Ũhoro Mwega Ũrĩa Waandĩkirũo nĩ Luka

22 Na rĩrĩ, Gĩathĩ kĩa Mĩgate Ĩtarĩ Mĩimbie, kĩrĩa gĩtagwo Pasaka,+ nĩ gĩakuhĩrĩirie.+ 2 Na anene a athĩnjĩri-Ngai na andĩki-watho nĩ maacaragia njĩra njagĩrĩru ya kũmũũraga,+ tondũ nĩ meetigagĩra andũ.+ 3 Nake Shaitani akĩingĩra thĩinĩ wa Judasi, ũrĩa wetagwo Mũisikariota, ũmwe wa arĩa Ikũmi na Erĩ,+ 4 na agĩthiĩ kũrĩ anene a athĩnjĩri-Ngai na anene a hekarũ akĩaria nao ũrĩa angĩmũkunyanĩra kũrĩ o.+ 5 Magĩkenio nĩ ũndũ ũcio na makĩiguithanĩria mamũhe mbeca cia betha.+ 6 Kwoguo agĩtĩkĩra na akĩambĩrĩria gũcaria mweke mwega wa kũmũkunyanĩra kũrĩ o hatarĩ kĩrĩndĩ hakuhĩ.

7 Mũthenya wa Mĩgate Ĩtarĩ Mĩimbie ũgĩkinya, rĩrĩa igongona rĩa Pasaka rĩarutagwo;+ 8 nĩ ũndũ ũcio Jesu agĩtũma Petero na Johana, akĩmeera ũũ: “Thiĩi mũgatũhaarĩrĩrie Pasaka tũrĩe.”+ 9 Nao makĩmũũria: “Ũkwenda tũkamĩhaarĩrĩrie kũ?” 10 Nake akĩmeera ũũ: “Atĩrĩrĩ, mwatonya thĩinĩ wa itũũra, nĩ mũgũtũngwo nĩ mũndũ ũkuuĩte ndigithũ ya rĩũmba ya maĩ. Mũmũrũmĩrĩre nginya nyũmba ĩrĩa arĩingĩra.+ 11 Na mwĩre mwene nyũmba ĩyo, ‘Mũrutani aroria atĩrĩ: “Ĩrĩ ha rumu ya ageni kũrĩa niĩ na arutwo akwa tũngĩrĩĩra Pasaka?”’ 12 Nake mũndũ ũcio nĩ ekũmuonia rumu nene ya igũrũ, ĩrĩ na indo. Mĩhaarĩrĩriei kũu.” 13 Magĩthiĩ na magĩkora o ta ũrĩa aameerĩte, na makĩhaarĩria Pasaka.

14 Rĩrĩa thaa ciakinyire, agĩikara metha-inĩ arĩ hamwe na atũmwo.+ 15 Na akĩmeera ũũ: “Nĩ ngoretwo ngĩĩrirĩria mũno kũrĩanĩra Pasaka ĩno na inyuĩ itananyamarĩka; 16 tondũ ngũmwĩra atĩrĩ, ndikamĩrĩa rĩngĩ nginya ĩkaahingio thĩinĩ wa Ũthamaki wa Ngai.” 17 Na akĩoya gĩkombe, agĩcokia ngatho na akiuga: “Kei gĩkĩ mũnenganĩrĩrie, na o mũndũ akĩnyuĩre, 18 tondũ ngũmwĩra atĩrĩ, kuuma rĩu, ndikanyua ndibei ya maciaro ma mũthabibũ rĩngĩ o nginya Ũthamaki wa Ngai ũũke.”

