Mathayo

5 Rĩrĩa onire kĩrĩndĩ kĩa andũ, agĩthiĩ kĩrĩma-inĩ, na thutha wa gũikara thĩ, arutwo ake magĩũka kũrĩ we. 2 Akĩambĩrĩria kũmaruta, akiuga:

3 “Gũkena-rĩ, nĩ arĩa marũmbũyagia mabataro mao ma kĩĩroho, nĩ gũkorũo Ũthamaki wa igũrũ nĩ wao.

4 “Gũkena-rĩ, nĩ arĩa macakayaga, nĩ gũkorũo nĩ makomĩrĩrio.

5 “Gũkena-rĩ, nĩ arĩa ahooreri, nĩ gũkorũo nĩ makagaya thĩ.

6 “Gũkena-rĩ, nĩ arĩa mahũtagĩra na makanyotera maũndũ ma ũthingu, nĩ gũkorũo nĩ makaahũnio.

7 “Gũkena-rĩ, nĩ arĩa marĩ tha, nĩ gũkorũo nĩ makaiguĩrũo tha.

8 “Gũkena-rĩ, nĩ arĩa arũngĩrĩru ngoro, nĩ gũkorũo nĩ makona Ngai.

9 “Gũkena-rĩ, nĩ arĩa macaragia thayũ, nĩ gũkorũo nĩ magetwo ariũ a Ngai.

10 “Gũkena-rĩ, nĩ arĩa manyamarĩtio nĩ ũndũ wa ũthingu, nĩ gũkorũo Ũthamaki wa igũrũ nĩ wao.

11 “Gũkena-rĩ, nĩ inyuĩ rĩrĩa andũ mekũmũnyũrũria na kũmũnyarira na kũmũigĩrĩra igenyo cia mĩthemba yothe mĩũru nĩ ũndũ wa rĩĩtwa rĩakwa. 12 Kenai na mũcanjamũke mũno, nĩ gũkorũo kĩheo kĩanyu nĩ kĩnene kũrĩa igũrũ, tondũ ũguo noguo maanyamaragia anabii arĩa maarĩ mbere yanyu.

13 “Nĩ inyuĩ cumbĩ wa thĩ, no cumbĩ ũngĩte mũcamo waguo-rĩ, ũngĩcokio mũcamo atĩa? Ndũngĩkorũo na bata rĩngĩ, o tiga ũteirũo ũkinyangĩrĩrio thĩ nĩ andũ.

14 “Nĩ inyuĩ ũtheri wa thĩ. Itũũra rĩngĩkorũo kĩrĩma igũrũ rĩtingĩhithĩka. 15 Andũ matiakagia tawa makaũkunĩkĩria na gĩkabu, no maũigagĩrĩra handũ igũrũ, naguo tawa ũcio ũkamũrĩkĩra arĩa othe marĩ thĩinĩ wa nyũmba. 16 O ũndũ ũmwe na ũguo, rekei ũtheri wanyu ũtheragĩre andũ, nĩguo monage ciĩko cianyu njega na makagooca Ithe wanyu wa igũrũ.

17 “Mũtigecirie ndokire kũniina Watho kana ũhoro wa Anabii. Ndiokire kũũniina, ĩndĩ ndokire kũũhingia. 18 Ngũmwĩra atĩrĩ o ma, nĩ ũndũ mũhũthũ harĩ igũrũ na thĩ gũthira gũkĩra gakururo ka ndemwa ĩmwe ya Watho kwaga kũhinga. 19 Nĩ ũndũ ũcio, mũndũ o wothe ũtarũmagĩrĩra rĩathani o na rĩmwe rĩa macio manyinyi mũno na akaruta andũ angĩ kwaga kũmarũmĩrĩra, ndagĩrĩire Ũthamaki-inĩ wa igũrũ. No mũndũ o wothe ũmarũmagĩrĩra na akamarutana, nĩ agetagwo mũnene Ũthamaki-inĩ wa igũrũ. 20 Tondũ ngũmwĩra atĩrĩ, angĩkorũo ũthingu wanyu ndũkĩrĩte wa andĩki-Watho na Afarisai, hatarĩ nganja mũtikaingĩra Ũthamaki-inĩ wa igũrũ.

21 “Nĩ mũiguĩte ũrĩa andũ a tene meerirũo: ‘Ndũkanoragane, ĩndĩ ũrĩa wothe ũkoragana nĩ agaatuĩrũo igooti-inĩ.’ 22 No rĩrĩ, ngũmwĩra atĩ mũndũ wothe ũikaraga arakarĩire mũrũ wa Ithe nĩ agaacirithio igooti-inĩ, ĩndĩ ũrĩa wothe ũrumaga mũrũ wa Ithe nĩ agaacirithio nĩ Igooti Rĩrĩa Inene, nake ũrĩa wothe ũmwĩtaga, ‘Wee kĩrimũ gĩkĩ!’ nĩ agaikio Jehanamu.*

23 “Ningĩ, ũngĩkorũo ũgĩtwara kĩheo gĩaku kĩgongona-inĩ na ũrĩ hau ũririkane atĩ harĩ ũndũ mũtaraiguithania na mũrũ wa Ithe wanyu, 24 tiga kĩheo gĩaku hau, wambe ũthiĩ ũkaiguane na mũrũ wa Ithe wanyu, warĩkia ũcoke ũrute kĩheo kĩu gĩaku.

