Aroma
11 Nĩ ũndũ ũcio-rĩ, ngũũria atĩrĩ, Hihi Ngai nĩ kũrega aaregire andũ ake? Aca, tiguo kũrĩ! Nĩ gũkorũo o na niĩ ndĩ Mũisiraeli, wa rũciaro rwa Iburahimu, kuuma mũhĩrĩga-inĩ wa Benjamini. 2 Ngai ti kũrega aaregire andũ ake arĩa aamenyete mbere. Kaĩ mũtoĩ ũrĩa rĩandĩko riugaga ũhoro-inĩ wĩgiĩ Elija rĩrĩa aathaithaga Ngai nĩ ũndũ wa Isiraeli? 3 “Jehova,* nĩ moragĩte anabii aku, magathũkangia igongona ciaku, niĩ no niĩ mũtige, na rĩu marageria kũnjũraga.” 4 No rĩrĩ, Ngai aamũcokeirie atĩa? “Nĩ ndĩtigĩirie arũme ngiri mũgwanja mataturĩirie Baali maru.” 5 Na njĩra o ta ĩyo, mahinda-inĩ maya nĩ kũrĩ na matigari ma arĩa maathurirũo nĩ ũndũ wa ũtugi mũnene wa Ngai. 6 Angĩkorũo mathurĩtwo kũgerera ũtugi mũnene-rĩ, matithurĩtwo nĩ ũndũ wa ciĩko; tondũ kũngĩkorũo nĩguo, ũtugi ũcio mũnene ndũngĩtuĩka ũtugi mũnene rĩngĩ.
7 Tũkiuge atĩa rĩu? Kĩndũ kĩrĩa Isiraeli maacaragia na kĩyo matiakĩonire, no arĩa mathuurĩtwo nĩ maakĩonire. Acio angĩ nĩ moomirie ngoro ciao, 8 o ta ũrĩa kwandĩkĩtwo atĩrĩ: “Ngai nĩ amaheete toro mũnene wa kĩĩroho, akamahe maitho matonaga na matũ mataiguaga, o nginya ũmũthĩ ũyũ.” 9 Ningĩ Daudi oigĩte ũũ: “Metha yao nĩ ĩtuĩke mũtego o na kĩndũ gĩa kũmahĩngithia na kũmaherithia. 10 Maitho mao nĩ magĩe nduma nĩguo matikone, nao maikarage mainamĩrĩire hingo ciothe.”
11 Nĩ ũndũ ũcio ngũũria atĩrĩ, Hihi ũguo nĩ kuuga atĩ maahĩngirũo na makĩgwa biũ? Aca, tiguo kũrĩ! No tondũ nĩ mooinire watho na andũ a ndũrĩrĩ nĩ marahonokio, ũndũ ũcio nĩ ũratũma maigue ũiru. 12 Angĩkorũo uuni ũcio wao wa watho ũrarehe ũtonga harĩ thĩ na kũnyiha kwao kũratũma andũ a ndũrĩrĩ matonge-rĩ, githĩ gũtigaagĩkorũo na ũtonga mũnene makĩria rĩrĩa mũigana wao ũgaakinyanĩra!
13 Rĩu ndĩraaria na inyuĩ andũ a ndũrĩrĩ. Tondũ ndĩ mũtũmwo kũrĩ andũ a ndũrĩrĩ, nĩ heete ũtungata wakwa gĩtĩo 14 nĩguo nyone kana hihi ndahota gũtũma andũ aitũ maigue ũiru nĩ getha amwe ao mahonokio. 15 Tondũ angĩkorũo kũregwo kwao kũratũma thĩ ĩiguithanio na Ngai-rĩ, na githĩ gwĩtĩkĩrũo kwao gũtigaagĩtũma macokio muoyo kuuma kũrĩ arĩa akuũ? 16 Ningĩ-rĩ, angĩkorũo gĩcunjĩ gĩa kĩmere kĩrĩa kĩrutĩtwo kĩrĩ maciaro ma mbere nĩ gĩtheru, kĩmere gĩothe o nakĩo nĩ gĩtheru; na angĩkorũo mũri nĩ mũtheru, honge o nacio nĩ theru.
