Njĩra cia Kũhunjia Ũhoro Ũrĩa Mwega

JESU nĩ aaigĩire arũmĩrĩri ake kĩonereria kĩega ũhoro-inĩ wĩgiĩ kũhunjia ũhoro ũrĩa mwega na kĩyo. Aathiaga kũrĩa andũ marĩ, akamahunjĩria na akamaruta marĩ mĩciĩ-inĩ kwao na kũndũ kwa mũingĩ. (Mat. 9:35; 13:36; Luk. 8:1) Jesu aaragia na mũndũ ũmwe ũmwe, akaruta arutwo ake marĩ oiki, na akahunjĩria andũ ngiri nyingĩ. (Mar. 4:10-13; 6:35-44; Joh. 3:2-21) Aahũthagĩra mweke o wothe kwĩra andũ ciugo cia kũmomĩrĩria na kũmahe kĩĩrĩgĩrĩro. (Luk. 4:16-19) O na rĩrĩa aabataraga kũhurũka, ndaarekaga mĩeke ya kũhunjĩria andũ ĩhĩtũke. (Mar. 6:30-34; Joh. 4:4-34) Na githĩ tũtiĩkĩragwo ngoro kwĩgerekania na Jesu rĩrĩa twathoma ũhoro wĩgiĩ ũtungata wake? Hatarĩ nganja nĩ twĩkĩragwo ngoro o ta ũrĩa atũmwo o nao meekĩrirũo ngoro.—Mat. 4:19, 20; Luk. 5:27, 28; Joh. 1:43-45.

² Ta wĩcirie mĩeke ĩrĩa Akristiano makoragwo nayo ũmũthĩ ya kũnyitanĩra wĩra-inĩ ũrĩa waambĩrĩirio nĩ Jesu Kristo hakuhĩ mĩaka 2,000 mĩhĩtũku.

KŨHUNJIA NYŨMBA KWA NYŨMBA

³ Tũrĩ Aira a Jehova, nĩ tũmenyaga bata wa kũhunjia nyũmba kwa nyũmba ũhoro ũrĩa mwega wa Ũthamaki na njĩra ĩrĩ na mũbango. Tũhũthĩrĩte njĩra ĩyo mũno ũũ atĩ nĩyo tũĩkaine nayo. Ũũgĩ wa kũhũthĩra njĩra ĩyo gũkinyĩra andũ milioni nyingĩ kahinda-inĩ kanini nĩ wonekete kũgerera moimĩrĩro mega marĩa tũgĩĩte namo. (Mat. 11:19; 24:14) Kũhunjia nyũmba kwa nyũmba nĩ njĩra njega ya kuonania wendo witũ harĩ Jehova na harĩ andũ.​—Mat. 22:34-40.

⁴ Kũhunjia nyũmba kwa nyũmba ti mũbango ũrambĩrĩirio mahinda-inĩ maya nĩ Aira a Jehova. Mũtũmwo Paulo ooigire atĩ nĩ aahunjagia mĩciĩ-inĩ. Ooigire ũũ agĩtaarĩria arori a Efeso ũhoro wĩgiĩ ũtungata wake: “Kuuma mũthenya wa mbere ũrĩa ndokire gĩcigo gĩkĩ kĩa Asia, . . . ndiagire kũmwĩra maũndũ o mothe marĩa mangĩamũgunire kana ngĩaga kũmũruta . . . nyũmba kwa nyũmba.” Paulo akĩhũthĩra njĩra ĩyo na ingĩ, nĩ aarutaga “ũira kĩhinyio kũrĩ Ayahudi na Angiriki atĩ merire, macokerere Ngai na magĩe na wĩtĩkio thĩinĩ wa Mwathani witũ Jesu.” (Atũm. 20:18, 20, 21) Mahinda-inĩ macio atongoria a Roma nĩ meekĩrĩire ũhoi wa ngai cia mĩhianano, na andũ aingĩ ‘maarĩ etigĩri ngai.’ Andũ maabataraga gũcaria “Ngai ũrĩa wombire thĩ na indo iria ciothe irĩ thĩinĩ wayo” na ihenya, Ũrĩa hĩndĩ ĩyo ‘wamenyithagia andũ othe kũndũ guothe atĩ magĩrĩirũo kwĩrira.’​—Atũm. 17:22-31.

