Marũa ma Judasi
1 Nĩ niĩ Judasi, ngombo ya Jesu Kristo na mũrũ wa nyina na Jakubu,+ kũrĩ arĩa metĩtwo,+ o acio mendetwo nĩ Ngai Ithe witũ na makagitĩrũo nĩ ũndũ wa Jesu Kristo:+
2 Mũroingĩhĩrũo nĩ tha na thayũ o hamwe na wendo.
3 Endwa akwa, o na gũtuĩka nĩ ndĩrerutanagĩria mũno nĩguo ndĩmwandĩkĩre ũhoro wĩgiĩ ũhonokio ũrĩa tũkoragwo naguo hamwe,+ nĩ ndĩronire harĩ bata kũmwandĩkĩra ndĩmũthaithe mũrũage mbaara nene ya wĩtĩkio+ ũrĩa wakinyĩirio arĩa aamũre riita rĩmwe rĩa kũigana. 4 Ndĩramwandĩkĩra tondũ andũ amwe nĩ metonyereirie thĩinĩ wanyu arĩa maamũrĩirũo ituĩro rĩu o tene nĩ Maandĩko; acio nĩ andũ matetigĩrĩte Ngai arĩa magarũraga ũtugi wake mũnene ũgatuĩka kĩĩgwatio gĩa gwĩka mĩtugo ya rũtũrĩko*+ na makonania atĩ nĩ a maheeni ũhoro-inĩ wĩgiĩ Mwathani Jesu Kristo, o we wiki mwathi witũ.+
5 O na gũtuĩka nĩ mũĩ maũndũ macio mothe wega-rĩ, ngwenda kũmũririkania atĩ Jehova* arĩkia kũhonokia andũ kuuma bũrũri wa Misiri,+ thutha-inĩ nĩ aaniinire arĩa matoonanirie wĩtĩkio.+ 6 Na araika arĩa mataarũmirie handũ hao harĩa maagaĩirũo o kĩambĩrĩria, no magĩtiga gĩikaro kĩao kĩrĩa kĩagĩrĩire,+ amaigĩte cioho-inĩ cia tene na tene nduma-inĩ ndumanu nĩ ũndũ wa ituĩro rĩa mũthenya ũrĩa mũnene.+ 7 O ũndũ ũmwe na ũcio, Sodomu na Gomora o hamwe na matũũra marĩa maathiũrũrũkĩirie, o namo nĩ maakĩririe njano harĩ ngomanio itagĩrĩire* na magĩthingata merirĩria ma mwĩrĩ matarĩ ma ndũire;+ acio maamũkĩrire ituĩro rĩa iherithia rĩa mwaki wa tene na tene nĩguo matuĩke mũkaana harĩ ithuĩ.+
8 O na kũrĩ ũguo, andũ acio o nao nĩ mareingĩria iroto-inĩ, magathahia mwĩrĩ, makanyarara wathani, na makaria maũndũ moru megiĩ arĩa makoragwo na riri.+ 9 No rĩrĩa Mikaeli+ mũraika ũrĩa mũnene+ maagire kũiguithania na Mũcukani magĩkararania nĩ ũndũ wa mwĩrĩ wa Musa,+ ndaageririe kũmũtuĩra na irumi,+ ĩndĩ aamwĩrire: “Jehova* arogũkũũma.”+ 10 No andũ acio maragia ũũru igũrũ rĩa maũndũ mothe marĩa matataũkagĩrũo wega.+ Na maũndũ-inĩ mothe marĩa mataũkagĩrũo kũgerera ũũgĩ wa mũũmbĩre o ta nyamũ iria itarĩ wĩcirio,+ mathiaga na mbere gwĩthũkia o ene.