17 No rĩrĩ, angĩkorũo honge imwe nĩ ciatemirũo, na inyuĩ o na mũrĩ mũtamaiyũ wa gĩthaka mũgĩciarithanio mũtĩ-inĩ ũcio na mũgĩtuĩka a kũgunĩkaga nĩ ũtonga wa mũri waguo-rĩ, 18 mũtigetĩĩre honge icio. Mũngĩciĩtĩĩra, mũririkane atĩ ti inyuĩ mũnyitĩrĩire mũri no nĩ mũri ũmũnyitĩrĩire inyuĩ. 19 Nawe ugage atĩrĩ: “Honge ciatemirũo nĩguo niĩ njiarithanio ho.” 20 Ũguo nĩguo kũrĩ. Ciatemirũo nĩ ũndũ wa kwaga wĩtĩkio, no wee ũrĩ o mũtĩ-inĩ nĩ ũndũ wa gũkorũo na wĩtĩkio. Ndũgetĩe, no wĩtigagĩre. 21 Tondũ angĩkorũo Ngai ndaarekire honge icio cia ndũire cikare, o nawe ndangĩreka ũikare. 22 Nĩ ũndũ ũcio-rĩ, wĩciragie ũhoro wa ũtugi wa Ngai o na iherithia rĩake. Nĩ aherithagia arĩa maagũire, no wee ũngĩtũũra ũtugi-inĩ wake nĩ arĩkuonagia ũtugi; kwaga ũguo, o nawe nĩ ũgaatemwo. 23 Nao mangĩambĩrĩria gũkorũo na wĩtĩkio, no maciarithanio ho, nĩ gũkorũo Ngai no ahote kũmaciarithania macoke mũtĩ-inĩ. 24 Tondũ rĩrĩ, angĩkorũo wee watemirũo kuuma mũtamaiyũ-inĩ wa gĩthaka na ũgĩciarithianio mũtamaiyũ-inĩ wa mũgũnda, na ũndũ ũcio ti wa ndũire-rĩ, na githĩ honge icio cia ndũire itingĩgĩciarithanio o na makĩria icokio mũtamaiyũ-inĩ wacio!
25 Ariũ a Ithe witũ, ndirenda mwage kũmenya ũhoro wa hitho ĩno ya Ngai, nĩguo mũtigatuĩke ogĩ maitho-inĩ manyu ene: Andũ amwe thĩinĩ wa Isiraeli nĩ momĩtie ngoro, nginya mũigana mũkinyanĩru wa andũ a ndũrĩrĩ ũgaakorũo ũcokanĩrĩirio, 26 na njĩra ĩyo, Isiraeli othe nĩ makaahonokio. O ta ũrĩa kwandĩkĩtwo atĩrĩ: “Mũkũũri* nĩ akoima Zayuni na atũme njiarũa cia Jakubu itigane na maũndũ ma kwagĩra Ngai gĩtĩo. 27 Na kĩu nĩkĩo gĩgaakorũo kĩrĩ kĩrĩkanĩro gĩakwa hamwe nao, hĩndĩ ĩrĩa ngeheria mehia mao.” 28 Nĩ ma, ha ũhoro ũrĩa mwega, acio nĩ thũ cia Ngai, na ũndũ ũcio ũgatũma inyuĩ mũgunĩke; no ũhoro-inĩ wĩgiĩ gũthuura kwa Ngai, nĩ mendetwo nĩwe nĩ ũndũ wa kĩĩranĩro kĩrĩa kĩaheirũo maithe mao ma tene. 29 Nĩ gũkorũo Ngai ndakeerira nĩ ũndũ wa kũheana iheo kana nĩ ũndũ wa arĩa eetire. 30 Tondũ o ta ũrĩa hĩndĩ ĩmwe mũtaathĩkagĩra Ngai no rĩu nĩ muonetio tha nĩ ũndũ wao kwaga gwathĩka, 31 ũguo no taguo rĩu acio matigĩte gwathĩka na kwoguo inyuĩ mũkonio tha, nĩguo o nao rĩu monio tha. 32 Nĩ gũkorũo Ngai nĩ atũmĩte andũ othe matuĩke ngombo cia kwaga gwathĩka nĩguo amonie tha othe.
33 Kaĩ ũtonga wa Ngai nĩ mũnene-ĩ, o na ũmenyo na ũũgĩ wake-ĩ! Matuĩro make o na njĩra ciake gũtirĩ mũndũ ũngĩhota gũtaũkĩrũo nĩcio. 34 Tondũ rĩrĩ, “nũ ũngĩmenya meciria ma Jehova,* kana nũ ũngĩmũtaara?” 35 Kana rĩrĩ, “nũ wanamũhe kĩndũ, atĩ nĩguo akĩmũrĩhe?” 36 Nĩ gũkorũo indo ciothe ciumaga kũrĩ we na nĩwe ũtũmaga ikorũo kuo na ikoragwo kuo nĩ ũndũ wake. Arogoocagwo tene na tene. Ameni.