Ezekieli

34 Kiugo kĩa Jehova nĩ kĩanginyĩire o rĩngĩ ngĩrũo atĩrĩ: 2 “Mũrũ wa mũndũ, ratha ũhoro wa gũũkĩrĩra arĩithi a Isiraeli. Ratha ũhoro wĩre arĩithi acio ũũ, ‘Jehova Mwathani Ũrĩa Mũnene ekuuga atĩrĩ: “Kaĩ arĩithi a Isiraeli marĩ na haaro-ĩ,+ o acio merĩithagia o ene! Githĩ arĩithi matiagĩrĩirũo kũrĩithagia rũũru?+ 3 Inyuĩ mũrĩaga maguta ma ngʼondu, mũkehumba guoya wacio, na mũgathĩnja nyamũ ĩrĩa noru biũ,+ no mũtirĩithagia rũũru.+ 4 Ngʼondu iria itarĩ hinya mũticiĩkagĩra hinya kana mũkahonia iria ndwaru kana mũkoha iria igurarĩtio kana mũgacokia iria cieherete rũũru-inĩ o na kana mũgacaria iria ciũrĩte;+ handũ ha ũguo, mũciathaga mũtarĩ na tha na mũgacihinyĩrĩria.+ 5 Nĩkĩo ciahurunjũkire tondũ itiarĩ na mũrĩithi;+ ciahurunjũkire igĩtuĩka irio cia nyamũ o yothe ya gĩthaka. 6 Ngʼondu ciakwa ciorũraga irĩma-inĩ ciothe na karĩma-inĩ o gothe karaihu; ngʼondu ciakwa ciahurunjũkĩte kũndũ guothe thĩinĩ wa thĩ, na gũtirĩ mũndũ wacicaragia kana akorĩrĩria harĩa irĩ.

7 “‘“Nĩ ũndũ ũcio, iguai kiugo kĩa Jehova inyuĩ arĩithi: 8 ‘“O ta ũrĩa niĩ ndũũraga muoyo,” ũguo nĩguo Jehova Mwathani Ũrĩa Mũnene ekuuga, “tondũ ngʼondu ciakwa nĩ ituĩkĩte kĩndũ gĩa kũhĩtwo nĩ nyamũ, igatuĩka irio cia nyamũ o yothe ya gĩthaka tondũ gũtiarĩ na mũrĩithi, nao arĩithi akwa matiacaririe ngʼondu ciakwa; handũ ha ũguo nĩ kwĩrĩithia meerĩithagia na matiarĩithirie ngʼondu ciakwa,”’ 9 iguai kiugo kĩa Jehova inyuĩ arĩithi. 10 Jehova Mwathani Ũrĩa Mũnene ekuuga atĩrĩ: ‘Nĩ ngũũkĩrĩra arĩithi, na ndĩmorie ngʼondu ciakwa, na nĩ ngaamatigithia wĩra wa kũrĩithia* ngʼondu ciakwa,+ na arĩithi acio matigaacoka kwĩrĩithia o ene. Nĩ ngaahonokia ngʼondu ciakwa kuuma tũnua-inĩ twao na itigaacoka gũtuĩka irio ciao.’”

11 “‘Nĩ gũkorũo Jehova Mwathani Ũrĩa Mũnene oigĩte ũũ: “Atĩrĩrĩ, niĩ mwene nĩ ngaacaria ngʼondu ciakwa, na nĩ ngaacirũmbũiya.+ 12 Ngaarũmbũiya ngʼondu ciakwa o ta mũrĩithi wonete ngʼondu ciake iria ciahurunjũkĩte na agacirĩithia.+ Ngaacihonokia kuuma kũrĩa guothe ciahurunjũkĩire mũthenya wa matu na nduma ndumanu.+ 13 Ngaaciruta ikundi-inĩ cia andũ na ndĩcicokanĩrĩrie hamwe kuuma mabũrũri-inĩ ndĩcicokie bũrũri-inĩ wacio na ndĩcirĩithie irĩma-inĩ cia Isiraeli,+ hakuhĩ na tũrũũĩ na ciikaro-inĩ ciothe cia bũrũri. 14 Ngaacirĩithia kũndũ kũrĩ na ũrĩithio mwega, na bũrũri ũrĩa ikaarĩaga ũgaakorũo ũrĩ irĩma-inĩ iria ndaya cia Isiraeli.+ Ikaarahaga kũu kũrĩ na ũrĩithio mwega+ na ikaarĩaga kũndũ kũrĩa kwega irĩma-inĩ cia Isiraeli.”

15 “‘“Niĩ mwene nĩ ngaarĩithia ngʼondu ciakwa,+ na niĩ mwene nĩ ngaatũma ciarahe,”+ ũguo nĩguo Jehova Mwathani Ũrĩa Mũnene oigĩte. 16 “Nĩ ngaacaria ĩrĩa yũrĩte,+ njokie ĩrĩa yeherete rũũru-inĩ, njohe ĩrĩa ĩgurarĩtio, nayo ĩrĩa ĩtarĩ hinya ndĩmĩĩkĩre hinya; no nĩ ngaaniina ĩrĩa noru na ĩrĩa ĩrĩ na hinya. Ngaamĩrĩithia na ituĩro.”

