Mariko

13 Na rĩrĩa oimaga thĩinĩ wa hekarũ, mũrutwo ũmwe wake akĩmwĩra atĩrĩ: “Mũrutani, ta rora mahiga maya na mĩako ĩno!” 2 No rĩrĩ, Jesu akĩmwĩra: “Nĩ ũkuona mĩako ĩno mĩnene ũũ? Gũtirĩ ihiga haha rĩgaatigwo rĩikarĩire rĩrĩa rĩngĩ rĩtamomoretwo.”

3 Na rĩrĩa aaikarĩte thĩ kĩrĩma-inĩ kĩa Mĩtamaiyũ handũ hekarũ yoonekaga, Petero, Jakubu, Johana, na Andrea makĩmũũria ũũ hatarĩ andũ angĩ: 4 “Ta twĩre atĩrĩ, maũndũ macio magekĩka rĩ, na nĩ kĩĩ gĩgaakorũo kĩrĩ kĩmenyithia gĩa ithirĩro rĩa maũndũ macio mothe?” 5 Nĩ ũndũ ũcio Jesu akĩmeera atĩrĩ: “Mwĩmenyererei mũtikanahĩtithio nĩ mũndũ o na ũrĩkũ. 6 Andũ aingĩ nĩ magooka na rĩĩtwa rĩakwa, makiugaga, ‘Nĩ niĩ we,’ na nĩ makaahĩtithia andũ aingĩ. 7 Ningĩ, rĩrĩa mũkaigua ũhoro wa mbaara kũndũ gũtiganĩte, mũtikanetigĩre; maũndũ macio no mũhaka mageekĩka, no mũico ndũgakorũo ũkinyĩte.

8 “Nĩ gũkorũo rũrĩrĩ nĩ rũgokĩrĩra rũrĩrĩ rũrĩa rũngĩ na ũthamaki ũũkĩrĩre ũthamaki ũrĩa ũngĩ; nĩ gũkaagĩa na ithingithia kũndũ na kũndũ; ningĩ nĩ gũkaagĩa na ngʼaragu. Maũndũ macio nĩ kĩambĩrĩria kĩa ruo ta rwa kũrũmwo.

9 “No inyuĩ-rĩ, mwĩhũgagei. Andũ nĩ makaamũtwara magooti-inĩ, na mamũhũũrĩre thunagogi-inĩ na mũrũgamio mbere ya mangavana na athamaki nĩ ũndũ wakwa, nĩguo mũtuĩke aira kũrĩ o. 10 Ningĩ, ũhoro ũrĩa mwega no mũhaka ũkaamba kũhunjio kũrĩ ndũrĩrĩ ciothe. 11 Na rĩrĩa magaakorũo makĩmũneana, mũtikanambĩrĩrie gũtangĩka igũrũ rĩa ũrĩa mũkuuga, ĩndĩ ũndũ ũrĩa wothe mũkaaheo hĩndĩ ĩyo, mũkaawaria, tondũ ti inyuĩ mũgaakorũo mũkĩaria no nĩ roho mũtheru. 12 Makĩria ma ũguo, mũndũ nĩ akoragithia mũrũ wa nyina, na ithe wa mwana oragithie mwana wake, na ciana ciũkĩrĩre aciari a cio na cimoragithie. 13 Na nĩ mũgaathũũrũo nĩ andũ othe nĩ ũndũ wa rĩĩtwa rĩakwa. No ũrĩa ũgũkirĩrĩria o nginya mũico nĩwe ũkaahonokio.

