Kũguũrĩrio
22 Na akĩnyonia rũũĩ rwa maĩ ma muoyo, rwahenagia ta gĩcicio rũgĩtherera kuuma gĩtĩ-inĩ kĩa ũnene kĩa Ngai na gĩa Gatũrũme 2 rũgereire gatagatĩ ka njĩra ĩrĩa nene ya itũũra rĩu. Mĩena yerĩ ya rũũĩ rũu haarĩ na mĩtĩ ya muoyo yarutaga maciaro ikũmi na merĩ ma matunda, ĩgaciara o mweri. Namo mathangũ ma mĩtĩ ĩyo maarĩ ma kũhonia ndũrĩrĩ.
3 Na gũtigaakorũo na kĩrumi rĩngĩ. Ĩndĩ gĩtĩ kĩa ũnene kĩa Ngai o na gĩa Gatũrũme gĩgaakorũo thĩinĩ wa itũũra rĩu, na ndungata ciake nĩ ikaamũrutagĩra ũtungata mũtheru; 4 nacio nĩ ikoona ũthiũ wake, narĩo rĩĩtwa rĩake rĩgaakorũo mathiithi-inĩ ma cio. 5 Ningĩ, gũtigaacoka gũkorũo na ũtukũ, na itikabatara tawa o na kana riũa, nĩ gũkorũo Jehova* Ngai nĩ agaacimũrĩkagĩra, na igaathanaga irĩ athamaki tene na tene.
6 Na akĩnjĩra: “Ciugo ici nĩ cia kwĩhokeka na nĩ cia ma; Jehova,* Ngai ũrĩa waaririe kũgerera anabii, nĩ atũmĩte mũraika wake onie ndungata ciake maũndũ marĩa arĩ o mũhaka mekĩke ica ikuhĩ. 7 Atĩrĩrĩ, nĩ ngũũka o narua. Gũkena nĩ ũrĩa wathĩkagĩra ciugo cia ũrathi wa gĩkũnjo gĩkĩ.”
8 Niĩ Johana, nĩ niĩ ndaiguaga na ngeyonera maũndũ macio. Rĩrĩa ndamaiguire na ngĩmona-rĩ, ngĩĩgũithia thĩ nĩguo thathaiye mũraika ũcio wanyonagia maũndũ macio. 9 No we akĩnjĩra atĩrĩ: “Wĩmenyerere! Ndũgeke ũguo! Niĩ ndĩ ngombo o tawe na ariũ a thoguo arĩa anabii na arĩa mathĩkagĩra ciugo cia gĩkũnjo gĩkĩ. Thathaiya Ngai.”
10 Ningĩ akĩnjĩra: “Ndũkahinge ciugo cia ũrathi wa gĩkũnjo gĩkĩ, nĩ gũkorũo ihinda rĩrĩa rĩtuĩtwo rĩrĩ hakuhĩ. 11 Ũrĩa ũtarĩ mũthingu nĩ athiĩ na mbere na mĩthiĩre ĩtarĩ ya ũthingu, nake ũrĩa ũkoragwo na mĩthiĩre ĩtarĩ mĩtheru nĩ athiĩ o na mbere na mĩthiĩre ĩtarĩ mĩtheru; no ũrĩa mũthingu nĩ athiĩ na mbere na ũthingu, nake ũrĩa mũtheru athiĩ na mbere na ũtheru.
12 “‘Atĩrĩrĩ, nĩ ngũũka o narua, na ndĩ na kĩheo kĩrĩa ngũheana, nĩguo ngaarĩha o mũndũ kũringana na ciĩko ciake. 13 Nĩ niĩ Alifa na Omega, wa mbere na wa mũthia, kĩambĩrĩria o na kĩrĩkĩrĩro. 14 Gũkena nĩ arĩa mathambagia nguo ciao, nĩ getha magĩe na kĩhooto gĩa gũthiĩ harĩ mĩtĩ ya muoyo na mahote kũingĩra thĩinĩ wa itũũra magereire ihingo-inĩ ciarĩo. 15 Nja kũrĩ na ngui* na aragũri na arĩa mamenyerete kwĩingĩria thĩinĩ wa ngomanio itagĩrĩire* na oragani na ahoi mĩhianano na arĩa othe mendete na maragia maũndũ ma maheeni.’
16 “‘Niĩ, Jesu, ndaatũmire mũraika wakwa agũkinyĩrie ũira wĩgiĩ maũndũ macio nĩ ũndũ wa ciũngano. Nĩ niĩ mũri wa Daudi na nĩ niĩ rũciaro rwake na njata ĩrĩa ĩcangararĩte ya rũcinĩ.’”
17 Na roho na mũhiki maikaraga makiugaga, “Ũka!” nake mũndũ wothe ũkũigua nĩ oige, “Ũka!” ũrĩa wothe mũnyotu nĩ oke; ũrĩa wothe ũkwenda nĩ anyue maĩ ma muoyo hatarĩ marĩhi.
18 “Ndĩraruta ũira harĩ mũndũ wothe ũrĩa ũkũigua ciugo cia ũrathi wa gĩkũnjo gĩkĩ: Mũndũ angĩongerera maũndũ macio, Ngai nĩ akaamuongerera mahũũra marĩa mandĩkĩtwo gĩkũnjo-inĩ gĩkĩ; 19 na mũndũ angĩruta ũndũ o na ũrĩkũ harĩ ciugo cia gĩkũnjo kĩa ũrathi ũcio, Ngai nĩ akeeheria igai rĩake kuuma harĩ mĩtĩ ya muoyo na kuuma harĩ itũũra rĩrĩa itheru, maũndũ marĩa mandĩkĩtwo thĩinĩ wa gĩkũnjo gĩkĩ.
20 “Ũrĩa ũrutaga ũira wĩgiĩ maũndũ macio aroiga, ‘Ĩĩ, nĩ ngũũka o narua.’”
“Ameni! Ũka, Mwathani Jesu.”
21 Ũtugi mũnene wa Mwathani Jesu ũroikara hamwe na arĩa aamũre.