Aroma

7 Ariũ a Ithe witũ, hihi no gũkorũo mũtiũĩ (tondũ ndĩraarĩria andũ moĩ watho) atĩ Watho ũtũũraga wathaga mũndũ rĩrĩa rĩothe arĩ muoyo? 2 Ta rĩu-rĩ, mũtumia mũhiku akoragwo ohetwo nĩ watho rĩrĩa rĩothe mũthuri wake arĩ muoyo; no mũthuri wake angĩkua, ndakoragwo arĩ muohe nĩ watho ũcio wa mũthuri wake. 3 Gũkĩrĩ ũguo-rĩ, mũtumia ũcio angĩtuĩka wa mũthuri ũngĩ mũthuri wake arĩ muoyo, angĩkorũo arĩ mũtharia. No mũthuri wake angĩkua, mũtumia ũcio nĩ muohore kuuma watho-inĩ ũcio, kwoguo ndangĩkorũo arĩ mũtharia angĩhikio nĩ mũthuri ũngĩ.

4 Nĩ ũndũ ũcio ariũ a Ithe witũ-rĩ, o na inyuĩ nĩ mwakuire ũhoro-inĩ wa Watho kũgerera mwĩrĩ wa Kristo, nĩ getha mũtuĩke a mũndũ ũngĩ, ũrĩa wariũkirio kuuma kũrĩ arĩa akuũ, nĩguo tũciarage maciaro ma kũgoocithia Ngai. 5 Nĩ gũkorũo hĩndĩ ĩrĩa twatũũraga kũringana na merirĩria ma mwĩrĩ, merirĩria ma mehia marĩa maaguũririo nĩ Watho nĩ maarutaga wĩra mĩĩrĩ-inĩ* itũ, magaciaraga maciaro ma gĩkuũ. 6 No rĩu nĩ tuohoretwo kuuma Watho-inĩ, tondũ nĩ tũkuĩte ũndũ-inĩ ũrĩa watuohete, nĩguo tũkorũo tũrĩ ngombo na njĩra ĩngĩ kũgerera roho no ti na njĩra ĩrĩa ya tene ya watho ũrĩa mwandĩke.

7 Nĩ ũndũ ũcio-rĩ, tũkiuge atĩa? Hihi Watho nĩ mehia? Aca o na hanini! Tiga nĩ Watho ndingĩamenyire mehia. Kwa ngerekano-rĩ, ndingĩamenyire gũcumĩkĩra nĩ kũũru korũo Watho ndwoigĩte: “Ndũkanacumĩkĩre indo ciene.” 8 No nĩ ũndũ wa mweke ũrĩa woimĩririo nĩ watho, mehia nĩ maatũmire ngĩe na mĩthemba yothe ya gũcumĩkĩra thĩinĩ wakwa, tondũ watho ũtanoka mehia maarĩ makuũ. 9 Ma nĩ atĩ, nĩ harĩ hĩndĩ ndaarĩ muoyo watho ũtanoka. No rĩrĩa watho wokire, mehia magĩcoka muoyo, ĩndĩ niĩ ngĩkua. 10 Na watho ũrĩa warĩ ũndeithie ndũũre muoyo, ngĩona ũrarehe gĩkuũ. 11 Nĩ gũkorũo mehia, nĩ ũndũ wa mweke ũrĩa warehirũo nĩ watho, nĩ maahĩtithirie na makĩnjũraga kũgerera watho ũcio. 12 Kwoguo Watho wa Musa guo mwene nĩ mũtheru, namo maũndũ marĩa marĩ thĩinĩ waguo nĩ matheru na nĩ mathingu na mega.

13 Hakĩrĩ ũguo-rĩ, hihi maũndũ marĩa mega maarehire gĩkuũ harĩ niĩ? Aca o na hanini! No mehia nĩmo maarehire gĩkuũ harĩ niĩ kũgerera maũndũ marĩa mega nĩguo mehia mamenyeke ũrĩa matariĩ. Naguo watho nĩ ũguũrĩtie atĩ mehia nĩ moru mũno. 14 Tondũ nĩ tũĩ atĩ Watho uumĩte kũrĩ Ngai, ĩndĩ niĩ nyumanĩte na mwĩrĩ, ngendio mehia-inĩ. 15 Nĩ gũkorũo nditaũkagĩrũo nĩ maũndũ marĩa njĩkaga. Tondũ ndiĩkaga maũndũ marĩa nyendaga, no njĩkaga marĩa thũire. 16 No rĩrĩ, angĩkorũo njĩkaga maũndũ marĩa itarenda-rĩ, nĩ ndĩretĩkĩra atĩ Watho nĩ mwega. 17 No rĩu ti niĩ ndĩmekaga, ĩndĩ nĩ mehia marĩa marĩ thĩinĩ wakwa. 18 Tondũ nĩ njũĩ atĩ thĩinĩ wakwa, ũguo nĩ kuuga thĩinĩ wa mwĩrĩ wakwa, gũtirĩ ũndũ o na ũmwe mwega; nĩ gũkorũo nĩ ndĩriragĩria gwĩka ũndũ ũrĩa wagĩrĩire no ndikoragwo na ũhoti wa kũwĩka. 19 Tondũ ndiĩkaga ũndũ ũrĩa mwega nyendaga gwĩka, no njĩkaga ũndũ ũrĩa mũru itendaga gwĩka. 20 Nĩ ũndũ ũcio, angĩkorũo njĩkaga ũndũ ũrĩa itendaga gwĩka-rĩ, ti niĩ ngoragwo ngĩwĩka, ĩndĩ nĩ mehia marĩa makoragwo thĩinĩ wakwa.

21 Gũkĩrĩ ũguo-rĩ, nyonaga watho ũyũ thĩinĩ wakwa: Rĩrĩa ndĩrenda gwĩka ũndũ ũrĩa mwega, ũndũ ũrĩa mũru ũkoragwo hamwe na niĩ. 22 Ngoro-inĩ yakwa nĩ ngenagĩra mũno watho wa Ngai, 23 no nĩ nyonaga watho ũngĩ thĩinĩ wa mwĩrĩ* wakwa ũkĩrũa na watho wa meciria makwa na ũkandua ngombo ya watho wa mehia ũrĩa ũrĩ thĩinĩ wa mwĩrĩ* wakwa. 24 Kaĩ ndĩ na thĩna-ĩ! Nũ ũkũhonokia kuuma harĩ mwĩrĩ ũyũ ũrehaga gĩkuũ? 25 Ndĩracokeria Ngai ngatho kũgerera harĩ Jesu Kristo Mwathani witũ! Nĩ ũndũ ũcio-rĩ, meciria-inĩ makwa niĩ mwene ndĩ ngombo ya watho wa Ngai, ĩndĩ mwĩrĩ-inĩ wakwa ndĩ ngombo ya mehia.