19 Ningĩ akĩoya mũgate,+ agĩcokia ngatho, akĩwenyũranga, akĩmanengera, na akĩmeera: “Ũyũ ũrũgamĩrĩire mwĩrĩ wakwa,+ ũrĩa ũkũneanwo nĩ ũndũ wanyu.+ Ĩkagai ũũ nĩguo mũndirikanage.”+ 20 Agĩcoka agĩka o taguo na gĩkombe marĩkia kũrĩa irio cia hwaĩ-inĩ, akiuga: “Gĩkombe gĩkĩ kĩrũgamĩrĩire kĩrĩkanĩro kĩrĩa kĩerũ+ kũgerera thakame yakwa,+ ĩrĩa ĩgũitwo nĩ ũndũ wanyu.+

21 “No rĩrĩ, guoko kwa ũrĩa ũkũngunyanĩra kũrĩ hamwe na niĩ metha-inĩ.+ 22 Nĩ gũkorũo Mũrũ wa mũndũ nĩ ekũmũtiga inyuĩ o ta ũrĩa gũtuĩtwo;+ o na kũrĩ ũguo-rĩ, kaĩ mũndũ ũrĩa ũkũmũkunyanĩra arĩ na haaro-ĩ!”+ 23 Nao makĩambĩrĩria kũũrania nũũ gatagatĩ-inĩ kao weendaga gwĩka ũguo.+

24 O na kũrĩ ũguo, makĩambĩrĩria gũkararania mũno igũrũ rĩgiĩ nũũ warĩ mũnene gũkĩra arĩa angĩ.+ 25 No we akĩmeera: “Athamaki a ndũrĩrĩ metũũgagĩria igũrũ rĩa andũ, nao arĩa marĩ na wathani igũrũ rĩao magetwo Ateithania.+ 26 Ĩndĩ inyuĩ-rĩ, mũtiagĩrĩirũo gũkorũo mũtariĩ ũguo.+ No rekei ũrĩa mũnene gatagatĩ-inĩ kanyu atuĩke ta arĩ we mũnini,+ nake ũrĩa ũratongoria atuĩke ta arĩ we ũratungata. 27 Tondũ rĩrĩ, hihi nũũ mũnene, nĩ ũrĩa ũrarĩa* kana nĩ ũrĩa ũratungatanĩra? Githĩ ti ũrĩa ũrarĩa?* No niĩ ndĩ gatagatĩ-inĩ kanyu, ndariĩ ta ũrĩa ũratungatanĩra.+

28 “No rĩrĩ, inyuĩ nĩ inyuĩ mũkoretwo hamwe na niĩ+ magerio-inĩ makwa;+ 29 na nĩ ndarĩkanĩra kĩrĩkanĩro na inyuĩ, o ta ũrĩa Awa aarĩkanĩire kĩrĩkanĩro na niĩ, kĩa ũthamaki,+ 30 nĩguo mũkaarĩagĩra na mũkanyuĩra metha-inĩ yakwa thĩinĩ wa Ũthamaki wakwa,+ na mũikarĩre itĩ cia ũnene+ mũtuagĩre mĩhĩrĩga ĩrĩa 12 ya Isiraeli ciira.+

31 “Simoni, Simoni, atĩrĩrĩ, Shaitani nĩ oigĩte atĩ nĩ arenda kũmũthũngũthia inyuothe o ta ngano.+ 32 No nĩ ngũthaithanĩrĩire nĩguo wĩtĩkio waku ndũkage hinya;+ nawe wacoka, ĩkĩra ariũ a Ithe wanyu hinya.”+ 33 Nake akĩmwĩra: “Mwathani, nĩ ndĩhaarĩirie gũthiĩ hamwe nawe kĩoho-inĩ o na gĩkuũ-inĩ.”+ 34 No we akĩmũcokeria: “Ngũkwĩra atĩrĩ Petero, ũmũthĩ ngũkũ ĩtanakũga nĩ ũkũngaana maita matatũ.”+

