Tito

2 No wee-rĩ, thiĩ na mbere kwaragia maũndũ marĩa maratwarana na ũrutani ũrĩa wagĩrĩire. 2 Athuri arĩa akũrũ magĩrĩirũo gwĩkaga maũndũ na ũigananĩru, matarĩ na itherũ, marĩ na meciria mega, mehandĩte wega ũhoro-inĩ wa wĩtĩkio, wa wendo, na wa ũkirĩrĩria. 3 O nao atumia arĩa akũrũ magĩrĩirũo gũkoragwo na mĩthiĩre ĩratĩithia Ngai, matarĩ a gũcambania, matarĩ anyui ndibei nyingĩ, arutani a maũndũ marĩa mega, 4 nĩguo mataarage atumia arĩa ethĩ kwenda athuri ao, kwenda ciana ciao, 5 gũkoragwo na meciria mega, atheru, aruti wĩra kwao mĩciĩ, ega, mathĩkagĩre athuri ao, nĩguo kiugo kĩa Ngai gĩtigacambio.

6 O taguo, ikaraga ũgĩtaaraga anake makoragwo na meciria mega, 7 ũkĩyonanagia atĩ ũrĩ kĩonereria gĩa ciĩko njega maũndũ-inĩ mothe. Rutanaga maũndũ marĩa matheru hatarĩ itherũ, 8 ũkĩhũthagĩra ciugo njega itangĩrutwo mahĩtia, nĩguo arĩa makararagia maconokage nĩ kwaga ũndũ mũru mangiuga igũrũ ritũ. 9 Ngombo nĩ ciathĩkagĩre ene cio maũndũ-inĩ mothe, ikĩgeragia kũmakenia, itegũcokanĩria nao, 10 itekũmaiya, ĩndĩ irĩ njĩhokeku biũ, nĩguo igoocithie ũrutani wa Mũhonokia witũ Ngai, na njĩra ciothe.

11 Nĩ gũkorũo ũtugi mũnene wa Ngai nĩ ũguũrĩtio, ũkarehera andũ a mĩthemba yothe ũhonokio. 12 Ũtugi ũcio ũtũrutaga kũrega maũndũ marĩa matakenagia Ngai, na kũrega merirĩria ma thĩ, na gũtũũra tũrĩ na meciria mega na ũthingu na wĩyamũrĩri Ngai mũtabarĩre-inĩ ũyũ wa maũndũ,* 13 o tũgĩetagĩrĩra kĩĩrĩgĩrĩro kĩrĩa kĩrĩ gĩkeno na kũguũrio kũrĩ riri kwa Ngai ũrĩa mũnene o na kwa Mũhonokia witũ, Jesu Kristo, 14 ũrĩa werutire nĩ ũndũ witũ nĩguo atũkũũre kuumana na uuni-watho wa mĩthemba yothe na atherie andũ matuĩke kĩndũ gĩake kĩa mwanya, marĩ na kĩyo kĩa mawĩra marĩa mega.

15 Aragia maũndũ macio ũgĩtaaranaga na ũkarũngana ũrĩ na wathani wothe. Ndũkanareke mũndũ o na ũrĩkũ akũire.