1 Petero
1 Nĩ niĩ Petero, mũtũmwo wa Jesu Kristo, kũrĩ inyuĩ arĩa aamũre mũkoragwo mũrĩ aikari a kahinda mũhurunjũkĩte Ponto, Galatia, Kapadokia, Asia, na Bithunia 2 kũringana na ũrĩa Ngai, o we Ithe witũ aamũmenyete o mbere, akamũtheria na roho, nĩguo mũtuĩke andũ athĩki na mũminjaminjĩrio thakame ya Jesu Kristo:
Ũtugi mũnene na thayũ iromũingĩhĩra.
3 Ngai arogoocwo, o we Ithe wa Mwathani witũ Jesu Kristo, nĩ gũkorũo kũringana na tha ciake nyingĩ nĩ aatũmire tũciarũo rĩngĩ nĩguo tũgĩe na kĩĩrĩgĩrĩro kĩrĩ muoyo kũgerera ũriũkio wa Jesu Kristo kuuma kũrĩ arĩa akuũ, 4 agĩtũhe igai rĩtangĩbutha na rĩtarĩ na thahu na rĩtangĩthũka. Igai rĩu mũigĩirũo kũũrĩa igũrũ, 5 o inyuĩ mũragitĩrũo na hinya wa Ngai nĩ ũndũ wa wĩtĩkio, nĩguo mũkaahonoka. Ũhonokio ũcio nĩ ũkaaguũrio matukũ-inĩ ma mũico. 6 Ũndũ ũcio nĩ ũtũmĩte mũgĩe na gĩkeno kĩnene, o na gũtuĩka kwa ihinda inyinyi no mũhaka mũiguithio kĩeha nĩ magerio ma mĩthemba mĩingĩ, 7 nĩguo wĩtĩkio wanyu ũrĩa ũgeretio, o ũcio wa goro gũkĩra thahabu ĩrĩa ĩthiraga o na gũtuĩka ĩkoragwo ĩgereirio mwaki-inĩ, ũtũme mwambarario na mũheo riri na gĩtĩo hĩndĩ ĩrĩa Jesu Kristo akaaguũrio. 8 O na gũtuĩka mũtirĩ mwamuona-rĩ, nĩ mũmwendete. O na gũtuĩka rĩu mũtiramuona, no mũmwĩtĩkĩtie, na mũrĩ na gĩkeno kĩnene kĩrĩ na riri gĩtangĩtaarĩrio ũhoro wakĩo, 9 tondũ mũrĩ na ma atĩ muoroto wa wĩtĩkio wanyu nĩ ũkaahinga, na nĩguo ũhonokio wanyu.
10 Anabii arĩa maarathire igũrũ rĩa ũtugi mũnene ũrĩa mũngĩkaamũkĩra, nĩ maatuĩragia mũno na magathuthuria na kinyi ũhoro wĩgiĩ ũhonokio ũcio. 11 Magĩthiĩ na mbere gũthuthuria mamenye nĩ ihinda rĩrĩkũ kana nĩ hĩndĩ ĩrĩkũ roho ũrĩa maarĩ naguo wonanagia o mbere maũndũ marĩa Kristo angĩkanyamarĩka na riri ũrĩa ũngĩkaarũmĩrĩra. 12 Makĩguũrĩrio atĩ ti o ene meetungatagĩra, no nĩ inyuĩ maatungatagĩra ũhoro-inĩ ũkoniĩ maũndũ marĩa rĩu mũmenyithĩtio nĩ arĩa maamũhunjĩirie ũhoro ũrĩa mwega marĩ na roho mũtheru ũrĩa umĩte igũrũ. Maũndũ macio-rĩ, araika nĩ meriragĩria mũno gũtaũkĩrũo nĩmo.
13 Hakĩrĩ ũguo-rĩ, mwĩhotorei meciria manyu nĩ ũndũ wa wĩra; ikaragai mwĩiguĩte biũ; igagai kĩĩrĩgĩrĩro kĩanyu harĩ ũtugi mũnene ũrĩa mũkaaheo hĩndĩ ya kũguũrio kwa Jesu Kristo. 14 Ta ciana njathĩki-rĩ, tigai gwĩkaga kũringana na merirĩria marĩa mwarĩ namo hau kabere rĩrĩa mũtaarĩ na ũmenyo wĩgiĩ Ngai, 15 no o ta Ũrĩa Mũtheru o ũcio wamwĩtire, tuĩkai atheru mĩthiĩre-inĩ yanyu yothe, 16 tondũ nĩ kwandĩke ũũ: “No mũhaka mũkorũo mũrĩ atheru, tondũ niĩ ndĩ mũtheru.”
17 Na angĩkorũo nĩ mũkayagĩra Ithe witũ ũcio ũtuanagĩra atarĩ na mũthutũkanio kũringana na ciĩko cia o mũndũ, mwĩtigagĩrei Ngai hĩndĩ ĩno mũrĩ aikari a kahinda kanini thĩinĩ wa thĩ. 18 Nĩ gũkorũo nĩ mũĩ atĩ ti kũgerera indo iria ibuthaga, ta betha kana thahabu mwakũũrirũo ũkombo-inĩ kuuma harĩ mũtũũrĩre wanyu wa tũhũ ũrĩa mwagaire kũrĩ maithe manyu ma tene. 19 No mwakũũrirũo kũgerera thakame ya goro, o ta ya gatũrũme gatarĩ na kaũgũ kana kameni, ĩrĩa ya Kristo. 20 Ũcio nĩ oĩkaine o tene mbere ya kĩambĩrĩria* gĩa thĩ, no aaguũririo marigĩrĩrio-inĩ ma mahinda nĩ ũndũ wanyu. 21 Nĩ kũgerera we inyuĩ mwĩtĩkĩtie Ngai ũrĩa wamũriũkirie kuuma kũrĩ arĩa akuũ na akĩmũhe riri, nĩguo wĩtĩkio na mwĩhoko wanyu ũkorũo harĩ Ngai.
22 Tondũ rĩu nĩ mwĩtheretie kũgerera wathĩki wanyu harĩ ma mũrĩ na wendo ũtarĩ na ũhinga ta ariũ a nyina ũmwe-rĩ, endanagai biũ inyuĩ ene kuuma ngoro. 23 Nĩ gũkorũo nĩ mũciarĩtwo rĩngĩ, na ti kuumana na mbeũ ĩrĩa ĩngĩbutha no nĩ kuumana na ĩrĩa ĩtangĩbutha, kũgerera kiugo kĩa Ngai ũrĩa ũrĩ muoyo na ũtũũraga tene na tene. 24 Tondũ “andũ othe mahaana nyeki, na riri wao wothe ũhaana mahũa ma gĩthaka; nyeki nĩ ĩhohaga, na mahũa makoma, 25 no kiugo kĩa Jehova* gĩtũũraga tene na tene.” Na “kiugo” kĩu nĩkĩo ũhoro ũrĩa mwega ũrĩa mwahunjĩirio.