Jakubu
1 Nĩ niĩ Jakubu, ngombo ya Ngai na ya Mwathani Jesu Kristo, kũrĩ mĩhĩrĩga ĩrĩa ikũmi na ĩĩrĩ ĩrĩa ĩhurunjũkĩte kũndũ na kũndũ:
Nĩ ndamũgeithia!
2 Ariũ a Ithe witũ, kenagai rĩrĩa mwacemania na magerio matiganĩte, 3 mũkĩmenyaga atĩ rĩrĩa mũreka ũguo wĩtĩkio ũcio wanyu wagerio nĩ ũtũmaga mũgĩe na ũkirĩrĩria. 4 No rekagai ũkirĩrĩria ũhingie wĩra waguo, nĩ getha mũkoragwo mũrĩ akinyanĩru na mũtarĩ ũcuke maũndũ-inĩ mothe, mũtekwaga ũndũ o na ũmwe.
5 Kwoguo mũndũ o na ũrĩkũ wanyu angĩkorũo atarĩ na ũũgĩ, nĩ athiĩ na mbere kũhoya Ngai na nĩ ekũheo, nĩ gũkorũo Ngai aheaga andũ othe arĩ na ũtana ategũkũũmana. 6 No nĩ ahoyage arĩ na wĩtĩkio, atarĩ na nganja o na hanini, nĩ ũndũ mũndũ ũrĩa ũthanganagia ahaana ta ikũmbĩ rĩa iria rĩrĩa rĩtwaragwo mwena ũyũ na ũyũ nĩ rũhuho. 7 Ma nĩ atĩ, mũndũ ũcio ndagĩrĩirũo kwĩrĩgĩrĩra kĩndũ kuuma kũrĩ Jehova;* 8 nĩ mũndũ wa ngoro igĩrĩ, ũtakindagĩria maũndũ-inĩ make mothe.
9 No mũrũ wa Ithe witũ ũrĩa mũthĩni nĩ akene nĩ ũndũ wa gũtũũgĩrio, 10 nake ũrĩa mũtongu akenere kũnyihio, tondũ o ta ũrĩa ihũa rĩa gĩthaka rĩthiraga noguo agaathira. 11 Nĩ gũkorũo o ta ũrĩa riũa rĩaraga rĩrĩ na ũrugarĩ mũnene rĩgatũma mũmera ũhohe, na ihũa rĩaguo rĩkagwa thĩ naguo ũthaka warĩo wa na nja ũgathira-rĩ, noguo mũndũ ũrĩa mũtongu agaathira o agĩthingataga mũtũũrĩre wake.
12 Gũkena nĩ mũndũ ũrĩa ũkiragĩrĩria akĩgerio, tondũ arĩkia gwĩtĩkĩrĩka nĩ akaamũkĩra thũmbĩ ya muoyo, ĩrĩa Jehova* eerĩire arĩa mathiaga na mbere kũmwenda. 13 Rĩrĩa mũndũ o wothe aragerio ndakoige: “Ndĩragerio nĩ Ngai.” Nĩ gũkorũo Ngai ndangĩgerio na maũndũ moru, nake we mwene ndageragia mũndũ o na ũrĩkũ. 14 Ĩndĩ o mũndũ ageragio na njĩra ya kũgucĩrĩrio na kũhenererio nĩ merirĩria make mwene. 15 Na merirĩria macio marĩkia gũkũra maciaraga mehia; namo mehia marĩkia gwĩkwo, marehaga gĩkuũ.
16 Mũtikaheeneke, inyuĩ ariũ a Ithe witũ nyendete. 17 Kĩheo o gĩothe kĩega na gĩkinyanĩru kiumaga igũrũ, gĩgaikũrũka kiumĩte kũrĩ Ithe wa motheri ma igũrũ, o we ũtagarũrũkaga kana agacenjia ta ũrĩa kĩĩruru gĩcenjagia. 18 Warĩ wendi wake gũtũma tũgĩe kuo kũgerera kiugo kĩa ũhoro ũrĩa wa ma, nĩguo tũtuĩke maciaro mamwe ma mbere kuuma harĩ ciũmbe ciake.
19 Menyai ũndũ ũyũ ariũ a Ithe witũ nyendete: O mũndũ no mũhaka ahiũhage gũthikĩrĩria, ndakahiũhage kwaria, na ndakahĩkage kũrakara, 20 nĩ gũkorũo marakara ma mũndũ matirehaga ũthingu wa Ngai. 21 Kwoguo-rĩ, eheriai ũndũ o wothe mũthũku na ũndũ o wothe mũru, na mwĩtĩkĩre mũrĩ na ũhooreri kũhandwo kiugo kĩa Ngai kĩrĩa kĩngĩhota kũmũhonokia.
22 O na kũrĩ ũguo, tuĩkai a kũhingagia kiugo no to kũigua tu, na mũtikeheenagie inyuĩ ene na mwĩcirĩrie ũtarĩ wa ma. 23 Nĩ gũkorũo mũndũ o wothe angĩtuĩka wa kũigua kiugo no ndarakĩhingia-rĩ, mũndũ ũcio atariĩ ta mũndũ ũkwĩrora ũthiũ gĩcicio-inĩ. 24 Tondũ eroraga, agacoka agathiĩ na akariganĩrũo o rĩo nĩ ũrĩa atariĩ. 25 No mũndũ ũrĩa ũcũthagĩrĩria thĩinĩ wa watho ũrĩa mũkinyanĩru ũrĩa ũrehaga wĩyathi na agatũũra thĩinĩ waguo, ndaiguaga agacoka akariganĩrũo, ĩndĩ nĩ ahingagia maũndũ macio; na nĩ arĩkenagĩra ũndũ ũrĩa areka.
26 Mũndũ o wothe angĩĩciria atĩ nĩ mũthathaiya wa Ngai no ndagiragĩrĩria rũrĩmĩ rwake, nĩ ngoro yake mwene araheenia, na ũthathaiya wake nĩ wa tũhũ. 27 Ũthathaiya ũrĩa mũtheru na ũtarĩ thahu maitho-inĩ ma Ngai o we Ithe witũ nĩ ũyũ: kũrũmbũyagia ciana cia ngoriai na atumia a ndigwa mathĩna-inĩ mao, na mũndũ gũikaraga atarĩ na kĩmeni kuumana na thĩ ĩno.