Ikagiai Ngundi Cianyu na Ũũgĩ
1. Ibuku rĩa 1 Akorintho 9:26 rĩkonainie atĩa na ũtungata?
1 Mũtũmwo Paulo aandĩkire ũũ: ‘Niĩ nditengʼeraga ta ndĩragaaga; na ngĩhũrana-rĩ, ndiikagia ngundi tũhũ ta ngũhũra rũhuho.’ (1 Kor. 9:26) Paulo aaragia ũhoro wa ũrĩa ehotorete gũthingata mĩoroto ya kĩĩroho atekũgayũkana meciria. O na kũrĩ ũguo, ũrutani wa ciugo ici nĩ ũkonainie na ũtungata. Kwoguo tũngĩenda gũikia “ngundi” ciitũ, kana kĩyo giitũ, na njĩra ya ũũgĩ nĩguo ikorũo na moimĩrĩro mega biũ. Tũngĩka ũguo atĩa?
2. Tũngĩĩgerekania atĩa na Paulo na ahunjia arĩa angĩ a karine ya mbere kũmenya nĩ rĩ na nĩ kũ tũkũhunjia?
2 Thiagai Kũrĩa Andũ Marĩ: Paulo na ahunjia arĩa angĩ a karine ya mbere maahunjagia kũrĩa meerĩgagĩrĩra gũkora andũ. (Atũm. 5:42; 16:13; 17:17) Kwoguo angĩkorũo andũ aingĩ gĩcigo-inĩ gitũ nĩ monekaga kwao mĩciĩ hwaĩ-inĩ, rĩu no rĩkorũo rĩrĩ ihinda rĩega mũno rĩa kũhunjia nyũmba kwa nyũmba. Hihi nĩ gũkoragwo andũ aingĩ thitĩnji-inĩ ya ngari kana ya mũgithi rũcinĩ rĩrĩa andũ marathiĩ wĩra-inĩ kana hwaĩ-inĩ makĩinũka? Nĩ hĩndĩ ĩrĩkũ gĩcigo-inĩ kĩanyu kũndũ kwa biacara gũkoragwo kũrĩ na andũ aingĩ? Mahunjio ma barabara-inĩ no makorũo na moimĩrĩro mega mũno mahinda ta macio.
3. Tũngĩikia atĩa ngundi ciitũ na ũũgĩ kũgerera mũrutĩre witũ wa wĩra gĩcigo-inĩ gitũ?
3 Hunjagiai Gĩcigo Kĩanyu na Ũũgĩ: Nĩngĩ nĩ twagĩrĩirũo gwĩciria ũrĩa tũngĩikia ngundi ciitũ na ũũgĩ kũgerera mũrutĩre witũ wa wĩra gĩcigo-inĩ gitũ. Kwa ngerekano, handũ ha gũthiĩ mũrĩ gĩkundi kĩnene gĩcigo-inĩ kĩmwe, ũndũ mũkũbatara ihinda na wĩra mũingĩ gũtigĩrĩra atĩ inyuothe mũrĩ na gwakũhunjia na nĩ mũrahunjia na mũbango mwega, nĩ kaba kũgayania gĩkundi kĩu. Ũndũ ũmwe na ũguo, tũkĩhunjia gĩcigo gĩa kũraya, no tũrĩkie gĩcigo kĩu na ihenya na tũgĩe na mĩeke ya kwaria na andũ aingĩ angĩkorũo ikundi cia ngari ti nene mũno. Hihi no tũhoe gĩcigo kĩa hakuhĩ na mũciĩ gĩa kũhunjia, nĩguo tũnyihie kahinda karĩa tũrabatara njĩra-inĩ?
4. Nĩ kĩĩ kĩngĩtũteithia gũkorũo tũrĩ ‘ategi a andũ’ marĩ na moimĩrĩro mega?
4 Jesu aagerekanirie ahunjia na ‘atahi’ kana ategi ‘a andũ.’ (Mar. 1:17) Muoroto wa mũtegi wa thamaki to gũtega no nĩ kũnyita thamaki. Kwoguo, ategi a thamaki arĩa magĩaga no moimĩrĩro mega, mathiaga kũrĩa maratanya kuona thamaki ihinda rĩrĩa ingĩoneka, na makaambĩrĩria gũtega matekũrĩa marĩĩgu. Ĩĩni, makaruta wĩra wao na njĩra ya ũũgĩ. Rekei tuonanie kĩyo o ta kĩu ũtungata-inĩ witũ.—Ahib. 6:11.