2 Athesalonike

3 Ngĩrĩkĩrĩria ariũ a Ithe witũ-rĩ, thiĩi na mbere gũtũhoyagĩra, nĩ getha kiugo kĩa Jehova* gĩthiĩ na mbere gũtherema na ihenya na gũtũũgĩrio, o ta ũrĩa gĩtariĩ harĩ inyuĩ, 2 na atĩ tũhonokio kuuma kũrĩ andũ oru na aganu, nĩ gũkorũo ti andũ othe makoragwo na wĩtĩkio. 3 No Mwathani nĩ mwĩhokeku, na nĩ ekũmwĩkĩra hinya na amũgitĩre kuumana na ũrĩa mũru. 4 Makĩria ma ũguo, tũrĩ na ma thĩinĩ wa Mwathani ũhoro-inĩ wanyu, atĩ nĩ mũrarũmĩrĩra na nĩ mũgũthiĩ na mbere kũrũmĩrĩra motaaro marĩa tũmũheete. 5 Mwathani arothiĩ na mbere gũtongoria ngoro cianyu nĩguo mwende Ngai na mũgĩe na ũkirĩrĩria nĩ ũndũ wa Kristo.

6 Rĩu ariũ a Ithe witũ tũramũtaara thĩinĩ wa rĩĩtwa rĩa Mwathani witũ Jesu Kristo, atĩ mũtigage gũthiĩ thiritũ na mũrũ wa Ithe witũ o wothe ũrathiĩ na mĩthiĩre ĩtarĩ mĩagĩrĩru na ũtarũmagĩrĩra maũndũ marĩa twamũrutire inyuĩ. 7 Nĩ gũkorũo inyuĩ ene nĩ mũĩ ũrĩa mwagĩrĩirũo nĩ kwĩgerekania na ithuĩ, tondũ rĩrĩa twarĩ gatagatĩ-inĩ kanyu tũtiathiaga na mĩthiĩre ĩtarĩ mĩagĩrĩru, 8 o na tũtiarĩaga irio cia mũndũ o na ũrĩkũ tũhũ. Ithenya rĩa ũguo, twerutanagĩria na tũkenogia tũkĩruta wĩra ũtukũ na mũthenya nĩ getha tũtigatuĩke mũrigo mũritũ harĩ mũndũ o na ũmwe wanyu. 9 Ti atĩ tũtirĩ na kĩhooto, ĩndĩ tweendaga kwĩrutĩra ithuĩ ene tũrĩ kĩonereria harĩ inyuĩ nĩguo mwĩgerekanagie na ithuĩ. 10 Rĩrĩa twarĩ hamwe na inyuĩ, nĩ twamũheaga watho ũyũ: “Mũndũ angĩkorũo ndarenda kũruta wĩra, o na kũrĩa ndakarĩe.” 11 Nĩ gũkorũo tũraigua atĩ harĩ amwe marathiĩ na mĩthiĩre ĩtarĩ mĩagĩrĩru gatagatĩ-inĩ kanyu, makaaga kũruta wĩra o na hanini, ĩndĩ meingĩragia maũndũ-inĩ matamakoniĩ. 12 Andũ ta acio-rĩ, tũramaatha na tũkamaringĩrĩria thĩinĩ wa Mwathani Jesu Kristo atĩ marutage wĩra mahooreire na marĩage irio iria o ene marutĩire wĩra.

13 No inyuĩ ariũ a Ithe witũ-rĩ, mũtikananogio nĩ gwĩkaga wega. 14 No mũndũ o na ũrĩkũ angĩaga gwathĩkĩra ciugo citũ iria irĩ marũa-inĩ maya, mwĩkĩrei rũũri na mũtige gũthiaga thiritũ nake, nĩ getha aconoke. 15 Ĩndĩ o na kũrĩ ũguo mũtikamũtue thũ, no thiĩi na mbere kũmũtaara o ta mũrũ wa Ithe witũ.

16 Rĩu-rĩ, Mwathani mwene thayũ aromũheaga thayũ hĩndĩ ciothe maũndũ-inĩ mothe. Mwathani aroikara hamwe na inyuĩ inyuothe.

17 Ici nĩ ngeithi ciakwa, niĩ Paulo, ndandĩka na guoko gwakwa mwene, na nĩ rũũri marũa-inĩ makwa mothe; ũguo nĩguo nyandĩkaga.

18 Ũtugi mũnene wa Mwathani witũ Jesu Kristo ũroikara hamwe na inyuĩ inyuothe.