Ũhoro Mwega Ũrĩa Waandĩkirũo nĩ Mathayo
14 Hĩndĩ ĩyo, Herode mũtongoria wa gĩcigo kĩu, akĩigua ũhoro wĩgiĩ Jesu+ 2 na akĩra ndungata ciake ũũ: “Ũcio nĩ Johana Mũbatithania. Nĩ ariũkĩtio kuuma kũrĩ arĩa akuũ, na nĩkĩo arahota gwĩka mawĩko macio ma hinya.”+ 3 Herode* nĩ aakoretwo anyitĩte Johana na akamũikia njera tondũ wa Herodia mũtumia wa Filipu mũrũ wa ithe.+ 4 Nĩ gũkorũo Johana nĩ aamwĩraga ũũ: “Ndwagĩrĩirũo kũmũtua mũtumia waku.”+ 5 No rĩrĩ, o na gũtuĩka nĩ eendaga kũmũũraga, nĩ eetigagĩra andũ tondũ moonaga arĩ mũnabii.+ 6 No rĩrĩa maakũngũyagĩra mũthenya wa gũciarũo kwa Herode,+ mwarĩ wa Herodia agĩthũngũtha mbere ya andũ na agĩkenia Herode mũno+ 7 nginya Herode akĩĩhĩta kũmũhe kĩrĩa gĩothe angĩamũhoire. 8 Nake thutha wa gũtaarũo nĩ nyina, akĩmwĩra: “Ngwenda ũũhe mũtwe wa Johana Mũbatithania ũigĩrĩirũo thani-inĩ.”+ 9 O na gũtuĩka mũthamaki nĩ aanyitirũo nĩ kĩeha, agĩathana ũneanwo nĩ ũndũ wa mwĩhĩtwa wake na nĩ ũndũ wa andũ acio maarĩanagĩra* nake. 10 Nĩ ũndũ ũcio agĩtũmana na Johana akĩrengwo mũtwe arĩ njera. 11 Mũtwe wake ũkĩrehwo ũrĩ thani-inĩ na ũkĩnengerũo mũirĩtu ũcio, nake akĩũtwarĩra nyina. 12 Thutha-inĩ arutwo ake magĩũka, makĩeheria mwĩrĩ wake, makĩũthika; magĩcoka magĩthiĩ makĩhe Jesu ũhoro ũcio. 13 Rĩrĩa Jesu aaiguire ũguo, akiuma kũu na gatarũ, agĩthiĩ kũndũ gũtaarĩ andũ nĩguo akorũo arĩ wiki. No hĩndĩ ĩrĩa kĩrĩndĩ kĩamenyire ũguo, gĩkĩmũrũmĩrĩra na magũrũ kiumĩte matũũra-inĩ.+
14 Rĩrĩa aakinyire rũteere-inĩ rwa iria, akĩona kĩrĩndĩ kĩnene, agĩkĩiguĩra tha,+ na akĩhonia arĩa maarĩ arwaru.+ 15 No rĩrĩa gwakinyire hwaĩ-inĩ, arutwo ake magĩthiĩ harĩ we makĩmwĩra ũũ: “Kũndũ gũkũ nĩ werũ-inĩ na mathaa nĩ mathiĩte mũno; ĩra kĩrĩndĩ gĩkĩ kiumagare, nĩguo mathiĩ icagi-inĩ makegũrĩre irio.”+ 16 No Jesu akĩmeera atĩrĩ: “Matirabatara gũthiĩ, inyuĩ mahei kĩndũ gĩa kũrĩa.” 17 Nao makĩmũcokeria: “Tũtirĩ na kĩndũ haha tiga o mĩgate ĩtano na thamaki igĩrĩ.” 18 Akiuga atĩrĩ: “Cirehei haha ndĩ.” 19 Akĩra kĩrĩndĩ gĩikare thĩ nyeki-inĩ. Agĩcoka akĩoya mĩgate ĩyo ĩtano na thamaki icio igĩrĩ, akĩrora igũrũ akĩhoya kĩrathimo,+ na thutha wa kwenyũranga mĩgate, akĩnengera arutwo ake, nao makĩgaĩra kĩrĩndĩ. 20 Andũ othe makĩrĩa makĩhũna, na makĩũngania cienyũ iria ciatigarire ikĩiyũra ikabu 12.+ 21 Na rĩrĩ, arĩa maarĩire maarĩ arũme ta 5,000, o hamwe na atumia na ciana.+ 22 O rĩo akĩra arutwo ake maingĩre gatarũ maringage mwena ũcio ũngĩ wa iria nake agĩtigwo akiugĩra kĩrĩndĩ ũhoro.+
23 Na arĩkia kuugĩra kĩrĩndĩ ũhoro, akĩambata kĩrĩma-inĩ arĩ wiki nĩguo akahoe.+ Na rĩrĩa gwatukire, aarĩ kũu arĩ o wiki. 24 Hĩndĩ ĩyo gatarũ kaarĩ mita magana maingĩ* kuuma thĩ nyũmũ gakĩhũũrũo nĩ makũmbĩ, tondũ rũhuho rwahurutanaga rwerekeire mwena ũrĩa mooimaga. 25 No hĩndĩ ya ituanĩra rĩa kana rĩa ũtukũ,* agĩthiĩ kũrĩ o agereire maĩ igũrũ. 26 Rĩrĩa arutwo maamuonire agereire igũrũ rĩa iria, magĩĩtigĩra mũno makiuga ũũ: “Gĩkĩ nĩ kĩoneki kĩa magegania!” Na magĩkaya nĩ guoya. 27 Hĩndĩ o ĩyo Jesu akĩmeera atĩrĩ: “Gĩai na ũmĩrĩru! Nĩ niĩ; mũtigetigĩre.”+ 28 Nake Petero akĩmũcokeria akĩmwĩra: “Mwathani, angĩkorũo nĩwe, njĩĩra njũke ngereire maĩ igũrũ.” 29 Agĩkĩmwĩra ũũ: “Ũka!” Nĩ ũndũ ũcio Petero akiuma gatarũ-inĩ, agĩthiĩ agereire maĩ igũrũ erekeire kũrĩ Jesu. 30 No rĩrĩa aarorire kĩhuhũkanio, agĩĩtigĩra. Na rĩrĩa aambĩrĩirie kũrikĩra, agĩkaya akiuga atĩrĩ: “Mwathani, honokia!” 31 Nake Jesu agĩtambũrũkia guoko narua, akĩmũnyita akĩmwĩra: “Wee ũrĩ na wĩtĩkio mũnini, wathangania nĩkĩ?”+ 32 Na rĩrĩa maaingĩrire thĩinĩ wa gatarũ, kĩhuhũkanio gĩgĩthira. 33 Nao arĩa maarĩ thĩinĩ wa gatarũ makĩmũinamĩrĩra makiuga: “Wee kũna ũrĩ Mũrũ wa Ngai.” 34 Makĩringa mwena ũrĩa ũngĩ makiumĩrĩra Genesareti.+
35 Rĩrĩa andũ a kũu maamenyire nĩ we, magĩtũma ndũmĩrĩri bũrũri-inĩ wothe ũrĩa wamathiũrũrũkĩirie, nao andũ makĩmũrehera arĩa othe maarĩ arwaru. 36 Nao makĩmũthaitha etĩkĩre mahutie na arĩ gĩcũrĩ kĩa nguo yake ya igũrũ.+ Na arĩa othe maakĩhutirie makĩhonio biũ.