:8) Ban lah ban leh kumta, ngi dei ban jied bha ïa la ki paralok bad ïa ki jingpynbyrngia. (Proberb 13:20) Ka ïarap ruh ïa ngi ban pyrkhat bha shuwa ban kren. Pyrkhat kumno ki kyntien jong phi kin ktah ïa kiwei. Ka Baibl ka ong: “Don kiba kren thurmur kum ki jingdung ka wait, hynrei u thylliej jong uba stad u long ka jingkhiah.”—Proberb 12:18.
WAD SHUH SHUH
Peit kumno ngi lah ban kren ha ka rukom kaba pynsngewbha ïa U Jehobah bad kaban pynshlur ïa kiwei.
4. Teh lakam ïa la u thylliej
Teng teng, ngi kren ïa kaei kaei kaba hadien pat ngi babe. (Jakob 3:2) Pule Galatia 5:22, 23, bad nangta sa ïa peit lang ïa kine ki jingkylli harum:
Kano na kine ki jinglong phi kwah ban pan ha ka jingduwai ban ïarap ïa phi ban teh lakam ïa la u thylliej? Kumno kine ki jinglong ki lah ban ïarap ïa phi?
Pule 1 Korinth 15:33, bad nangta sa ïa peit lang ïa kane ka jingkylli harum:
Kumno ki paralok bad ki jingpynbyrngia ki lah ban ktah ïa ka rukom kren jong phi?
Kaei kaba lah ban ktah ïa ka rukom kren jong phi?
Pule Ekklesiastis 3:1, 7, bad nangta sa ïa peit lang ïa kane ka jingkylli harum:
Ha kano ka por kan kham bha ban sngap jar lane ban ap ïa ka por kaba biang ban kren?
5. Kren bha shaphang kiwei
Kumno ngi lah ban kiar na kaba kren sniew ne kren beiñ ïa kiwei? Peit ïa ka VIDEO, bad nangta sa ïa peit lang ïa kine ki jingkylli harum:
Ha kane ka video, balei ine i parabangeit shynrang i kwah ban pynkylla ïa ka rukom kren jong i shaphang kiwei?
Kaei kaba i la leh ban kylla?
Pule Ekklesiastis 7:16, bad nangta sa ïa peit lang ïa kane ka jingkylli harum:
Kaei kaba ngi dei ban kynmaw haba ngi mut ban kren sniew shaphang kiwei?
Pule Ekklesiastis 7:21, 22, bad nangta sa peit lang ïa kane ka jingkylli harum:
Kumno kine ki dkhot ki lah ban ïarap ïa phi ban teh lakam ïa la ka jingsngew haba kiwei ki kren sniew shaphang jong phi?
6. Long kiba jemnud haba phi kren bad la ka ïing ka sem
U Jehobah u kwah ïa ngi ban ïa kren ïa khana bad la ka ïing ka sem da ka jingieid. Peit ïa ka VIDEO, bad nangta sa ïa peit lang ïa kane ka jingkylli harum:
Kaei kaban ïarap ïa phi ban kren da ka jingieid bad la ka ïing ka sem jong phi?
Pule Ephesos 4:31, 32, bad nangta sa ïa peit lang ïa kane ka jingkylli harum:
Ka rukom kren kaba kumno ka tei ïa ka ïing ka sem?
U Jehobah u la pynpaw kumno u sngew shaphang u Jisu, u khun jong u. Pule Mathaïos 17:5, bad nangta sa ïa peit lang ïa kane ka jingkylli harum:
Kumno phi lah ban pyrthuhbud ïa U Jehobah ha ka rukom ba phi kren bad la kiba ha ïing ha sem?
Wad ïa ki lad ban ïaroh ïa kiwei
DON KIBA ONG: “Nga kren ïa kaei kaba nga sngew. Kam pher watla kiwei kim sngewtynnad ïa kaei kaba nga ong.”
Hato phi mynjur ïa kata? Balei?
KI MAT BAKONGSAN
Kaei kaba ngi kren ka ktah ïa kiwei. Ngi dei ban pyrkhat bha shaphang kaei kaba ngi kren, ha kano ka por ngi kren, bad kumno ngi kren.
Peit Biang
Ha kino ki rukom phi lah ban pyndonkam ïa la u thylliej ban ïarap ïa kiwei?
Ka rukom kren kaba kumno phi kwah ban kiar?
Kaei kaba lah ban ïarap ïa ngi barobor ban kren bha bad ha ka rukom kaba tei ïa kiwei?
PULE SHUH SHUH
Kaei kaba lah ban ïarap ïa ngi ban kren ïa kaei kaba bha?
Kumno Ngi Lah ban Kren kum ki Briew kiba Stad (Phareng) (8:04)
Peit kaei kaba lah ban ïarap ïa phi ban kiar na ka jingkren sih.
“Hato ka Jingkren Sih ka Long Shisha kaba Sniew?” (Na jw.org, Phareng)
Peit kumno phi lah ban kiar na ka jingïakren sniew shaphang kiwei.
Kumno Nga Lah ban Pynsangeh ïa ki Khana Lorni? (Phareng) (2:36)
Peit kumno U Jehobah u la ïarap ïa uwei u briew uba shem jingeh ban sangeh ka kren sih.