Atũmwo
24 Thikũ ithano thutha ũcio, Anania mũthĩnjĩri-Ngai ũrĩa mũnene magĩthiĩ na athuri amwe, na wakiri wetagwo Teritulo, magĩthitanga Paulo harĩ ngavana. 2 Rĩrĩa eetirũo, Teritulo akĩambĩrĩria kũmũthitanga, na akiuga ũũ:
“Nĩ tũkeneire thayũ mũnene nĩ ũndũ waku na tũkona mogarũrũku marĩa ũreka na ũũgĩ waku bũrũri-inĩ ũyũ, 3 ningĩ hĩndĩ ciothe na kũndũ guothe nĩ tuonaga maũndũ macio, na nĩ tũcokagia ngatho mũno, wee Mũgaathe Felike. 4 No nĩ getha ndigakũige mũno, ndagũthaitha ũtũthikĩrĩrie tũkĩaria na njĩra nguhĩ nĩ ũndũ wa ũtugi waku. 5 Nĩ gũkorũo nĩ tuonete mũndũ ũyũ arĩ gĩtango kĩnene, nĩ ũndũ wa gũcogera Ayahudi othe thĩinĩ wa thĩ maregane na thirikari, na nĩ we mũtongoria wa gĩkundi kĩa nyamũkano kĩrĩa kĩa Anazarini. 6 O na nĩ aageretie gũthahia hekarũ, na kwoguo tũkĩmũnyita. 7 *—— 8 Wee mwene wamũthuthuria nĩ ũkũmenya maũndũ macio mothe tũramũthitangĩra.”
9 Oiga ũguo Ayahudi o nao makĩingĩrĩra makĩambĩrĩria kũmũthitanga, makiugaga atĩ maũndũ macio maarĩ ma ma. 10 Rĩrĩa ngavana aaheneirie Paulo aarie, Paulo akiuga atĩrĩ:
“Nĩ ũndũ wa kũmenya atĩ ũkoretwo ũrĩ mũcirithania thĩinĩ wa bũrũri ũyũ mĩaka mĩingĩ, ngwĩyarĩrĩria itegwĩtigĩra. 11 O na wee mwene ũngĩtuĩria, thikũ ikũmi na igĩrĩ ti thiru kuuma rĩrĩa ndaambatire Jerusalemu gũthathaiya; 12 na matiangorire ngĩkararania na mũndũ hekarũ-inĩ, kana ngĩcogera kĩrĩndĩ thunagogi-inĩ o na kana itũũra-inĩ rĩu rĩothe. 13 O na matingĩhota kuonania ũũma wa maũndũ marĩa marathitangĩra. 14 No nĩ ndĩretĩkĩra atĩ ndũũraga kũringana na njĩra ĩyo mareta gĩkundi kĩa nyamũkano, ũguo nĩguo ndutagĩra Ngai wa maithe maitũ ma tene ũtungata mũtheru, na nĩ njĩtĩkĩtie maũndũ mothe marĩa mandĩkĩtwo Watho-inĩ, na mabuku-inĩ ma Anabii. 15 Na ndĩ na kĩĩrĩgĩrĩro harĩ Ngai, kĩĩrĩgĩrĩro kĩrĩa andũ aya o nao makoragwo nakĩo, atĩ nĩ gũkaariũkio andũ arĩa athingu na arĩa matarĩ athingu. 16 Nĩ ũndũ ũcio, hingo ciothe ndĩĩrutanagĩria gũtũũria thamiri theru* mbere ya Ngai o na andũ. 17 Na rĩrĩ, thutha wa mĩaka mĩingĩ, ndĩrokĩte kũrehere andũ a rũrĩrĩ rwitũ iheo cia tha na kũruta magongona. 18 Hĩndĩ ĩrĩa ndĩrekaga maũndũ macio, marangora thĩinĩ wa hekarũ ndĩĩtheretie kũringana na Watho, na hatirarĩ na kĩrĩndĩ o na kana ngũĩ. No hararĩ na Ayahudi amwe a kuuma mwena wa Asia 19 na magĩrĩirũo gũkorũo haha mbere yaku maathitange angĩkorũo harĩ ũndũ mangĩthitangĩra. 20 Kana andũ aya marĩ haha moige o ene ũndũ mũru ũrĩa maranyonire naguo rĩrĩa ndĩrarĩ mbere ya Sanhedrini,* 21 tiga o ũndũ ũyũ ũmwe ndaanĩrĩire ndĩ gatagatĩ-inĩ kao ngiuga: ‘Ndĩracirithio nĩ ũndũ wa kĩĩrĩgĩrĩro gĩa kũriũkio kwa arĩa akuũ!’”
22 No Felike, nĩ ũndũ wa kũmenya wega ũhoro wĩgiĩ Njĩra ĩyo, agĩtĩĩria cira na akĩmeera ũũ: “Hĩndĩ ĩrĩa Lusia ũrĩa mũnene wa mbũtũ agooka, nĩrĩo ngaatua cira ũyũ waku.” 23 Agĩcoka agĩatha mũnene wa thigari atĩ mũndũ ũcio aikare arĩ muohe, no aheo wĩyathi mũnini, na andũ ao metĩkĩrio mamũtungatĩre.
24 Thikũ cigana ũna thutha ũcio, Felike agĩũka marĩ hamwe na mũtumia wake Dirusila ũrĩa warĩ Mũyahudi, agĩtũmanĩra Paulo na akĩmũthikĩrĩria akĩaria ũhoro wĩgiĩ wĩtĩkio harĩ Kristo Jesu. 25 No rĩrĩa Paulo aaragia ũhoro wĩgiĩ ũthingu, kwĩgirĩrĩria, na ituĩro rĩrĩa rĩarĩ rĩũke, Felike agĩtigĩra na akĩmwĩra ũũ: “Amba ũthiĩ, nĩ ngaagũtũmanĩra rĩngĩ ndagĩa na mweke.” 26 Ningĩ nĩ eerĩgagĩrĩra atĩ Paulo nĩ angĩamũheire mbeca. Nĩ ũndũ ũcio nĩ aamũtũmanagĩra maita maingĩ makaaria nake. 27 No mĩaka ĩĩrĩ yathira, Porikio Fesito agĩcoka ithenya rĩa Felike; na tondũ Felike nĩ eendaga gũkenia Ayahudi, agĩtiga Paulo njera.