35 Ningĩ akĩmoria atĩrĩ: “Rĩrĩa ndamũtũmire mũtarĩ na kamondo ka mbeca na mondo ya irio na iratũ-rĩ,+ nĩ harĩ kĩndũ mwaagire?” Makĩmwĩra: “Aca!” 36 Nake akĩmeera: “No rĩu ũrĩa ũrĩ na kamondo ka mbeca nĩ akoe, na ũrĩa ũrĩ na mondo ya irio eke o taguo, nake ũrĩa ũtarĩ rũhiũ rwa njora endie nguo yake ya igũrũ agũre rũhiũ rwa njora. 37 Tondũ ngũmwĩra atĩrĩ, ũndũ ũyũ mwandĩke no mũhaka ũhinge harĩ niĩ, ‘Aataranĩirio hamwe na oini-watho.’+ Nĩ gũkorũo ũndũ ũcio nĩ ũrahinga harĩ niĩ.”+ 38 Nao makĩmwĩra: “Mwathani, haha tũrĩ na hiũ igĩrĩ cia njora.” Nake akĩmeera: “Icio nĩ njiganu.”

39 Rĩrĩa ooimire, agĩthiĩ Kĩrĩma-inĩ kĩa Mĩtamaiyũ o ta ũrĩa aamenyerete, nao arutwo makĩmũrũmĩrĩra.+ 40 Maakinya kuo, akĩmeera atĩrĩ: “Thiĩi na mbere kũhoya nĩguo mũtikaingĩre magerio-inĩ.”+ 41 Na akĩehera hau maarĩ agĩthiĩ itĩna ta rĩrĩa mũndũ angĩhota gũikia ihiga, agĩturia maru na akĩambĩrĩria kũhoya, 42 akiuga: “Awa, angĩkorũo nĩ ũkwenda, njehereria gĩkombe gĩkĩ. O na kũrĩ ũguo, reke wendi waku wĩkĩke, no ti wakwa.”+ 43 Nake mũraika kuuma igũrũ akĩmuumĩrĩra na akĩmwĩkĩra hinya.+ 44 No aarĩ na ruo rũingĩ ũũ atĩ agĩthiĩ na mbere kũhoya na kĩyo makĩria;+ nayo thithino yake ĩkĩhaana ta mataata ma thakame magĩtaata thĩ. 45 Rĩrĩa aarĩkirie kũhoya na agĩthiĩ harĩ arutwo, agĩkora makomete na manogete nĩ ũndũ wa kĩeha.+ 46 Akĩmoria atĩrĩ: “Mũrakoma nĩkĩ? Ũkĩrai na mũthiĩ na mbere kũhoya nĩguo mũtikaingĩre magerio-inĩ.”+

47 Na hĩndĩ o ĩyo aaragia, kĩrĩndĩ gĩgĩũka gĩtongoretio nĩ mũndũ ũrĩa wetagwo Judasi, ũmwe wa arĩa Ikũmi na Erĩ, na agĩkuhĩrĩria Jesu nĩguo amũmumunye.+ 48 No Jesu akĩmũũria atĩrĩ: “Judasi, ũrakunyanĩra Mũrũ wa mũndũ na njĩra ya kũmũmumunya?” 49 Rĩrĩa arĩa maarĩ hakuhĩ nake moonire ũrĩa gwathiaga, makĩmũũria: “Mwathani, tũmatharĩkĩre na rũhiũ rwa njora?” 50 O na ũmwe wao agĩtinia gũtũ kwa ũrĩo kwa ndungata ya mũthĩnjĩri-Ngai ũrĩa mũnene, gũkĩgwa.+ 51 No Jesu akiuga atĩrĩ: “Rĩu nĩ ũguo.” Na akĩhutia gũtũ kũu akĩmũhonia. 52 Jesu agĩcoka akĩra anene a athĩnjĩri-Ngai na anene a hekarũ na athuri arĩa mookĩte kũmũnyita atĩrĩ: “Muoka na hiũ cia njora na njũgũma ta muoka kũnyita mũtunyani?+ 53 Hĩndĩ ĩrĩa ndĩrakoragwo na inyuĩ thĩinĩ wa hekarũ o mũthenya,+ mũtiigana kũũnyita.+ No gaka nĩ kahinda kanyu, na ka wathani wa nduma.”+

