Marũa ma Mbere Kũrĩ Akorintho

9 Githĩ ndirĩ na wĩyathi? Githĩ ndirĩ mũtũmwo? Githĩ ndionete Jesu Mwathani witũ?+ Inyuĩ-rĩ, githĩ mũtiumanĩte na wĩra wakwa thĩinĩ wa Mwathani? 2 O na kũngĩtuĩka atĩ niĩ ndirĩ mũtũmwo kũrĩ andũ arĩa angĩ-rĩ, hatarĩ nganja ndĩ mũtũmwo harĩ inyuĩ! Nĩ gũkorũo inyuĩ nĩ inyuĩ mũhũũri wa gwĩkĩra mũkonde atĩ niĩ ndĩ mũtũmwo thĩinĩ wa Mwathani.

3 Ũũ nĩguo ngwĩtetera harĩ arĩa manduĩragia: 4 Githĩ tũtikoragwo na kĩhooto gĩa* kũrĩa na kũnyua? 5 Githĩ tũtikoragwo na kĩhooto kĩa mũndũ gũtwaranaga na mũtumia wake wĩtĩkĩtie,*+ o ta ũrĩa atũmwo arĩa angĩ na ariũ a nyina na Mwathani,+ o na Kefa*+ mekaga? 6 Kana niĩ na Baranaba+ no ithuĩ tũtarĩ na kĩhooto gĩa kwaga kũruta wĩra nĩguo tuone mabataro maitũ? 7 Nĩ mũthigari ũrĩkũ ũtungataga na akerĩhĩra kĩrĩa arabatara? Nĩ mũndũ ũrĩkũ ũhandaga mũgũnda wa mĩthabibũ na ndarĩe maciaro maguo?+ Kana rĩrĩ, nĩ mũndũ ũrĩkũ ũrĩithagia rũũru na ndanyue iria rĩa rũũru rũu?

8 Kaĩ maũndũ macio ndĩramoiga kũringana na mawoni ma andũ? Githĩ Watho o naguo ndugaga maũndũ macio? 9 Nĩ gũkorũo kwandĩkĩtwo ũũ thĩinĩ wa Watho wa Musa: “Ndũkanohe ndegwa kanua hĩndĩ ĩrĩa ĩrahũũra ngano.”*+ Hihi nĩ ndegwa Ngai akoragwo akĩrũmbũiya? 10 Kana hihi oigĩte ũguo nĩ ũndũ witũ? Hatarĩ nganja ũndũ ũcio waandĩkirũo nĩ ũndũ witũ, tondũ mũndũ ũrĩa ũrĩmaga na ũrĩa ũhũũraga agĩrĩirũo gwĩka ũguo erĩgĩrĩire kwamũkĩra kĩndũ.

11 Angĩkorũo nĩ tũhandĩte maũndũ ma kĩĩroho gatagatĩ-inĩ kanyu-rĩ, hihi nĩ ũndũ mũnene tũngĩgetha ũteithio wa kĩĩmwĩrĩ kuuma kũrĩ inyuĩ?+ 12 Angĩkorũo andũ angĩ marĩ na kĩhooto gĩa kwamũkĩra kĩndũ kuuma kũrĩ inyuĩ-rĩ, githĩ ithuĩ tũtikĩrĩ na kĩhooto o na makĩria? O na kũrĩ ũguo, tũtihũthĩrĩte kĩhooto kĩu,*+ no nĩ tũkirĩrĩirie maũndũ-inĩ mothe nĩguo tũtigekĩre mũhĩnga na njĩra o yothe harĩ ũhoro ũrĩa mwega wĩgiĩ Kristo.+ 13 Kaĩ mũtoĩ atĩ andũ arĩa marutaga ũtungata mũtheru marĩaga indo cia hekarũ, na atĩ arĩa matungataga kĩgongona-inĩ hĩndĩ ciothe mamũkagĩra igai rĩao kuuma kĩgongona-inĩ kĩu?+ 14 Ũndũ ũmwe na ũguo, Mwathani aathanire atĩ arĩa mahunjagia ũhoro ũrĩa mwega magĩrĩirũo gũtũũra kũgerera ũhoro ũrĩa mwega.+

