Atũmwo
14 Na rĩrĩ, marĩ kũu Ikonio magĩtonya thunagogi-inĩ ya Ayahudi marĩ erĩ na makĩaria na njĩra njega mũno nginya kĩrĩndĩ kĩnene kĩa Ayahudi na Angiriki gĩgĩtĩkia. 2 No Ayahudi arĩa matetĩkirie, magĩcogera na magĩthũkia meciria ma andũ a ndũrĩrĩ nĩguo mokĩrĩre ariũ a Ithe witũ. 3 Nĩ ũndũ ũcio makĩhũthĩra ihinda kũu makĩaria na ũcamba maheetwo hinya nĩ Jehova,* o we warutĩte ũira wĩgiĩ kiugo gĩa ũtugi wake mũnene, akĩmahe hinya wa gwĩka maũndũ ma magegania na kũringa ciama. 4 No rĩrĩ, andũ a itũũra rĩu nĩ maagayũkanĩte; amwe maarĩ mwena wa Ayahudi no arĩa angĩ maarĩ mwena wa atũmwo. 5 Hĩndĩ ĩrĩa andũ a ndũrĩrĩ na Ayahudi hamwe na atongoria ao maageririe kũmeeka maũndũ ma kũmaagĩra gĩtĩo na kũmahũũra na mahiga, 6 nĩ maamenyithirio ũhoro ũcio na makĩũrĩra matũũra ma Lukaonia, Lusitera, Deribe, na bũrũri ũrĩa warigicĩirie. 7 Na marĩ kũu magĩthiĩ na mbere kũhunjia ũhoro ũrĩa mwega.
8 Na rĩrĩ, kũu Lusitera nĩ kwarĩ mũndũ waciarĩtwo arĩ muonju magũrũ na ndoimĩte etwarĩte. 9 Mũndũ ũcio aaikarĩte thĩ agĩthikĩrĩria Paulo akĩaria. Nake Paulo akĩmũrora wega, na rĩrĩa onire atĩ aarĩ na wĩtĩkio wa gũtũma ahonio, 10 akĩmwĩra anĩrĩire atĩrĩ: “Rũgama na magũrũ maku.” Mũndũ ũcio akĩrũga na igũrũ na akĩambĩrĩria gwĩtwara. 11 Rĩrĩa kĩrĩndĩ kĩonire ũrĩa Paulo eka, gĩkĩanĩrĩra na rũthiomi rwa Lukaonia gĩkiuga atĩrĩ: “Ngai nĩ ituĩkĩte o ta andũ na igaikũrũka kũrĩ ithuĩ!” 12 Makĩambĩrĩria gwĩta Baranaba Zeu, no Paulo makĩmwĩta Herime tondũ nĩwe waaragia kaingĩ. 13 Hekarũ ya Zeu yarĩ njĩra-inĩ ya gũtonya itũũra-inĩ rĩu, nake mũthĩnjĩri ngai ya Zeu, akĩrehe ndegwa na thũmbĩ cia mahũa ihingo-inĩ nĩguo arute magongona hamwe na kĩrĩndĩ.
14 No rĩrĩa atũmwo acio Baranaba na Paulo maaiguire ũguo, magĩtembũranga nguo ciao, magĩtengʼera kĩrĩndĩ-inĩ na makĩanĩrĩra makiuga: 15 “Andũ aya, mũreka maũndũ maya nĩkĩ? O na ithuĩ tũrĩ andũ o ta inyuĩ. Na tũramũhunjĩria ũhoro ũrĩa mwega nĩguo mũtigane na maũndũ maya ma tũhũ mũthathayagie Ngai ũrĩa ũrĩ muoyo, o we wombire igũrũ na thĩ na iria na indo iria ciothe irĩ thĩinĩ wacio. 16 Mahinda-inĩ marĩa mahĩtũku nĩ eetĩkĩrĩtie ndũrĩrĩ ciothe irũmĩrĩre mĩthiĩre yacio, 17 o na gũtuĩka nĩ eerutagĩra ũira kũgerera maũndũ mega marĩa eekaga, akamũhe mbura kuuma igũrũ na imera irĩ na maciaro, akamũhũnia na irio na akaiyũria ngoro cianyu gĩkeno.” 18 No rĩrĩ, o na moigĩte maũndũ macio, ndwarĩ ũndũ mũhũthũ kũgiria kĩrĩndĩ kĩu kũmarutĩra magongona.
19 No Ayahudi magĩkinya kuuma Antiokia na Ikonio na makĩiguithia kĩrĩndĩ, makĩhũũra Paulo na mahiga na makĩmũkururia makĩmũtwara nja ya itũũra rĩu magĩĩcirĩria atĩ aarĩ mũkuũ. 20 No rĩrĩa arutwo maamũthiũrũrũkĩirie, agĩũkĩra na agĩtonya itũũra-inĩ. Mũthenya ũrĩa warũmĩrĩire makiuma kũu marĩ na Baranaba magĩthiĩ Deribe. 21 Thutha wa kũhunjia ũhoro ũrĩa mwega itũũra-inĩ rĩu na gũtua andũ maigana ũna arutwo, magĩcoka Lusitera, Ikonio, na Antiokia. 22 Magĩkĩra arutwo hinya, na makĩmomĩrĩria maikare marĩ na wĩtĩkio makĩmeera: “No mũhaka tũcemanie na magerio maingĩ nĩguo tũingĩre Ũthamaki-inĩ wa Ngai.” 23 Ningĩ makĩamũra athuri nĩ ũndũ wao harĩ o kĩũngano, makĩhoya na makĩĩhinga, na makĩmaneana kũrĩ Jehova,* o we maakoretwo meetĩkia.
24 Magĩcoka makĩgerera Pisidia magĩthiĩ Pamfulia, 25 na thutha wa kũhunjia Kiugo kĩa Ngai Periga, magĩikũrũka magĩthiĩ Atalia. 26 Kuuma kũu magĩthiĩ Antiokia na meri, kũrĩa mbere ĩyo maahoeirũo nĩguo maheo ũtugi wa Ngai nĩ ũndũ wa wĩra ũcio maakoretwo marĩkia.
27 Rĩrĩa maakinyire na magĩcokanĩrĩria kĩũngano, makĩmeera maũndũ maingĩ marĩa Ngai eekĩte kũgerera harĩ o, na atĩ nĩ aahingũrĩire andũ a ndũrĩrĩ mũrango wa kũgĩa na wĩtĩkio. 28 Nĩ ũndũ ũcio magĩikara hamwe na arutwo kwa ihinda.