25 “Wĩhĩke kũiguana na ũrĩa ũrenda gũgũthitanga hĩndĩ ĩyo mũrĩ nake njĩra-inĩ mũgĩthiĩ igooti-inĩ, nĩguo ndagagũtware kũrĩ mũtuanĩri cira nake akũneane kũrĩ mũthigari, ũikio njera. 26 Ngũkwĩra atĩrĩ na ma: Ndũrĩ hĩndĩ ũkoima kuo o nginya ũkaarĩha gathendi ka mũthia.

27 “Nĩ mũiguĩte atĩ nĩ kwerirũo: ‘Ndũkanatharie.’ 28 No niĩ ngũmwĩra atĩ, mũndũ o wothe wĩroragĩra mũtumia arĩ na merirĩria moru nĩ arĩkĩtie gũtharia nake ngoro-inĩ yake. 29 Kwoguo, angĩkorũo riitho rĩaku rĩa ũrĩo nĩ rĩrakũhĩngithia, rĩkũũre ũrĩte. Tondũ nĩ kaba ũũrũo nĩ kĩĩga gĩaku kĩmwe gũkĩra mwĩrĩ waku wothe ũikio Jehanamu.* 30 Ningĩ, angĩkorũo guoko gwaku kwa ũrĩo nĩ kũrakũhĩngithia, gũtinie ũgũte. Tondũ nĩ kaba ũũrũo nĩ kĩĩga kĩmwe gĩaku gũkĩra mwĩrĩ waku wothe ũikio Jehanamu.*

31 “Ningĩ, nĩ kwerirũo ũũ: ‘Ũrĩa wothe ũgaate mũtumia wake, nĩ amũhe marũa ma ndigano.’ 32 No rĩrĩ, ngũmwĩra atĩ mũndũ o wothe ũngĩtigana na mũtumia wake tiga no ũndũ wa ngomanio itagĩrĩire,* amũingĩragia ũgwati-inĩ wa gũtharia, nake ũrĩa wothe ũngĩhikia mũtumia ũtiganĩte na mũthuriwe nĩ atharĩtie.

33 “Ningĩ nĩ mũiguĩte atĩ andũ a tene nĩ meerirũo: ‘Ndũkanehĩte na wage kũhingia, ĩndĩ no mũhaka ũhingagĩrie Jehova* mĩĩhĩtwa yaku.’ 34 No niĩ ngũmwĩra atĩrĩ: Mũtikanehĩte o na atĩa, mũtikanehĩte na igũrũ, tondũ nĩkuo gĩtĩ kĩa ũnene kĩa Ngai kĩrĩ; 35 kana na thĩ tondũ nĩyo gaturũa ka makinya make; o na kana na Jerusalemu, tondũ nĩrĩo itũũra rĩa Mũthamaki ũrĩa mũnene. 36 Ndũkanehĩte na mũtwe waku, tondũ ndũngĩhota kũgarũra rũcuĩrĩ rũmwe rũire kana rwerũhe. 37 Rekei ‘Ĩĩ’ yanyu ĩtuĩke ĩĩ, nayo ‘Aca’ yanyu ĩtuĩke aca, tondũ ũndũ ũrĩa ũkĩrĩte macio uumĩte kũrĩ ũrĩa mũru.

38 “Nĩ mwaiguire atĩ nĩ kwerirũo ũũ: ‘Riitho riumage riitho na igego riumage igego.’ 39 No ngũmwĩra atĩrĩ: Ndũkanagiane na mũndũ ũrĩa mũru, no mũndũ o wothe angĩkũgũtha rũthĩa rwa ũrĩo, mũnengere rũu rũngĩ o naruo. 40 Na mũndũ angĩenda gũgũtwara igooti-inĩ nĩguo oe nguo yaku ya thĩinĩ, mũnengere ya igũrũ o nayo, 41 na mũndũ ũrĩ na ũnene angĩgwatha ũthiĩ nake mairo ĩmwe, thiĩ nake mairo igĩrĩ. 42 Ũrĩa ũrakũhoya kĩndũ mũhe, nake ũrĩa ũragũkomba mbeca ndũkarege kũmũkombera.

43 “Nĩ mwaiguire atĩ nĩ kwerirũo: ‘No mũhaka wendage mũndũ ũrĩa ũngĩ na ũthũũrage thũ yaku.’ 44 No ngũmwĩra atĩrĩ: Endagai thũ cianyu na mũhoyagĩre arĩa mamũnyariraga, 45 nĩ getha mũtuĩke ariũ a Ithe wanyu wa igũrũ, tondũ atũmaga riũa rĩake rĩarĩre andũ arĩa oru na arĩa ega na agatũma mbura yurĩre andũ arĩa athingu na arĩa matarĩ athingu. 46 Tondũ mũngĩenda o arĩa mamwendete-rĩ, mũrĩ na kĩrathimo kĩrĩkũ? Githĩ etia a mbeca cia igooti matiĩkaga ũguo o nao? 47 Ningĩ mũngĩgeithia o ariũ a Ithe wanyu-rĩ, nĩ ũndũ ũrĩkũ wa mwanya mweka? Githĩ andũ a ndũrĩrĩ o nao matiĩkaga o taguo? 48 Nĩ ũndũ ũcio no mũhaka mũkoragwo mũrĩ akinyanĩru, ta ũrĩa Ithe wanyu wa igũrũ arĩ mũkinyanĩru.