54 Magĩcoka makĩmũnyita magĩthiĩ nake+ na makĩmũtwara thĩinĩ wa nyũmba ya mũthĩnjĩri-Ngai ũrĩa mũnene; no Petero nĩ aamarũmagĩrĩra arĩ haraya.+ 55 Rĩrĩa maakirie mwaki nja gatagatĩ na magĩikara thĩ, Petero aaikarĩte thĩ gatagatĩ-inĩ kao.+ 56 No rĩrĩa mũirĩtu ũmwe warĩ ndungata aamuonire aikarĩte thĩ ũtheri-inĩ wa mwaki, akĩmũbaara wega na akiuga: “O na mũndũ ũyũ oima hamwe nake.” 57 No agĩkaana, akiuga: “Mũirĩtu ũyũ, niĩ ndiũĩ mũndũ ũyũ.” 58 Thutha wa kahinda kanini, mũndũ ũngĩ akĩmuona na akĩmwĩra: “O nawe ũrĩ ũmwe wao.” No Petero akiuga: “Mũthuri ũyũ, niĩ ndirĩ ũmwe wao.”+ 59 Na thutha wa kĩndũ ithaa rĩmwe, mũndũ ũngĩ akĩambĩrĩria kuuga ũũ atĩtĩrithĩtie: “Ti itherũ o na mũndũ ũyũ oima hamwe nake, tondũ kũna nĩ Mũgalili!” 60 No Petero akiuga: “Mũthuri ũyũ, niĩ ndiũĩ ũrĩa ũroiga.” Na o hĩndĩ ĩyo aaragia, ngũkũ ĩgĩkũga. 61 Hĩndĩ ĩyo Mwathani akĩĩhũgũra akĩrora Petero, nake Petero akĩririkana ciugo cia Mwathani rĩrĩa aamwĩrĩte: “Ũmũthĩ ngũkũ ĩtanakũga, nĩ ũkũngaana maita matatũ.”+ 62 Akiuma nja na akĩrĩra arĩ na ruo rũnene.

63 Nao andũ arĩa maanyitĩte Jesu makĩambĩrĩria kũmũnyũrũria,+ makĩmũringaga;+ 64 na thutha wa kũmũhumbĩra ũthiũ, maamũũragia ũũ: “Tũrathĩre! Nũũ wakũringa?” 65 Na makiuga maũndũ mangĩ maingĩ ma kũmũruma.

66 Na gwakĩa, kĩama gĩa athuri a kĩrĩndĩ, hamwe na anene a athĩnjĩri-Ngai na andĩki-watho magĩcokanĩrĩra+ makĩmũtwara nyũmba ya Sanhedrini na makĩmwĩra ũũ: 67 “Akorũo wee nĩwe Kristo, twĩre.”+ No we akĩmeera: “O na ingĩmwĩra, mũtingĩtĩkia o na hanini. 68 Ningĩ-rĩ, o na ingĩmũũria kĩũria, mũtingĩnjokeria. 69 No rĩrĩ, kuuma rĩu, Mũrũ wa mũndũ+ nĩ egũikara thĩ guoko-inĩ kũrĩ hinya kwa ũrĩo kwa Ngai.”+ 70 Maigua ũguo, othe makĩmũũria: “Kwoguo-rĩ, wee nĩwe Mũrũ wa Ngai?” Nake akĩmeera: “Inyuĩ ene nĩ mwoiga atĩ nĩ niĩ we.” 71 Nao makiuga atĩrĩ: “Tũrakĩbatara ũira ũngĩ wa kĩ? Nĩ gũkorũo ithuĩ ene nĩ tweiguĩra kuuma kanua-inĩ gake mwene.”+