17 “‘Na inyuĩ ngʼondu ciakwa-rĩ, Jehova Mwathani Ũrĩa Mũnene ekuuga ũũ: “Ndĩ hakuhĩ gũtuithania ciira gatagatĩ ka ngʼondu ĩmwe na ĩrĩa ĩngĩ, nduithanie ciira gatagatĩ ka ndũrũme na thenge.+ 18 Kaĩ mũtaiganĩtwo nĩ kũrĩaga ũrĩithio ũrĩa mwega biũ? No mũhaka mũrangĩrĩrie ũrĩithio ũcio ũngĩ wanyu na makinya manyu? Na thutha wa kũnyua maĩ marĩa matheru biũ-rĩ, no mũhaka munjuge maĩ macio na magũrũ manyu mũgatũma magĩe gĩko? 19 Hihi no nginya ngʼondu ciakwa irĩe ũrĩithio ũrĩa mũrangĩrĩirie na makinya manyu na inyue maĩ marĩa munjugĩte na magũrũ manyu mũgatũma magĩe gĩko?”

20 “‘Nĩ ũndũ ũcio, Jehova Mwathani Ũrĩa Mũnene ekuuga ũũ: “Atĩrĩrĩ, niĩ mwene nĩ ngaatuithania ciira gatagatĩ ka ngʼondu ĩrĩa noru na ĩrĩa hĩnju, 21 nĩ gũkorũo mwacitindĩkaga na mwena o na ciande cianyu, nacio iria ndwaru mũgacitindĩka na hĩa cianyu nginya mũgĩcihurunja kũndũ kũraya. 22 Na nĩ ngaahonokia ngʼondu ciakwa, na itigaacoka gũtuĩka kĩndũ gĩa kũhĩtwo nĩ nyamũ;+ ningĩ nĩ ngaatuithania ciira gatagatĩ ka ngʼondu ĩmwe na ĩrĩa ĩngĩ. 23 Nĩ ngaarahũra mũrĩithi ũmwe igũrũ rĩacio,+ na nĩwe Daudi ndungata yakwa,+ nake nĩ agaacirĩithia. We mwene nĩ agaacirĩithia na atuĩke mũrĩithi wacio.+ 24 Na niĩ Jehova nĩ ngaatuĩka Ngai wacio,+ nake Daudi ndungata yakwa atuĩke mũtongoria gatagatĩ-inĩ gacio.+ Niĩ mwene, Jehova, nĩ njarĩtie.

25 “‘“Na nĩ ngaarĩkanĩra kĩrĩkanĩro gĩa thayũ hamwe nacio,+ na njeherie nyamũ njũru cia gĩthaka thĩinĩ wa bũrũri,+ nĩgetha cikarage irĩ na ũgitĩri werũ-inĩ na ciarahage mĩtitũ-inĩ.+ 26 Nĩ ngaatũma ituĩke kĩrathimo, o nakuo kũndũ kũrĩa gũthiũrũrũkĩirie karĩma gakwa gũtuĩke kĩrathimo,+ na nĩ ngoiragia mbura ihinda rĩrĩa rĩagĩrĩire. Irathimo igaaikũrũkaga o ta mbura.+ 27 Mĩtĩ ya mũgũnda nĩ ĩkaarutaga maciaro mayo, na tĩri nĩ ũkaaruta maciaro maguo,+ nacio igaaikaraga bũrũri-inĩ irĩ na thayũ. Na nĩ ikaamenya atĩ niĩ nĩ niĩ Jehova rĩrĩa ngoinanga mĩtĩ yacio ya icoki+ na ndĩcihonokie kuuma harĩ arĩa maacituĩte ngombo. 28 Itigaacoka gũtuĩka kĩndũ gĩa kũhĩtwo nĩ ndũrĩrĩ, nacio nyamũ cia gĩthaka cia gũkũ thĩ itigaacoka gũcitambura, na igaaikaraga na thayũ gũtarĩ mũndũ ũgũtũma cigue guoya.+

29 “‘“Nĩ ngaacithondekera mũgũnda ũrĩ igweta,* na itigaacoka gũkua nĩ ngʼaragu bũrũri-inĩ,+ kana gũconorithio nĩ ndũrĩrĩ.+ 30 ‘Nacio nĩ ikaamenya atĩ niĩ Jehova Ngai wacio ndĩ hamwe nacio, na atĩ ngʼondu icio, o cio nyũmba ya Isiraeli, nĩ andũ akwa,’+ ũguo nĩguo Jehova Mwathani Ũrĩa Mũnene oigĩte.”’

31 “‘Na inyuĩ ngʼondu ciakwa,+ o inyuĩ ngʼondu iria nũmbũyagia-rĩ, inyuĩ mũrĩ andũ, na niĩ ndĩ Ngai wanyu,’ ũguo nĩguo Jehova Mwathani Ũrĩa Mũnene oigĩte.”