Ũhoro Mwega Ũrĩa Waandĩkirũo nĩ Luka
10 Thutha wa maũndũ macio Mwathani agĩthuura angĩ 70 na akĩmatũma marĩ erĩ erĩ+ mathiĩ mbere yake matũũra-inĩ mothe na kũndũ kũrĩa guothe we mwene aarĩ athiĩ. 2 Agĩcoka akĩmeera atĩrĩ: “Magetha nĩ maingĩ, no aruti wĩra nĩ anini. Kwoguo-rĩ, hoyai Mwene magetha atũme aruti wĩra magetha-inĩ make.+ 3 Thiĩi! Na atĩrĩrĩ, ndĩramũtũma mũtariĩ ta tũgondu gatagatĩ-inĩ ka njũi.+ 4 Mũtigakuue kamondo ka mbeca kana mondo ya irio kana iratũ,+ na mũtikageithie mũndũ o na ũ* njĩra-inĩ. 5 Kũrĩa guothe mũkũingĩra thĩinĩ wa nyũmba, ambai muuge: ‘Nyũmba ĩno ĩrogĩa na thayũ.’+ 6 Na angĩkorũo kũu nĩ kũrĩ na mũrata wa thayũ, thayũ wanyu nĩ ũgũka igũrũ rĩake. No angĩkorũo gũtirĩ, nĩ ũkũmũcokerera. 7 Nĩ ũndũ ũcio, ikarai nyũmba ĩyo,+ mũrĩe na mũnyue kĩrĩa maramũhe,+ tondũ mũruti wĩra nĩ agĩrĩire mũcara wake.+ Mũtigaikare mũgĩthaamaga kuuma nyũmba ĩmwe nginya ĩrĩa ĩngĩ.
8 “Ningĩ-rĩ, kũrĩa guothe mũkũingĩra thĩinĩ wa itũũra na mamwamũkĩre, rĩai kĩrĩa mekũmũhe 9 na mũhonie arĩa arwaru kuo na mũmeere ũũ: ‘Ũthamaki wa Ngai nĩ ũmũkuhĩrĩirie.’+ 10 No kũrĩa guothe mũkũingĩra thĩinĩ wa itũũra na mage kũmwamũkĩra, umai mũthiĩ barabara-inĩ ciakuo iria nene na muuge atĩrĩ: 11 ‘O na rũkũngũ rwa itũũra rĩanyu nĩ twarũhuura ruume magũrũ-inĩ maitũ.+ No rĩrĩ, menyai ũũ, Ũthamaki wa Ngai nĩ ũkuhĩrĩirie.’ 12 Ngũmwĩra atĩrĩ, Sodomu nĩ ĩgeetiiria mũthenya ũcio gũkĩra itũũra rĩu.+
13 “Wee Korazini, kaĩ ũrĩ na haaro-ĩ! Wee Bethisaida, kaĩ ũrĩ na haaro-ĩ! tondũ korũo mawĩko ma hinya marĩa mwekĩirũo meekirũo Turo na Sidoni, andũ a kuo mangĩeririre tene na magaikara thĩ meehumbĩte nguo cia makũnia na mehurĩirie mũhu.+ 14 Nĩ ũndũ ũcio-rĩ, Turo na Sidoni nĩ igeetiiria hĩndĩ ya ituĩro kũmũkĩra inyuĩ. 15 Wee nawe Kaperinaumu, hihi nĩ gũtũũgĩrio ũgaatũgĩrio nginya igũrũ? Wee ũgaaikũrũka Mbĩrĩra-inĩ!*
16 “Mũndũ o wothe ũmũthikagĩrĩria inyuĩ, nĩ niĩ athikagĩrĩria.+ Na mũndũ o wothe ũmũregaga inyuĩ, o na niĩ nĩ andegaga. Makĩria ma ũguo, mũndũ o wothe ũndegaga aregaga nginya Ũrĩa wandũmire.”+
17 Nao acio 70 magĩcoka marĩ na gĩkeno, makiuga: “Mwathani, o na ndaimono nĩ iratwathĩkĩra twaciatha na rĩĩtwa rĩaku.”+ 18 Aigua ũguo akĩmeera: “Ndĩrona Shaitani arĩkĩtie kũharũrũka+ ta rũheni kuuma igũrũ. 19 Atĩrĩrĩ, inyuĩ nĩ ndĩmũheete wathani wa gũkinyangĩrĩria nyoka na tũngʼaurũ, na wa gũtooria hinya wothe wa thũ,+ na gũtirĩ kĩndũ o na kĩmwe gĩkaamũgera ngero. 20 O na kũrĩ ũguo, mũtigakene tondũ maroho nĩ maramwathĩkĩra, no kenai nĩ gũkorũo marĩĩtwa manyu nĩ mandĩkĩtwo kũrĩa igũrũ.”+ 21 Na hĩndĩ ĩyo, akĩiyũrũo nĩ gĩkeno kĩnene nĩ ũndũ wa roho mũtheru na akiuga: “Awa, Mwathani wa igũrũ na thĩ, ndĩrakũgooca mbere ya andũ, nĩ tondũ maũndũ maya nĩ ũmahithĩte biũ andũ arĩa ogĩ na marĩ ũmenyo,+ ũkamaguũrĩria ciana nyinyi. Ũguo nĩguo kũrĩ, Awa, nĩ gũkorũo ũguo nĩguo wonete kwagĩrĩire.+ 22 Nĩ heetwo maũndũ mothe nĩ Awa, na gũtirĩ mũndũ ũĩ Mũriũ tiga Awa, na gũtirĩ mũndũ ũĩ Awa tiga Mũriũ+ na mũndũ o wothe ũrĩa Mũriũ endaga kũguũrĩria.”+
23 Agĩcoka akĩhũgũkĩra arutwo akĩmeera atĩrĩ hatarĩ andũ angĩ: “Gũkena-rĩ, nĩ maitho marĩa marona maũndũ marĩa inyuĩ mũrona.+ 24 Nĩ ũndũ ngũmwĩra atĩrĩ, anabii aingĩ na athamaki nĩ meeriragĩria kuona maũndũ marĩa inyuĩ mũrona no matiamonire,+ na kũigua maũndũ marĩa mũraigua no matiamaiguire.”