14 “No rĩrĩa mũkoona kĩndũ kĩrĩa kĩrĩ thahu kĩrehaga mwanangĩko kĩrũgamĩte harĩa gĩtagĩrĩirũo, (ũrĩa ũrathoma nĩ ahũthĩre ũtaũku) arĩa magaakorũo Judea nĩ mambĩrĩrie kũũrĩra irĩma-inĩ. 15 Mũndũ ũrĩa ũgaakorũo nyũmba igũrũ ndakanaikũrũke o na ndakanatonye kuoya indo iria irĩ thĩinĩ wa nyũmba yake; 16 na mũndũ ũrĩa ũgaakorũo mũgũnda ndakanacoke kũrĩ indo iria irĩ thutha kuoya nguo yake ya igũrũ. 17 Kaĩ atumia arĩa magaakorũo mohete nda na arĩa magaakorũo makĩongithia matukũ macio nĩ magaakorũo na haaro-ĩ! 18 Hoyagai maũndũ macio matikanakinye hĩndĩ ya heho; 19 tondũ matukũ macio magaakorũo marĩ ma thĩna ũtarĩ woneka kuuma rĩrĩa thĩ yombirũo nĩ Ngai, nginya hĩndĩ ĩyo, na ndũkoneka rĩngĩ. 20 Ma nĩ atĩ, tiga Jehova* akaanyihia matukũ macio, gũtirĩ mũndũ ũngĩkaahonoka. No nĩ ũndũ wa arĩa athuurĩte, nĩ akaanyihia matukũ macio.

21 “Ningĩ-rĩ, mũndũ o na ũrĩkũ angĩkamwĩra atĩrĩ, ‘Kristo arĩ haha,’ kana ‘Arĩ harĩa,’ mũtikanamwĩtĩkie. 22 Nĩ gũkorũo nĩ gũgoka kristo a maheeni na anabii a maheeni na maringe ciama na monanie morirũ nĩguo mahĩtithie arĩa athuure, kũngĩhoteka. 23 Nĩ ũndũ ũcio, inyuĩ mwĩhũgagei. Nĩ ndamwĩra maũndũ mothe matanakinya.

24 “No matukũ-inĩ macio, thutha wa thĩna ũcio, riũa nĩ rĩkaagĩa nduma, naguo mweri ndũkaaruta ũtheri waguo, 25 njata nacio nĩ ikaagũaga kuuma igũrũ, namo mahinya ma igũrũ nĩ magaathingithio. 26 Ningĩ andũ nĩ makoona Mũrũ wa mũndũ agĩũka arĩ thĩinĩ wa matu arĩ na hinya mũnene na riri. 27 Na nĩ agaatũma araika macokanĩrĩrie andũ ake arĩa athuure kuuma mĩena yothe ĩna ya thĩ, kuuma gĩturi kĩmwe gĩa thĩ* nginya gĩturi kĩrĩa kĩngĩ kĩa igũrũ.

28 “Na rĩrĩ, mwĩrutei na ngerekano ĩno ya mũkũyũ: Rĩrĩa honge ciaguo ciagĩa mathangũ, nĩ mũmenyaga atĩ hĩndĩ ya irio gũkũra nĩ ĩkuhĩrĩirie. 29 Ũndũ ũmwe na ũcio, rĩrĩa mũkoona maũndũ macio magĩkĩka, menyai atĩ arĩ hakuhĩ mĩrango-inĩ. 30 Ngũmwĩra atĩrĩ na ma, rũciaro rũrũ rũtirĩ hĩndĩ rũgaathira nginya maũndũ macio mothe mekĩke. 31 Igũrũ na thĩ nĩ igaathira, no ciugo ciakwa gũtirĩ hĩndĩ igaathira.

32 “Ũhoro wĩgiĩ mũthenya ũcio kana thaa, gũtirĩ mũndũ ũĩ, o na araika arĩa marĩ igũrũ kana Mũriũ, no Ithe witũ ũĩ. 33 Ikaragai mwĩhũgĩte na mwĩiguĩte, tondũ mũtiũĩ ihinda rĩrĩa rĩtuĩtwo nĩ rĩrĩkũ. 34 Nĩ ta mũndũ wathire rũgendo kũndũ kũraya agĩtiga ngombo ciake irũgamagĩrĩre nyũmba yake, o ĩmwe akĩmĩgaĩra wĩra wayo, na agĩatha mũrangĩri aikarage eiguĩte. 35 Nĩ ũndũ ũcio, ikaragai mwĩiguĩte, tondũ mũtiũĩ rĩrĩa mwene nyũmba arĩcoka, kana nĩ hwaĩ-inĩ kana nĩ ũtukũ gatagatĩ kana nĩ gũgĩkĩa kana nĩ rũcinĩ tene, 36 nĩguo rĩrĩa agooka mũterĩgĩrĩire, ndakaanakore mũrĩ toro. 37 No ũrĩa ndamwĩra, ndera andũ othe: Ikaragai mwĩhũgĩte.”