2 Timotheo
2 Nĩ ũndũ ũcio mwana wakwa-rĩ, thiĩ na mbere kũgĩa na hinya kũgerera ũtugi mũnene ũrĩa ũrĩ thĩinĩ wa Kristo Jesu; 2 namo maũndũ marĩa waiguire kuuma kũrĩ niĩ, marĩa maanyitirũo mbaru nĩ aira aingĩ, ũmehokere arũme arĩa ehokeku, arĩa nao megũkorũo marĩ agĩrĩru biũ kũruta andũ arĩa angĩ. 3 Tondũ wee ũrĩ mũthigari mwega wa Kristo Jesu, ikaraga wĩhaarĩirie kũnyarirũo. 4 Gũtirĩ mũthigari wĩingĩragia biacara-inĩ cia ũtũũro, tondũ nĩ arenda gwĩtĩkĩrũo nĩ ũrĩa wamũtuire mũthigari. 5 O na mathaako-inĩ, gũtirĩ mũthaaki ũheagwo thũmbĩ o tiga arĩkirie kũringana na mawatho. 6 Mũrĩmi ũrĩa ũrĩ kĩyo no mũhaka akorũo arĩ wa mbere kũrĩa maciaro ma mũgũnda wake. 7 Wĩcũranagie na kinyi igũrũ rĩa maũndũ marĩa ndĩroiga; Mwathani nĩ arĩkũheaga ũtaũku maũndũ-inĩ mothe.
8 Ririkana atĩ Jesu Kristo nĩ aariũkirio kuuma kũrĩ arĩa akuũ, na aarĩ wa rũciaro rwa Daudi, kũringana na ũhoro ũrĩa mwega hunjagia, 9 o ũcio ndĩranyarirũo nĩ ũndũ waguo na ngohwo ta mwĩki-naĩ. O na kũrĩ ũguo, kiugo kĩa Ngai ti kĩohe. 10 Na nĩkĩo gĩtũmaga thiĩ na mbere gũkirĩrĩria maũndũ mothe nĩ ũndũ wa arĩa athuure, nĩguo o nao magĩe na ũhonokio ũrĩa umanaga na Kristo Jesu, o hamwe na riri wa tene na tene. 11 Ciugo ici nĩ cia kwĩhokeka: Angĩkorũo na ma twakuire hamwe nake, ningĩ nĩ tũgaatũũra hamwe nake; 12 tũngĩthiĩ na mbere gũkirĩrĩria, ningĩ nĩ tũgaathana hamwe nake tũrĩ athamaki; tũngĩmũkaana, o nake nĩ agaatũkaana; 13 tũngĩaga kwĩhokeka, we aikaraga arĩ mwĩhokeku, nĩ gũkorũo we ndangĩĩkaana.
14 Ikaraga ũkĩmaririkanagia maũndũ macio, ũkĩmataaraga mbere ya Ngai atĩ matigakararanagie nĩ ũndũ wa ciugo, ũcio nĩ ũndũ ũtarĩ ũguni o na hanini tondũ nĩ ũthũkagia arĩa marathikĩrĩria. 15 Ĩka ũrĩa wothe ũngĩhota kuonania atĩ ũrĩ mwĩtĩkĩrĩku nĩ Ngai, mũruti wĩra ũtarĩ na ũndũ angĩconokera, ũkĩhũthagĩra wega kiugo kĩa ũhoro ũrĩa wa ma. 16 No rĩrĩ, reganaga na mĩario ya tũhũ ĩrĩa ĩthaahagia maũndũ matheru, nĩ ũndũ ĩrĩthiaga o ĩgĩtongoragia harĩ kwagĩra Ngai gĩtĩo, 17 na mĩario yao ĩrĩtheeremaga o ta kĩronda kĩa ndĩĩra. Himenayo na Fileto nĩ amwe ao. 18 Andũ acio nĩ moimĩte nja ya ũhoro wa ma, tondũ moigaga atĩ andũ nĩ marĩkĩtie kũriũkio, na nĩ marathũkia wĩtĩkio wa andũ amwe. 19 O na kũrĩ ũguo, mũthingi ũrĩa mũrũmu wa Ngai ũtũũraga wĩhandĩte, ũrĩ na mũhũũri ũyũ, “Jehova* nĩ oĩ arĩa ake mwene,” na, “Ũrĩa wothe ũkayagĩra rĩĩtwa rĩa Jehova* nĩ aregane na maũndũ matarĩ ma ũthingu.”
20 Thĩinĩ wa nyũmba nene gũkoragwo na indo cia thahabu na cia betha o hamwe na cia mbaũ na cia rĩũmba, na nĩ kũrĩ imwe cia wĩra mũtĩĩku na ingĩ cia wĩra ũtarĩ mũtĩĩku. 21 Kwoguo mũndũ angĩĩthema icio cia wĩra ũtarĩ mũtĩĩku, arĩkoragwo arĩ kĩndũ kĩa wĩra mũtĩĩku, mũndũ mũtheru, ũrĩ na ũguni harĩ mwene, ahaarĩirio nĩ ũndũ wa wĩra wothe mwega. 22 Nĩ ũndũ ũcio-rĩ, ũragĩra merirĩria ma wĩthĩ, ĩndĩ ũthingatage ũthingu, wĩtĩkio, wendo, thayũ, ũrĩ hamwe na arĩa makayagĩra Mwathani marĩ na ngoro theru.
23 Ningĩ, reganaga na ngarari cia ũrimũ itarĩ na kũrĩa irĩ, tondũ nĩ ũĩ atĩ irehaga haaro. 24 Nĩ gũkorũo ngombo ya Mwathani ndĩagĩrĩirũo kũrũa, no yagĩrĩirũo gũkorũo ĩrĩ hooreri kwerekera andũ othe, ĩrĩ na ũhoti wa kũrutana, ĩkegirĩrĩria rĩrĩa yahĩtĩrio, 25 ĩgĩtaaraga arĩa matarĩ na mwerekera mwega ĩrĩ na ũhooreri. No kũhoteke Ngai atũme merire nĩguo magĩe na ũmenyo ũrĩa wa ma, 26 thutha ũcio no macokererũo nĩ meciria mao na meyohore mũtego-inĩ wa Mũcukani, nĩ gũkorũo nĩ amanyitĩte marĩ muoyo nĩguo mekage wendi wake.