15 No rĩrĩ, gũtirĩ ũndũ o na ũmwe wa macio niĩ hũthĩrĩte.+ Na ndirandĩka ũhoro ũyũ atĩ nĩguo njĩkĩrũo maũndũ macio, nĩ tondũ nĩ kaba gũkua gũkĩra—gũtirĩ mũndũ ũkweheria itũmĩ ciakwa cĩa kwĩraha!+ 16 Angĩkorũo nĩ hunjagia ũhoro ũrĩa mwega, kĩu ti gĩtũmi gĩa kwĩraha, tondũ ũguo nĩguo njagĩrĩirũo nĩ gwĩka. Atĩrĩrĩ, ingĩaga kũhunjia ũhoro ũrĩa mwega kaĩ ndĩ na haaro-ĩ!+ 17 Ingĩka ũguo na kwĩyendera-rĩ, ndĩ na kĩheo, ĩndĩ o na ingĩka ũguo iteyendeire, ndĩ o na wĩra wa ũramati ndĩhokeirũo.+ 18 Kĩheo gĩakwa gĩkĩrĩ kĩrĩkũ? Nĩ atĩ hĩndĩ ĩrĩa ndĩrahunjia ũhoro ũrĩa mwega, hunjie ũhoro mwega itekũrĩhia, nĩguo ndikahũthĩre ũũru wathani wakwa wĩgiĩ* ũhoro ũrĩa mwega.

19 Tondũ o na gũtuĩka ndirĩ ngombo ya mũndũ o na ũmwe, ndĩtuĩte ngombo ya andũ othe, nĩguo ngucĩrĩrie andũ aingĩ o ũrĩa kwahoteka. 20 Harĩ Ayahudi ngĩtuĩka ta Mũyahudi nĩguo ngucĩrĩrie Ayahudi;+ harĩ arĩa marĩ rungu rwa watho ngĩtuĩka ta ndĩ rungu rwa watho, o na gũtuĩka niĩ ndirĩ rungu rwa watho, nĩguo ngucĩrĩrie arĩa marĩ rungu rwa watho.+ 21 Harĩ arĩa matarĩ na watho ngĩtuĩka ta itarĩ na watho, o na gũtuĩka nũmagĩrĩra watho wa Ngai na ngakorũo rungu rwa watho wa Kristo,+ nĩguo ngucĩrĩrie arĩa matarĩ na watho. 22 Harĩ arĩa matarĩ hinya ngĩtuĩka ta itarĩ hinya, nĩguo ngucĩrĩrie arĩa matarĩ hinya.+ Nduĩkĩte maũndũ mothe harĩ andũ a mĩthemba yothe, nĩguo kũngĩhoteka na njĩra o yothe, honokie amwe. 23 No njĩkaga maũndũ mothe nĩ ũndũ wa ũhoro ũrĩa mwega, nĩguo ndĩũhunjĩrie andũ arĩa angĩ.+

24 Kaĩ mũtoĩ atĩ atengʼeri thĩinĩ wa ihenya matengʼeraga othe, ĩndĩ no ũmwe wamũkagĩra kĩheo? Tengʼerai na njĩra ĩgũtũma mwamũkĩre kĩheo kĩu.+ 25 Andũ othe arĩa makoragwo kĩhĩtahĩtano-inĩ merutanagĩria* kwĩgirĩrĩria maũndũ-inĩ mothe. Mekaga ũguo nĩguo mamũkĩre thũmbĩ ĩngĩthira,+ no ithuĩ twĩkaga ũguo nĩguo twamũkĩre ĩrĩa ĩtangĩthira.+ 26 Nĩ ũndũ ũcio, nditengʼeraga itarĩ na muoroto;+ ndiikagia ngundi ciakwa nĩguo ngũthe rĩera; 27 no nĩ kũhũũra hũũraga* mwĩrĩ wakwa+ na ngaũtongoria ta ngombo, nĩgetha thutha wa kũhunjĩria arĩa angĩ, gũtikanathiĩ ũndũ niĩ mwene nduĩke wa kũregwo.*