Kũguũrĩrio kwa Johana
22 Na akĩnyonia rũũĩ rwa maĩ ma muoyo,+ rwahenagia ta gĩcicio rũgĩtherera kuuma gĩtĩ-inĩ kĩa ũnene kĩa Ngai na gĩa Gatũrũme+ 2 rũgereire gatagatĩ ka njĩra ĩrĩa nene ya itũũra rĩu. Mĩena yerĩ ya rũũĩ rũu haarĩ na mĩtĩ ya muoyo yarutaga maciaro 12 ma matunda, ĩgaciara o mweri. Namo mathangũ ma mĩtĩ ĩyo maarĩ ma kũhonia ndũrĩrĩ.+
3 Na gũtigaakorũo na kĩrumi rĩngĩ. Ĩndĩ gĩtĩ kĩa ũnene kĩa Ngai o na gĩa Gatũrũme+ gĩgaakorũo thĩinĩ wa itũũra rĩu, na ngombo ciake nĩ ikaamũrutagĩra ũtungata mũtheru; 4 nacio nĩ ikoona ũthiũ wake,+ na rĩĩtwa rĩake rĩgaakorũo mathiithi-inĩ ma cio.+ 5 Ningĩ gũtigaacoka gũkorũo na ũtukũ,+ na itikaabatara ũtheri wa tawa o na kana ũtheri wa riũa, nĩ gũkorũo Jehova* Ngai nĩ agaacimũrĩkagĩra,+ na igaathana irĩ athamaki tene na tene.+
6 Akĩnjĩra atĩrĩ: “Ciugo ici nĩ cia kwĩhokeka na nĩ cia ma;+ Jehova,* Ngai ũrĩa watongoririe anabii kũgerera roho wake,+ nĩ atũmĩte mũraika wake onie ngombo ciake maũndũ marĩa arĩ o mũhaka mekĩke ica ikuhĩ. 7 Atĩrĩrĩ, nĩ ngũka o narua.+ Gũkena nĩ mũndũ o wothe wathĩkagĩra ciugo cia ũrathi wa gĩkũnjo gĩkĩ.”+
8 Niĩ Johana, nĩ niĩ ndaiguaga na ngeyonera maũndũ macio. Rĩrĩa ndamaiguire na ngĩmona-rĩ, ngĩĩgũithia thĩ nĩguo thathaiye magũrũ-inĩ ma mũraika ũcio wanyonagia maũndũ macio. 9 No we akĩnjĩra atĩrĩ: “Wĩmenyerere! Ndũgeke ũguo! Niĩ ndĩ ngombo o tawe o hamwe na ariũ a thoguo arĩa anabii na arĩa mathĩkagĩra ciugo cia gĩkũnjo gĩkĩ. Thathaiya Ngai.”+
10 Ningĩ akĩnjĩra: “Ndũkahinge na mũhũũri ciugo cia ũrathi wa gĩkũnjo gĩkĩ, nĩ gũkorũo ihinda rĩrĩa rĩtuĩtwo rĩrĩ hakuhĩ. 11 Ũrĩa ũtarĩ mũthingu nĩ athiĩ na mbere na maũndũ matarĩ ma ũthingu, nake ũrĩa ũkoragwo atarĩ mũtheru nĩ athiĩ na mbere na ũhoro wake wa kwaga ũtheru; no ũrĩa mũthingu nĩ athiĩ na mbere na ũthingu, nake ũrĩa mũtheru athiĩ na mbere na ũtheru.
12 “‘Atĩrĩrĩ, nĩ ngũka o narua, na ndĩ na kĩheo kĩrĩa heanaga, nĩguo ndĩhe o mũndũ kũringana na ciĩko ciake.+ 13 Nĩ niĩ Alifa na Omega,*+ wa mbere na wa mũico, kĩambĩrĩria o na kĩrĩkĩrĩro. 14 Gũkena nĩ arĩa mathambagia kanjũ ciao,+ nĩgetha magĩe na kĩhooto gĩa gũthiĩ harĩ mĩtĩ ya muoyo+ na mahote kũingĩra thĩinĩ wa itũũra magereire ihingo-inĩ ciarĩo.+ 15 Nja nĩ ngui irĩ kuo* na arĩa mekaga maũndũ ma ũgo na arĩa mamenyerete kwĩingĩria thĩinĩ wa ngomanio itagĩrĩire* na oragani na ahoi mĩhianano na arĩa othe mendete na maragia maũndũ ma maheeni.’+
16 “‘Niĩ, Jesu, ndatũmire mũraika wakwa agũkinyĩrie ũira wĩgiĩ maũndũ macio nĩ ũndũ wa ciũngano. Nĩ niĩ mũri wa Daudi+ na nĩ niĩ rũciaro rwake na njata ĩrĩa ĩcangararĩte ya rũcinĩ.’”+
17 Na roho na mũhiki+ maikaraga makiugaga, “Ũka!” nake mũndũ wothe ũkũigua nĩ oige, “Ũka!” ũrĩa wothe mũnyotu nĩ oke;+ ũrĩa wothe ũkwenda nĩ anyue maĩ ma muoyo hatarĩ marĩhi.+
18 “Ndĩraruta ũira harĩ mũndũ wothe ũrĩa ũkũigua ciugo cia ũrathi wa gĩkũnjo gĩkĩ: Mũndũ angĩongerera ũndũ harĩ maũndũ macio,+ Ngai nĩ akaamuongerera mahũũra marĩa mandĩkĩtwo gĩkũnjo-inĩ gĩkĩ;+ 19 na mũndũ o wothe angĩeheria ũndũ o na ũrĩkũ harĩ ciugo cia gĩkũnjo kĩa ũrathi ũyũ, Ngai nĩ akeeheria igai rĩake kuuma harĩ mĩtĩ ya muoyo+ na kuuma harĩ itũũra rĩrĩa itheru,+ maũndũ marĩa mandĩkĩtwo thĩinĩ wa gĩkũnjo gĩkĩ.
20 “Ũrĩa ũrutaga ũira wĩgiĩ maũndũ macio aroiga, ‘Ĩĩ, nĩ ngũka o narua.’”+
“Ameni! Ũka, Mwathani Jesu.”
21 Ũtugi mũnene wa Mwathani Jesu ũroikara hamwe na arĩa aamũre.