Luka
13 O hĩndĩ ĩyo andũ amwe arĩa maarĩ hau nĩ maamũheire ũhoro wa Agalili arĩa Pilato oragithĩtie na agatukania thakame yao na magongona mao. 2 Nake akĩmacokeria akĩmoria atĩrĩ: “Mũgwĩciria atĩ Agalili acio nĩo maarĩ ehia gũkĩra Agalili arĩa angĩ othe nĩ ũndũ nĩ maanyamaririo na maũndũ macio? 3 Ngũmwĩra atĩrĩ, tiguo; ĩndĩ mũngĩaga kwĩrira, o na inyuĩ inyuothe mũkaniinwo o taguo. 4 Kana arĩa ikũmi na anana maagwĩrĩirũo nĩ nyũmba ndaya Siloamu, na ĩkĩmoraga-rĩ, mũgwĩciria atĩ maarĩ ehia gũkĩra andũ arĩa angĩ othe maikaraga Jerusalemu? 5 Ngũmwĩra atĩrĩ, tiguo; ĩndĩ mũngĩaga kwĩrira, o na inyuĩ inyuothe mũkaniinwo o tao.”
6 Agĩcoka akĩmahe ngerekano ĩno: “Mũndũ ũmwe aarĩ na mũkũyũ wahandĩtwo mũgũnda-inĩ wake wa mĩthabibũ, na agĩthiĩ gũcaria maciaro harĩ guo akĩaga. 7 Agĩcoka akĩra mũruti wĩra mũgũnda-inĩ wa mĩthabibũ, ‘Rĩu nĩ mĩaka ĩtatũ ngoretwo ngĩũka gũcaria maciaro mũkũyũ-inĩ ũyũ, no ngaaga. Ũteme! Ũragĩte mũgũnda nĩkĩ?’ 8 Nake akĩmũcokeria akĩmwĩra, ‘Mwathi wakwa, reke ũikare mwaka ũngĩ ũmwe nginya nyambe ndĩũrĩmĩre na ndĩwĩkĩre thumu. 9 Ũngĩkaagĩa na maciaro thutha-inĩ, nĩ wega; no ũngĩkaaga gũciara, hĩndĩ ĩyo no ũũteme.’”
10 Hĩndĩ ĩmwe nĩ kũrutana aarutanaga thĩinĩ wa thunagogi ĩmwe mũthenya wa Thabatũ. 11 Na rĩrĩ, kũu nĩ kwarĩ na mũtumia ũmwe warĩ na roho watũmĩte arware mĩaka ikũmi na ĩnana; na aakoragwo eyunĩte na ndangĩahotire kũrũgama ehandĩte o na hanini. 12 Rĩrĩa Jesu aamuonire, akĩmwarĩria akĩmwĩra atĩrĩ: “Mũtumia ũyũ, nĩ wohorũo kuuma harĩ mũrimũ waku.” 13 Agĩcoka akĩigĩrĩra mũtumia ũcio moko, na o hĩndĩ ĩyo akĩrũngara na akĩambĩrĩria kũgooca Ngai. 14 No mũrũgamĩrĩri wa thunagogi, akĩrakara nĩ ũndũ wa Jesu kũhonania mũthenya wa Thabatũ, akĩra kĩrĩndĩ atĩrĩ: “Wĩra wagĩrĩirũo kũrutwo matukũ matandatũ; kwoguo ũkagai matukũ macio nĩguo mũhonio, no ti mũthenya wa Thabatũ.” 15 O na kũrĩ ũguo, Mwathani akĩmũcokeria: “Hinga ici, githĩ o ũmwe wanyu ndohoraga ndegwa kana ndigiri yake kuuma kiugũ mũthenya wa Thabatũ agathiĩ kũmĩhe maĩ? 16 Kaĩ gũtekwagĩrĩire mũtumia ũyũ, mwarĩ wa Iburahimu o we Shaitani atũũrĩte ohete mĩaka ikũmi na ĩnana, ohorũo kĩoho-inĩ gĩkĩ mũthenya wa Thabatũ?” 17 Rĩrĩa oigire maũndũ macio-rĩ, arĩa othe maamũkararagia magĩconoka, ĩndĩ kĩrĩndĩ gĩothe gĩkĩambĩrĩria gũkena nĩ ũndũ wa maũndũ marĩa mothe manene eekire.