11 Kaĩ marĩ na haaro-ĩ, nĩ gũkorũo marũmĩrĩire njĩra ya Kaini+ o na makahiũha kũrũmĩrĩra njĩra njũru ya Balaamu+ nĩ ũndũ wa kĩheo, na nĩ manangĩtwo nĩ ũndũ wa mĩario ya ũremi+ ya Kora!+ 12 Acio nĩo ndwaro cia mahiga iria ciĩhithaga rungu rwa maĩ maruga-inĩ manyu ma wendo+ rĩrĩa mararĩanĩra na inyuĩ, arĩithi merĩithagia o ene matarĩ na guoya;+ matu matarĩ na maĩ marĩa matwaragwo mwena na mwena nĩ rũhuho;+ mĩtĩ ĩtarĩ maciaro hĩndĩ ya kĩmera, ĩkuĩte maita merĩ* na ĩkamunywo; 13 makũmbĩ matangĩgirĩrĩka ma iria-inĩ mararuta mũhũyũ wa gĩconoko kĩao ene;+ njata irathiĩ itarĩ na mũtaratara, iria ciigĩirũo nduma ĩrĩa ndumanu biũ tene na tene.+
14 Mũndũ wa mũgwanja kuuma harĩ Adamu, Enoko,+ o nake nĩ aarathĩte ũhoro wao rĩrĩa ooigire: “Atĩrĩrĩ, Jehova* nĩ ookire na araika ake atheru ngiri makũmi maingĩ+ 15 nĩguo atuĩre andũ othe,+ na onie arĩa othe matetigĩrĩte Ngai mahĩtia mao ũhoro-inĩ wĩgiĩ maũndũ mothe matarĩ ma ũngai marĩa maaneka na njĩra ĩtarĩ ya ũngai, na ũhoro-inĩ ũkoniĩ maũndũ mothe ma kũmakania marĩa andũ matetigĩrĩte Ngai na ehia maanaria mamwĩgiĩ.”+
16 Acio nĩ andũ a kũnuguna,+ andũ a gũteta nĩ ũndũ wa igai rĩao ũtũũro-inĩ, marũmagĩrĩra merirĩria mao ene,+ na tũnua twao tũrĩ mwĩraho mũnene, o makĩraga arĩa angĩ ciugo cia kĩgaathi nĩguo megune o ene.+
17 No inyuĩ endwa akwa-rĩ, ririkanai ciugo iria ciaririo* hau kabere nĩ atũmwo a Mwathani witũ Jesu Kristo, 18 ũrĩa maamwĩraga atĩrĩ: “Ihinda-inĩ rĩa mũthia nĩ gũkaagĩa anyũrũrania, arĩa makaarũmagĩrĩra merirĩria mao ma maũndũ matarĩ ma ũngai.”+ 19 Acio nĩo matũmaga kũgĩe ngayũkano,+ andũ matariĩ ta nyamũ,* matarĩ a kĩĩroho.* 20 No inyuĩ endwa akwa-rĩ, mwĩyakei igũrũ rĩa wĩtĩkio wanyu ũrĩa mũtheru mũno, na mũhoyage mũrĩ na roho mũtheru,+ 21 nĩguo mwĩige wendo-inĩ wa Ngai,+ o mũgĩetagĩrĩra tha cia Mwathani witũ Jesu Kristo iria igaatũma mũheo muoyo wa tene na tene.+ 22 Makĩria ma ũguo, thiĩi na mbere kũiguĩra andũ amwe tha+ arĩa marĩ na nganja;+ 23 mahonokiei+ na njĩra ya kũmathara kuuma mwaki-inĩ. No thiĩi na mbere kũiguĩra arĩa angĩ tha, na mwĩkage ũguo mũrĩ na guoya, o mũgĩthũũraga nginya nguo ĩrĩa ĩĩkĩrĩtwo kameni nĩ mwĩrĩ.+
24 Rĩu-rĩ, ũrĩa ũngĩhota kũmũgitĩra mũtikahĩngĩke na atũme mũrũgame mũtarĩ na kameni+ mbere ya riri wake mũrĩ na gĩkeno kĩnene, 25 o we wiki Ngai mũhonokia witũ kũgerera Jesu Kristo Mwathani witũ, arogĩa na riri, ũnene, ũhoti, na wathani mahinda marĩa mothe mahĩtũku o na rĩu na nginya tene na tene. Ameni.