2 Akorintho
2 Nĩ gũkorũo nĩ nduĩte atĩ ndigũka rĩngĩ kũrĩ inyuĩ ndĩmũiguithie kĩeha. 2 Tondũ ingĩmũiguithia kĩeha-rĩ, nũ ũngĩgĩkorũo atigarĩte wa gũtũma ngene tiga o arĩa njiguithĩtie kĩeha? 3 Ndamwandĩkĩire maũndũ macio nĩguo hĩndĩ ĩrĩa ngoka ndikanaiguithio kĩeha nĩ arĩa njagĩrĩirũo nĩ gũkena nĩo, nĩ gũkorũo ndĩ na ma atĩ kĩrĩa gĩtũmaga ngene nokĩo gĩtũmaga inyuothe mũkene. 4 Nĩ gũkorũo ndamwandĩkĩire ndĩ na mĩtangĩko mĩingĩ na ruo rwa ngoro na maithori, ti getha ndĩmũiguithie kĩeha, no nĩ getha mũmenye atĩ nĩ ndĩmwendete mũno.
5 Angĩkorũo nĩ harĩ mũndũ ũtũmĩte kũgĩe na kĩeha, ti niĩ aiguithĩtie kĩeha, no nĩ inyuĩ inyuothe aiguithĩtie kĩeha. Ũhoro-inĩ ũcio ndikwenda kuuga maũndũ maingĩ. 6 Iherithia rĩu andũ aingĩ maherithĩtie mũndũ wa mũthemba ũcio nĩ rĩiganu; 7 rĩu mwagĩrĩirũo kũmuohera na kũmũũmĩrĩria nĩguo ndagatoorio nĩ kĩeha kĩingĩ. 8 Nĩ ũndũ ũcio-rĩ, ndĩramwĩhoya mũmuonie atĩ nĩ mũmwendete. 9 Ningĩ ndamwandĩkĩire nĩguo menye kana nĩ mwathĩkaga maũndũ-inĩ mothe. 10 Mũngĩohera mũndũ ũndũ o na ũrĩkũ-rĩ, o na niĩ mũndũ ũcio nĩ ndamuohera. Atĩrĩrĩ, ũndũ o wothe ndanohanĩra (kũngĩkorũo nĩ kũrĩ ũndũ ndanohanĩra) ndawohanĩire nĩ ũndũ wanyu, na Kristo nĩ mũira, 11 nĩguo tũtikanahootwo nĩ Shaitani, tondũ tũtirigĩtwo nĩ mawara make.
12 Rĩu-rĩ, hĩndĩ ĩrĩa ndakinyire Teroa kũhunjia ũhoro ũrĩa mwega wĩgiĩ Kristo na ngĩhingũrĩrũo mũrango thĩinĩ wa Mwathani-rĩ, 13 nĩ ndagĩire na mĩtangĩko ngoro nĩ ũndũ wa kwaga gũkora mũrũ wa Ithe witũ Tito. Nĩ ũndũ ũcio ngiugĩra ariũ a Ithe witũ ũhoro, ngĩthiĩ Makedonia.
14 No rĩrĩ, tũracokeria Ngai ngatho, o we hingo ciothe ũtũtongoragia thĩinĩ wa ũhootani mũnene tũgwatanĩire na Kristo na akamemerekia mũtararĩko wa ũmenyo wake kũndũ guothe kũgerera ithuĩ! 15 Tondũ harĩ Ngai ithuĩ tũrĩ mũtararĩko mwega wa ũhoro wĩgiĩ Kristo gatagatĩ-inĩ ka arĩa marahonokio na gatagatĩ-inĩ ka arĩa maraniinwo; 16 harĩ acio maraniinwo, nĩ mũnungo wa gĩkuũ ũrĩa ũtongoragia gĩkuũ-inĩ, na harĩ acio marahonokio, nĩ mũtararĩko wa muoyo ũrĩa ũtongoragia muoyo-inĩ. Nũ mwagĩrĩru wa gwĩka maũndũ macio? 17 Ithuĩ tũrĩ agĩrĩru, tondũ tũtihũũraga biacara na kiugo kĩa Ngai ta ũrĩa andũ aingĩ mekaga, no twaragia ma biũ ta andũ matũmĩtwo nĩ Ngai, tũrĩ mbere ya Ngai na tũgwatanĩire na Kristo.