25 Na rĩrĩ, mũndũ ũmwe woĩ Watho wega akĩrũgama nĩguo amũgerie akiuga: “Mũrutani, ndĩrabatara gwĩka atĩa nĩguo ngaagaya muoyo wa tene na tene?”+ 26 Nake akĩmũũria atĩrĩ: “Kwandĩkĩtwo atĩa thĩinĩ wa Watho? Ũthomaga atĩa?” 27 Akĩmũcokeria ũũ: “‘No mũhaka wende Jehova* Ngai waku na ngoro yaku yothe na muoyo* waku wothe na hinya waku wothe na meciria maku mothe’+ na ‘mũndũ ũrĩa mũriganĩtie nake o ta ũrĩa wĩyendete wee mwene.’”+ 28 Nake akĩmwĩra atĩrĩ: “Nĩ wacokia ũrĩa kũrĩ; ĩkaga ũguo na nĩ ũkoona muoyo.”+
29 No mũndũ ũcio akĩenda kwĩyonania atĩ nĩ mũthingu,+ akĩũria Jesu: “Mũndũ ũrĩa tũriganĩtie nake kũna nũũ?” 30 Nake Jesu akĩmũcokeria akĩmwĩra: “Kwarĩ mũndũ waikũrũkaga oimĩte Jerusalemu erekeire Jeriko, akĩhobanĩrio nĩ atunyani, makĩmũruta nguo, makĩmũhũũra, na magĩthiĩ, makĩmũtiga arĩ hakuhĩ gũkua. 31 Na gũgĩkinya atĩrĩ, mũthĩnjĩri-Ngai ũmwe nĩ aaikũrũkaga barabara-inĩ ĩyo, no rĩrĩa aamuonire, akĩhĩtũkĩra mũkĩra ũcio ũngĩ. 32 O nake Mũlawii, rĩrĩa aakinyire hau na akĩmuona, akĩhĩtũkĩra mũkĩra ũcio ũngĩ. 33 No Mũsamaria+ ũmwe wagereire barabara-inĩ ĩyo agĩkinya harĩ we, na rĩrĩa aamuonire, akĩringwo nĩ tha. 34 Nĩ ũndũ ũcio akĩmũkuhĩrĩria, akĩmũitĩrĩria maguta na ndibei kũrĩa aatihangĩtio na akĩmuoha. Agĩcoka akĩmũhaicia igũrũ rĩa nyamũ yake mwene akĩmũtwara mũkawa-inĩ na akĩmũtungata. 35 Mũthenya ũyũ ũngĩ akĩruta dinari* igĩrĩ agĩcinengera mwene mũkawa, na akĩmwĩra: ‘Mũtungate, na kĩrĩa gĩothe ũkũhũthĩra makĩria ma ici, nĩ ngakũrĩha rĩrĩa ngaacoka.’ 36 Harĩ andũ acio atatũ-rĩ, wee ũkuona ta arĩ ũrĩkũ wekĩire mũndũ ũcio wahobanĩirio nĩ atunyani o ta mũndũ mariganĩtie nake?”+ 37 Akiuga atĩrĩ: “Nĩ ũcio wamwĩkĩire ciĩko cia tha.”+ Jesu agĩcoka akĩmwĩra: “Gĩthiĩ na wĩkage ũguo wee mwene.”+
38 Na rĩrĩa maathiaga, akĩingĩra gĩcagi-inĩ kĩmwe. Arĩ kũu-rĩ, mũtumia ũmwe wetagwo Maritha+ akĩmũnyita ũgeni gwake mũciĩ. 39 Ningĩ nĩ aarĩ na mwarĩ wa nyina wetagwo Mariamu, ũrĩa waikarire thĩ magũrũ-inĩ ma Mwathani na nĩ gũthikĩrĩria aathikagĩrĩria ũrĩa ooigaga.* 40 No Maritha nake agĩtahwo nĩ mĩhangʼo mĩingĩ. Nĩ ũndũ ũcio agĩthiĩ harĩ we akĩmwĩra: “Mwathani, kaĩ ũtarona atĩ mwarĩ wa maitũ nĩ andigire ngĩhangʼĩra maũndũ ndĩ nyiki? Mwĩre oke andeithie.” 41 Nake Mwathani akĩmũcokeria akĩmwĩra atĩrĩ: “Maritha, Maritha, ũratangĩka na ũgethĩnia nĩ ũndũ wa maũndũ maingĩ. 42 Ĩndĩ no maũndũ manini marabatarania, kana o ũmwe tu. Ha ũhoro wake-rĩ, Mariamu athuurĩte ũndũ ũrĩa mwega,*+ na ndangĩtunywo.”