Aroma
14 Amũkagĩrai mũndũ ũrĩa ũtarĩ na wĩtĩkio mũrũmu, na mũtigatuagĩre mũndũ nĩ ũndũ wa gũkorũo na mawoni ngũrani. 2 Kũrĩ mũndũ wĩtĩkio wake ũmwĩtĩkagĩria kũrĩa indo ciothe, no mũndũ ũkoragwo na wĩtĩkio ũtarĩ mũrũmu arĩaga o nyeni. 3 Mũndũ ũrĩa ũrĩaga mĩthemba yothe ya irio ndakanyarare ũrĩa ũtarĩaga, nake ũrĩa ũtarĩaga mĩthemba yothe ya irio ndagatuĩre ũrĩa ũrĩaga, nĩ gũkorũo Ngai nĩ amũnyitĩte ũgeni. 4 Wee ũrĩ ũ nĩguo ũtuĩre ndungata ya mũndũ ũngĩ? Mwathi wayo nĩwe ũngĩmenya rĩrĩa ĩrũgamĩte kana rĩrĩa ĩgũĩte. Hatarĩ nganja nĩ ĩkaarũgama nĩ gũkorũo Jehova* no ahote kũmĩrũgamia.
5 Mũndũ ũmwe onaga mũthenya ũmwe ũrĩ wa bata gũkĩra ĩrĩa ĩngĩ; nake ũngĩ akona mĩthenya yothe ĩrĩ ũndũ ũmwe; o mũndũ nĩ agĩe na ũũma wĩgiĩ ũrĩa etĩkĩtie. 6 Mũndũ ũrĩa wonaga mũthenya mũna ũrĩ wa bata awonaga ũguo nĩ ũndũ wa Jehova.* Ningĩ, ũrĩa ũrĩaga mĩthemba yothe ya irio, arĩaga nĩ ũndũ wa Jehova,* tondũ acokagĩria Ngai ngatho; nake ũrĩa ũtarĩaga mĩthemba yothe ya irio agaga gwĩka ũguo nĩ ũndũ wa Jehova,* na no acokagĩria Ngai ngatho. 7 Gũtirĩ mũndũ o na ũmwe witũ ũtũũraga no ũndũ wake mwene, na gũtirĩ mũndũ ũkuaga no ũndũ wake mwene. 8 Nĩ gũkorũo twatũũra, tũtũũraga nĩ ũndũ wa Jehova,* na tũngĩkua tũkuaga nĩ ũndũ wa Jehova.* Kwoguo-rĩ, o na tũngĩtũũra kana tũkue, tũrĩ a Jehova.* 9 Na nokĩo gĩatũmire Kristo akue na ariũkio, nĩguo atuĩke Mwathani wa arĩa makuĩte na arĩa marĩ muoyo.
10 No nĩ kĩĩ kĩngĩtũma ũtuĩre mũrũ wa Ithe wanyu? Kana nĩ kĩĩ kĩngĩtũma ningĩ ũnyarare mũrũ wa Ithe wanyu? Nĩ gũkorũo ithuothe tũkaarũgama mbere ya gĩtĩ gĩa cira kĩa Ngai. 11 Tondũ nĩ kwandĩke atĩrĩ: “Jehova* oigĩte ũũ: ‘O ta ũrĩa niĩ ndũũraga muoyo, mũndũ o wothe nĩ agaaturia maru mbere yakwa, na andũ othe nĩ makoimbũra atĩ niĩ nĩ niĩ Ngai.’” 12 Kwoguo-rĩ, Ngai nĩwe ũgaatuĩra o ũmwe witũ kũringana na ciĩko ciake.
13 Nĩ ũndũ ũcio-rĩ, tũtigacoke gũtuĩra andũ arĩa angĩ, no twĩrutanĩrie kwaga kũigĩra mũrũ wa Ithe witũ mũhĩnga kana ũndũ ũngĩtũma agwe. 14 Niĩ nĩ njũĩ na nĩ njĩtĩkĩtie thĩinĩ wa Mwathani Jesu atĩ gũtirĩ kĩndũ gĩtarĩ gĩtheru kĩo kĩene; no hĩndĩ ĩrĩa mũndũ atua atĩ kĩndũ ti gĩtheru, harĩ we ti gĩtheru. 15 Nĩ ũndũ angĩkorũo mũrũ wa Ithe wanyu nĩ arahĩngwo tondũ wa irio iria ũrarĩa-rĩ, wee nĩ ũtigĩte gũthiĩ na njĩra ya wendo. Kristo nĩ aamũkuĩrĩire, kwoguo ndũgathũkie wĩtĩkio wake nĩ ũndũ wa irio iria ũrarĩa. 16 Nĩ ũndũ ũcio-rĩ, mũtigekage maũndũ marĩa inyuĩ mũngĩciria nĩ mega ĩndĩ matũme andũ maarie ũũru igũrũ rĩanyu. 17 Nĩ gũkorũo Ũthamaki wa Ngai ndũkoniĩ kũrĩa na kũnyua, no ũkoniĩ ũthingu na thayũ na gĩkeno tũrĩ na roho mũtheru. 18 Tondũ mũndũ o wothe ũkoragwo arĩ ngombo ya Kristo na njĩra ĩyo nĩ etĩkagĩrũo nĩ Ngai na agatĩo nĩ andũ.
19 Nĩ ũndũ ũcio-rĩ, nĩ tũthingatagei maũndũ marĩa mangĩrehe thayũ na marĩa mangĩtũma twĩkĩranage hinya. 20 Tigai gũtharũria wĩra wa Ngai no ũndũ tu wa irio. Nĩ ma, indo ciothe nĩ theru, no nĩ ũũru mũndũ kũrĩa kĩndũ gĩkũhĩngithia mũndũ ũrĩa ũngĩ. 21 Nĩ kaba kwaga kũrĩa nyama kana kũnyua ndibei kana gwĩka ũndũ ũngĩ o wothe ũrĩa ũngĩhĩngithia mũrũ wa Ithe wanyu. 22 Wĩtĩkio ũrĩa ũrĩ naguo, nĩ ũhoro waku mwene hamwe na Ngai. Gũkena-rĩ, nĩ mũndũ ũrĩa ũtetuagĩra kuumana na ũrĩa ekaga. 23 No angĩkorũo na nganja acoke arĩe nĩ arĩkĩtie gũtuĩrũo, tondũ kũrĩa gwake gũtiumanĩte na wĩtĩkio. Ũndũ o wothe ũtoimanĩte na wĩtĩkio nĩ mehia.