18 Nĩ ũndũ ũcio agĩthiĩ na mbere kuuga: “Ũthamaki wa Ngai ũtariĩ ta kĩĩ, na ingĩũringithania na kĩĩ? 19 Ũtariĩ ta mbegũ ya karatarĩ* ĩrĩa mũndũ ũmwe aathiire akĩhanda mũgũnda wake, na ĩgĩkũra ĩgĩtuĩka mũtĩ, nacio nyoni cia rĩera-inĩ igĩaka itara honge-inĩ ciaguo.”
20 O rĩngĩ akiuga: “Ingĩringithania Ũthamaki wa Ngai na kĩĩ? 21 Ũtariĩ ta ndawa ya kũimbia ĩrĩa mũtumia ũmwe oire agĩtukania na ithimi* ithatũ nene cia mũtu nginya ũkĩimba.”
22 Na agĩthiĩ kuuma itũũra rĩmwe nginya rĩrĩa rĩngĩ na kuuma gĩcagi kĩmwe nginya kĩrĩa kĩngĩ, akĩrutanaga arĩ rũgendo-inĩ rwake rwa gũthiĩ Jerusalemu. 23 Na rĩrĩ, mũndũ ũmwe akĩmwĩra atĩrĩ: “Mwathani, hihi arĩa makahonokio nĩ anini?” Nake akĩmeera: 24 “Giginyanai mũno nĩguo mũtonyere mũromo ũrĩa mũceke, tondũ ngũmwĩra atĩrĩ, aingĩ nĩ makaageria gũtonya, no matikaahota. 25 Rĩrĩa mwene nyũmba agookĩra ahinge, inyuĩ mũkaarũgama nja mũkĩringaringa mũrango, mũkiugaga, ‘Mwathani, tũhingũrĩre.’ No we akaamũcokeria amwĩre atĩrĩ: ‘Niĩ ndiũĩ kũrĩa muumĩte.’ 26 Hĩndĩ ĩyo nĩrĩo mũkaambĩrĩria kuuga, ‘Twarĩaga na tũkanyua hamwe nawe, na nĩ warutanaga barabara-inĩ iria nene cia gwitũ.’ 27 No we nĩ akamwĩra atĩrĩ, ‘Niĩ ndiũĩ kũrĩa muumĩte. Njehererai inyuothe mwĩkaga maũndũ matarĩ ma ũthingu!’ 28 Kũu nĩkuo mũkaarĩragĩra na mũkahagarania magego, rĩrĩa mũkoona Iburahimu, Isaaka, Jakubu, na anabii othe Ũthamaki-inĩ wa Ngai, no inyuĩ ene mũikĩtio nja. 29 Ningĩ, andũ nĩ magooka kuuma mwena wa irathĩro na ithũĩro na wa rũgongo na mũhuro, na maikare thĩ metha-inĩ thĩinĩ wa Ũthamaki wa Ngai. 30 Na rĩrĩ, nĩ harĩ a thutha magaatuĩka a mbere, na nĩ harĩ a mbere magaatuĩka a thutha.”
31 Ithaa-inĩ o rĩu, Afarisai amwe magĩthiĩ harĩ we makĩmwĩra atĩrĩ: “Uma gũkũ wĩthiĩre, tondũ Herode nĩ arenda gũkũũraga.” 32 Nake akĩmeera: “Thiĩi mwĩre mbwe ĩyo atĩrĩ, ‘Ngũingata ndaimono na honie andũ ũmũthĩ na rũciũ, na mũthenya wa gatatũ ngorũo ndĩkĩtie.’ 33 O na kũrĩ ũguo, no mũhaka thiĩ na mbere ũmũthĩ na rũciũ na mũthenya ũcio ũngĩ, tondũ gũtingĩtuĩka atĩ mũnabii nĩ agĩrĩirũo kũũragĩrũo nja ya Jerusalemu. 34 Jerusalemu, Jerusalemu, wee ũragaga anabii na ũkahũũra na mahiga arĩa matũmagwo kũrĩ wee—nĩ maita maigana ndanenda gũcokanĩrĩria ciana ciaku o ta ũrĩa ngũkũ ĩcokanagĩrĩria tũcui twayo rungu rwa mathagu mayo! No wee ndwendire ũndũ ũcio. 35 Atĩrĩrĩ, nyũmba yanyu nĩ ĩtiganĩirio. Ngũmwĩra atĩrĩ, mũtigacoka kũnyona o nginya rĩrĩa mũkoiga: ‘Kũrathimwo nĩ ũrĩa ũroka na rĩĩtwa rĩa Jehova!’”*