Ũhoro Mwega Ũrĩa Waandĩkirũo nĩ Mathayo

7 “Tigai gũtuagĩra andũ+ arĩa angĩ nĩguo mũtikanatuĩrũo; 2 nĩ gũkorũo ituĩro rĩrĩa mũtuanagĩra narĩo, norĩo mũgaatuĩrũo narĩo,+ na gĩthimi kĩrĩa mũthimagĩra andũ nakĩo, nokĩo marĩmũthimagĩra nakĩo.+ 3 Kwoguo-rĩ, nĩ kĩĩ gĩgũtũma ũrore kahuti karĩa karĩ riitho rĩa mũrũ wa Ithe wanyu no ndũrona rũbito rũrĩa rũrĩ riitho rĩaku?+ 4 Ningĩ ũngĩhota atĩa kwĩra mũrũ wa Ithe wanyu, ‘Reke ngũrute kahuti kau karĩ riitho rĩaku,’ na riitho rĩaku mwene rĩrĩ na rũbito? 5 Hinga ĩno! Amba ũrute rũbito rũu rũrĩ riitho rĩaku mwene, na thutha ũcio nĩ ũkũhota kuona wega ũrĩa ũkũruta kahuti kau karĩ riitho rĩa mũrũ wa Ithe wanyu.

6 “Mũtikanahe ngui indo iria nyamũre, o na kana mũikĩrie ngũrũe ruru cianyu,+ nĩgetha itikanacirangĩrĩrie thĩ icoke igarũrũke imũtharĩkĩre.

7 “Thiĩi na mbere kũhoya, na nĩ mũkũheo;+ thiĩi na mbere gũcaria, na nĩ mũkuona; thiĩi na mbere kũringaringa, na nĩ mũkũhingũrĩrũo;+ 8 tondũ mũndũ o wothe ũhoyaga nĩ aheagwo,+ na mũndũ o wothe ũcaragia nĩ onaga, na mũndũ o wothe ũrĩringaringaga, nĩ arĩhingũragĩrũo. 9 Nũũ kũna gatagatĩ-inĩ kanyu ũngĩhoywo mũgate nĩ mũrũwe amũhe ihiga? 10 Kana angĩmũhoya thamaki-rĩ, hihi no amũhe nyoka? 11 Nĩ ũndũ ũcio-rĩ, angĩkorũo inyuĩ o na gũtuĩka mũrĩ oru nĩ mũĩ kũhe ciana cianyu iheo njega-rĩ, na githĩ Ithe wanyu wa igũrũ, ndarĩheaga arĩa mamũhoyaga+ indo njega+ o na makĩria!

12 “Nĩ ũndũ ũcio, maũndũ mothe marĩa mũngĩenda andũ arĩa angĩ mamwĩkage, no mũhaka o na inyuĩ mũmekage o tamo.+ Nĩ gũkorũo ũcio nĩguo ũrutani wa Watho na Anabii.+

13 “Tonyerai mũromo ũrĩa mũceke,+ tondũ mũromo nĩ mwariĩ na njĩra ĩrĩa ĩkinyagia andũ harĩ kũniinwo nĩ njariĩ, na andũ arĩa aingĩ nĩyo mageraga; 14 no mũromo nĩ mũceke na njĩra ĩrĩa ĩkinyagia andũ muoyo-inĩ nĩ ngunderu, na andũ arĩa mamĩonaga nĩ anini.+

15 “Mwĩhũgagei anabii a maheeni+ arĩa mokaga kũrĩ inyuĩ mehumbĩte rũũa rwa ngʼondu,+ no thĩinĩ nĩ njũi ndĩani.+ 16 Nĩ mũrĩmamenyaga kũgerera maciaro mao. Hihi kũrĩ hĩndĩ andũ mangĩgetha thabibũ kuuma mĩigua-inĩ kana magethe ngũyũ kuuma ria-inĩ?+ 17 O ũndũ ũmwe na ũcio, mũtĩ wothe mwega ũciaraga maciaro mega, no mũtĩ wothe mũbuthu ũciaraga maciaro moru.+ 18 Mũtĩ mwega ndũngĩciara maciaro moru, o na kana mũtĩ mũbuthu ũciare maciaro mega.+ 19 Mũtĩ o wothe ũtaciaraga maciaro mega nĩ gũtemwo ũtemagwo na ũgaikio mwaki-inĩ.+ 20 Kwoguo-rĩ, andũ acio nĩ mũrĩmamenyaga kũgerera maciaro mao.+

21 “Ti mũndũ o wothe ũnjĩtaga, ‘Mwathani, Mwathani,’ ũkaaingĩra Ũthamaki-inĩ wa igũrũ, no nĩ ũrĩa wĩkaga wendi wa Ithe witũ wa igũrũ ũkaaingĩra.+ 22 Mũthenya ũcio andũ aingĩ nĩ makaanjũria atĩrĩ: ‘Mwathani, Mwathani,+ githĩ tũtiarathaga mohoro na rĩĩtwa rĩaku, na tũkaingata ndaimono na rĩĩtwa rĩaku, o na tũgĩka mawĩko maingĩ ma hinya na rĩĩtwa rĩaku?’+ 23 Na hĩndĩ ĩyo nĩ ngaameera atĩrĩ: ‘Niĩ ndirĩ hĩndĩ ndamũĩ! Njehererai, inyuĩ mwĩkaga maũndũ ma uuni-watho!’+

24 “Nĩ ũndũ ũcio, mũndũ wothe ũkũigua ciugo icio ciakwa na aciathĩkĩre atariĩ ta mũndũ mũũgĩ ũrĩa waakire nyũmba yake igũrũ rĩa rwaro rwa ihiga.+ 25 Nayo mbura ĩkiura, gũkĩgĩa mũiyũro na huho nene ikĩhurutana na ikĩhũũra nyũmba ĩyo, no ndĩagũire tondũ yaakĩtwo igũrũ rĩa rwaro rwa ihiga. 26 Ningĩ-rĩ, mũndũ wothe ũkũigua ciugo icio ciakwa na age gũciathĩkĩra atariĩ ta mũndũ mũkĩgu ũrĩa waakire nyũmba yake igũrũ rĩa mũthanga.+ 27 Nayo mbura ĩkiura, gũkĩgĩa mũiyũro, na huho nene ikĩhurutana na ikĩhũũra nyũmba ĩyo,+ nayo ĩkĩgwa na ĩkĩmomoka ĩkĩanangĩka biũ.”

28 Rĩrĩa Jesu aarĩkirie kwaria maũndũ macio, kĩrĩndĩ gĩkĩgegio nĩ njĩra yake ya kũrutana,+ 29 tondũ aamarutaga ta mũndũ warĩ na wathani,+ no ti ta andĩki ao a watho.