Judasi
1 Nĩ niĩ Judasi, ngombo ya Jesu Kristo, na mũrũ wa nyina na Jakubu, kũrĩ arĩa athuure, mendetwo nĩ Ngai Ithe witũ na magitagĩrũo nĩ ũndũ wa Jesu Kristo:
2 Tha na thayũ o hamwe na wendo iromũingĩhĩra.
3 Endwa akwa, o na gũtuĩka nĩ ndĩreriragĩria mũno kũmwandĩkĩra ũhoro wĩgiĩ ũhonokio ũrĩa tũkoragwo naguo, nĩ ndĩronire harĩ bata kũmwandĩkĩra ndĩmũthaithe mũrũage mbaara nene ya wĩtĩkio ũrĩa wakinyĩirio arĩa aamũre riita rĩmwe rĩa kũigana. 4 Ndĩramwandĩkĩra tondũ andũ amwe nĩ metonyereirie thĩinĩ wanyu o ta ũrĩa Maandĩko maarathĩte tene; acio nĩ andũ matetigĩrĩte Ngai arĩa mahũthagĩra ũtugi wake mũnene ũrĩ kĩĩgwatio gĩa gwĩka mĩtugo ya rũtũrĩko* na magakaana Mwathani Jesu Kristo, o we wiki mwathi witũ.
5 O na gũtuĩka nĩ mũĩ maũndũ macio mothe wega-rĩ, ngwenda kũmũririkania atĩ Jehova* arĩkia kũhonokia andũ kuuma Misiri, thutha-inĩ nĩ aaniinire arĩa matoonanirie wĩtĩkio. 6 Na araika arĩa mataarũmirie handũ hao harĩa maagaĩirũo o kĩambĩrĩria, no magĩtiga gĩikaro kĩao kĩrĩa kĩagĩrĩire, amohete tene na tene nduma-inĩ ndumanu metereire ituĩro rĩa mũthenya ũrĩa mũnene. 7 O ũndũ ũmwe na ũcio, Sodomu na Gomora o hamwe na matũũra marĩa maathiũrũrũkĩirie, o namo nĩ maakĩririe njano harĩ ngomanio itagĩrĩire* na magĩthingata merirĩria matarĩ ma ndũire ma mwĩrĩ; acio maatuĩrĩirũo kwanangwo na mwaki wa tene na tene nĩguo ũndũ ũcio ũtuĩke mũkaana harĩ ithuĩ.
8 O na kũrĩ ũguo, andũ acio o nao nĩ mareingĩria iroto-inĩ, magathaahia mwĩrĩ, makanyarara wathani, na makaria maũndũ moru igũrũ rĩa arĩa matĩĩtwo nĩ Ngai. 9 No rĩrĩa Mikaeli mũraika ũrĩa mũnene maakararanagia na Mũcukani nĩ ũndũ wa mwĩrĩ wa Musa, ndaamũtuĩrĩire na irumi, ĩndĩ aamwĩrire: “Jehova* arogũtuĩra.” 10 No andũ acio maragia ũũru igũrũ rĩa maũndũ mothe marĩa matoĩ wega. Na ũhoro-inĩ wa maũndũ mothe marĩa moĩ kũgerera ũũgĩ wa mũciarĩre o ta nyamũ itareciria, mathiaga na mbere gwĩthũkia o ene.
11 Kaĩ marĩ na haaro-ĩ, nĩ gũkorũo marũmĩrĩire njĩra ya Kaini o na makahiũha kũrũmĩrĩra njĩra njũru ya Balaamu nĩguo maamũkĩre kĩheo, na nĩ manangĩtwo nĩ ũndũ wa kwaria na ũremi ta wa Kora! 12 Acio nĩo mahiga marĩa mehithaga rungu rwa maĩ maruga-inĩ manyu hĩndĩ ĩrĩa mũkũrĩanĩra nao, arĩithi mehũnagia o ene matarĩ na guoya; matu matarĩ na mbura marĩa matwaragwo mwena ũyũ na ũyũ nĩ rũhuho; mĩtĩ ĩtakoragwo na matunda hĩndĩ ĩrĩa yagĩrĩire, ĩkuĩte maita merĩ na ĩkamunywo; 13 ningĩ matariĩ ta makũmbĩ ma iria-inĩ mararuta mũhũyũ wa kũmaconorithia o ene; njata irathiĩ itarĩ na mũtaratara, iria ituĩrĩirũo gũikio nduma-inĩ ĩrĩa ndumanu biũ tene na tene.
14 Mũndũ wa mũgwanja kuuma harĩ Adamu, Enoko, o nake nĩ aarathĩte ũhoro wao rĩrĩa oigire: “Atĩrĩrĩ, Jehova* nĩ okire na araika ake atheru ngiri nyingĩ 15 nĩguo atuĩre andũ othe, na onie arĩa matetigĩrĩte Ngai mahĩtia mao ũhoro-inĩ ũkoniĩ maũndũ mothe matarĩ ma ũngai marĩa maaneka, na ũhoro-inĩ ũkoniĩ maũndũ moru marĩa andũ ehia maanaria igũrũ rĩake.”
16 Andũ acio nĩ anugunĩki, na nĩ matetaga igũrũ rĩa ũtũũro wao, marũmagĩrĩra merirĩria mao, na nĩ merahaga mũno na tũnua twao, o makĩgeragia kwĩyendithĩrĩria harĩ andũ angĩ nĩguo megune o ene.
17 No inyuĩ endwa akwa-rĩ, ririkanai ciugo iria ciaririo tene nĩ atũmwo a Mwathani witũ Jesu Kristo, 18 ũrĩa maamwĩraga atĩrĩ: “Mahinda-inĩ ma mũthia nĩ gũkaagĩa anyũrũrania, arĩa makaarũmagĩrĩra merirĩria mao ma maũndũ matarĩ ma ũngai.” 19 Acio nĩo marehaga nyamũkano, andũ matariĩ ta nyamũ, matarĩ a kĩĩroho. 20 No inyuĩ endwa akwa-rĩ, mwĩyakei harĩ wĩtĩkio wanyu ũrĩa mũtheru, na mũhoyage mũrĩ na roho mũtheru, 21 nĩguo mwĩige wendo-inĩ wa Ngai, o mũgĩetagĩrĩra tha cia Mwathani witũ Jesu Kristo nĩ getha mũkaaheo muoyo wa tene na tene. 22 Makĩria ma ũguo, thiĩi na mbere kũiguĩra tha arĩa marĩ na nganja; 23 mũmahonokie na njĩra ya kũmathara kuuma mwaki-inĩ. No mũthiĩ na mbere kũiguĩra arĩa angĩ tha, na mwĩkage ũguo mũrĩ na guoya, o mũgĩthũũraga nginya nguo ĩrĩa ĩkĩrĩtwo kameni nĩ mwĩrĩ.
24 Rĩu-rĩ, Ngai, ũrĩa ũngĩhota kũmũgitĩra mũtikahĩngĩke na atũme mwĩhande mũtarĩ na kameni mbere ya riri wake mũrĩ na gĩkeno kĩnene, 25 o we wiki Ngai mũhonokia witũ kũgerera Jesu Kristo Mwathani witũ, nĩwe mwene riri, ũnene, ũhoti na wathani mahinda marĩa mothe mahĩtũku na rĩu o nginya tene na tene. Ameni.