Mathayo

7 “Tigai gũtuagĩra andũ arĩa angĩ nĩguo Ngai ndakanamũtuĩre, 2 nĩ gũkorũo ituĩro rĩrĩa mũtuanagĩra narĩo, nĩrĩo mũgaatuĩrũo narĩo, na gĩthimi kĩrĩa mũthimagĩra andũ nakĩo, nĩkĩo marĩmũthimagĩra nakĩo. 3 Kwoguo-rĩ, nĩ kĩĩ gĩgũtũma ũrore kahuti karĩa karĩ riitho rĩa mũrũ wa Ithe wanyu no ndũrarora rũbito rũrĩa rũrĩ riitho rĩaku? 4 Ningĩ ũngĩhota atĩa kwĩra mũrũ wa Ithe wanyu, ‘Reke ngũrute kahuti kau karĩ riitho rĩaku,’ na riitho rĩaku mwene rĩrĩ na rũbito? 5 Hinga ĩno! Amba ũrute rũbito rũu rũrĩ riitho rĩaku mwene, na thutha ũcio nĩ ũkũhota kuona wega ũrĩa ũkũruta kahuti kau karĩ riitho rĩa mũrũ wa Ithe wanyu.

6 “Mũtikanahe ngui indo iria ciamũrĩirũo Ngai, o na kana mũikĩrie ngũrũe ruru cianyu, tondũ igũcirangĩrĩria thĩ icoke imũtharĩkĩre.

7 “Thiĩi na mbere kũhoya, na nĩ mũkũheo; thiĩi na mbere gũcaria, na nĩ mũkuona; thiĩi na mbere kũringaringa, na nĩ mũkũhingũrĩrũo. 8 Tondũ mũndũ o wothe ũhoyaga nĩ aheagwo, na mũndũ o wothe ũcaragia nĩ onaga, na mũndũ o wothe ũringaringaga, nĩ ahingũragĩrũo. 9 Nũ kũna gatagatĩ-inĩ kanyu ũngĩhoyũo mũgate nĩ mũrũwe amũhe ihiga? 10 Kana mũrũwe angĩmũhoya thamaki-rĩ, no amũhe nyoka? 11 Nĩ ũndũ ũcio-rĩ, angĩkorũo inyuĩ o na gũtuĩka mũrĩ ehia nĩ mũĩ kũhe ciana cianyu iheo njega-rĩ, ĩ nake Ithe wanyu wa igũrũ, githĩ arĩa mamũhoyaga ndarĩmaheaga indo njega!

12 “Nĩ ũndũ ũcio, maũndũ mothe marĩa mũngĩenda andũ arĩa angĩ mamwĩkage, no mũhaka o na inyuĩ mũmekage o tamo. Ũguo nĩguo Watho na mabuku ma anabii marutanĩte.

13 “Tonyerai mũromo ũrĩa mũceke tondũ mũromo nĩ mwariĩ na njĩra ĩrĩa ĩkinyagia andũ harĩ kũniinwo nĩ njaramu, na andũ arĩa aingĩ nĩyo mageraga; 14 no mũromo nĩ mũceke na njĩra ĩrĩa ĩkinyagia andũ harĩ muoyo nĩ ngunderu, na andũ arĩa mamĩonaga nĩ anini.

15 “Mwĩhũgagei anabii a maheeni arĩa mokaga kũrĩ inyuĩ mehumbĩte rũũa rwa ngʼondu, no thĩinĩ nĩ njũi ndĩani. 16 Nĩ mũrĩmamenyaga kũgerera maciaro mao. Gũtirĩ hĩndĩ andũ magethaga thabibũ kuuma mĩigua-inĩ kana makagetha ngũyũ kuuma ria-inĩ. 17 O ũndũ ũmwe na ũcio, mũtĩ wothe mwega ũciaraga maciaro mega, no mũtĩ wothe mũru ũciaraga maciaro moru. 18 Mũtĩ mwega ndũngĩciara maciaro moru, o na kana mũtĩ mũru ũciare maciaro mega. 19 Mũtĩ o wothe ũtaciaraga maciaro mega nĩ gũtemwo ũtemagwo na ũgaikio mwaki-inĩ. 20 Kwoguo-rĩ, andũ acio nĩ mũrĩmamenyaga kũgerera maciaro mao.

21 “Ti mũndũ o wothe ũnjĩtaga, ‘Mwathani, Mwathani,’ ũkaingĩra Ũthamaki-inĩ wa igũrũ, no nĩ ũrĩa wĩkaga wendi wa Ithe witũ wa igũrũ. 22 Mũthenya ũcio andũ aingĩ nĩ makaanjũria atĩrĩ: ‘Mwathani, Mwathani, githĩ tũtiarathaga mohoro na rĩĩtwa rĩaku, na tũkaingata ndaimono na rĩĩtwa rĩaku, o na tũkaringa ciama nyingĩ na rĩĩtwa rĩaku?’ 23 Na hĩndĩ ĩyo nĩ ngaameera atĩrĩ: ‘Niĩ ndimũũĩ inyuĩ! Njehererai, inyuĩ mwĩkaga maũndũ moru!’

24 “Nĩ ũndũ ũcio, mũndũ wothe ũiguaga ciugo icio ciakwa na agaciathĩkĩra nĩ ta mũndũ mũũgĩ, ũrĩa waakire nyũmba yake igũrũ rĩa ihiga. 25 Na mbura ĩkiura, gũkĩgĩa mũiyũro na rũhuho rũnene rũkĩhurutana na rũkĩhũũra nyũmba ĩyo, no ndĩathũkangire tondũ yaakĩtwo igũrũ rĩa ihiga. 26 Ningĩ-rĩ, mũndũ wothe ũiguaga ciugo icio ciakwa na akaaga gũciathĩkĩra atariĩ ta mũndũ mũkĩgu, ũrĩa waakire nyũmba yake igũrũ rĩa mũthanga. 27 Nayo mbura ĩkiura, gũkĩgĩa mũiyũro, na rũhuho rũnene rũkĩhurutana na rũkĩhũũra nyũmba ĩyo, nayo ĩkĩgwa na ĩgĩthũkangio biũ.”

28 Rĩrĩa Jesu aarĩkirie kwaria maũndũ macio, kĩrĩndĩ gĩkĩgega mũno nĩ ũndũ wa ũrutani wake, 29 tondũ aamarutaga ta mũndũ waheetwo wathani nĩ Ngai, no ti ta andĩki ao a Watho.