⁵ Mahinda-inĩ maya, andũ nĩ marabatara kũmenyithio ũhoro ũrĩa mwega na ihenya o na makĩria. Mũico wa mũtabarĩre ũyũ mũũru wa maũndũ nĩ ũkuhĩrĩirie mũno. Nĩ ũndũ ũcio, nĩ tũrabatara gũkorũo na kĩyo makĩria. Kũhunjia nyũmba kwa nyũmba nĩyo njĩra ĩrĩa yonekete ĩrĩ njega makĩria ya gũcaria arĩa manyoteire ũhoro wa ma. Ĩkoragwo na moimĩrĩro mega ũmũthĩ o ta ũrĩa yarĩ hĩndĩ ya Jesu na ya atũmwo.​—Mar. 13:10.

⁶ Hihi wee nĩ ũhotaga kũnyitanĩra biũ ũtungata-inĩ wa nyũmba kwa nyũmba? Angĩkorũo nĩ ũhotaga, korũo na ma atĩ Jehova nĩ akenagio nĩwe. (Ezek. 9:11; Atũm. 20:35) No gũkorũo ti ũndũ mũhũthũ harĩ wee kũhunjia nyũmba kwa nyũmba. Wahota gũkorũo na mathĩna ma mwĩrĩ, kana gĩcigo kĩrĩa ũhunjagia andũ aingĩ matiendete gũthikĩrĩria, kana akorũo thirikari nĩ ĩgirĩtie wĩra witũ. Ningĩ no gũkorũo nĩ ũrĩ thoni na nĩ ũritũhagĩrũo kwambĩrĩria ndeereti na andũ ũtoĩ. Kwoguo, rĩrĩa wathiĩ kũhunjia nyũmba kwa nyũmba no ũigue guoya. Ndũgakue ngoro. (Tham. 4:10-12) Aarĩ na ariũ a Ithe witũ aingĩ nĩ macemanagia na moritũ o ta macio.

⁷ Jesu eerire arutwo ake ũũ: “Na rĩrĩ, nĩ ndĩkoragwo hamwe na inyuĩ mĩthenya yothe nginya ithirĩro rĩa mũtabarĩre wa maũndũ.” (Mat. 28:20) Ũndũ ũcio nĩ ũtũheaga hinya wĩra-inĩ wa gũtua andũ arutwo. Tũiguaga o ta mũtũmwo Paulo, ũrĩa woigire ũũ: “Maũndũ-inĩ mothe nĩ ngoragwo na hinya kũgerera ũrĩa ũũheaga hinya.” (Afil. 4:13) Nyitanagĩra biũ na mĩbango ya kĩũngano ya kũhunjia nyũmba kwa nyũmba. Wanyitanĩra na arĩa angĩ, nĩ ũrĩkagĩrũo ngoro na ũkaheo ũteithio ũrĩa ũrabatara. Hoya Jehova agũteithie kũhiũrania na moritũ marĩa ũngĩcemania namo, na wĩrutanĩrie biũ kũhunjia ũhoro ũrĩa mwega na kĩyo.​—1 Joh. 5:14.

⁸ Ũkĩhunjia ũhoro ũrĩa mwega, nĩ ũrĩgĩaga na mĩeke ya kwĩra andũ arĩa angĩ ‘gĩtũmi gĩa kĩĩrĩgĩrĩro kĩrĩa ũkoragwo nakĩo.’ (1 Pet. 3:15) Nĩ ũrĩĩyonagĩra ngũrani ya arĩa makoragwo na kĩĩrĩgĩrĩro kĩa Ũthamaki na arĩa matarĩ. (Isa. 65:13, 14) Nĩ ũrĩiguaga ũiganĩire nĩ kũmenya atĩ nĩ wathĩkagĩra ciugo ici Jesu ooigire: “Rekei ũtheri wanyu waragĩre andũ.” Na hihi no ũteithie andũ angĩ mamenye Jehova, na mamenye ma ĩrĩa ĩtongoragia muoyo-inĩ wa tene na tene.​—Mat. 5:16; Joh. 17:3; 1 Tim. 4:16.

⁹ Nĩ gwĩkagwo mĩbango ya kũhunjia nyũmba kwa nyũmba gatagatĩ-inĩ ga kiumia na mũthia-inĩ wa kiumia. Kũrĩa andũ matonekaga mũthenya, ciũngano imwe nĩ ibangaga kũhunjia hwaĩ-inĩ. Ene nyũmba mahota gũkorũo mehaarĩirie kũnyita andũ ũgeni mathaa ma thutha wa mĩaraho na hwaĩ-inĩ gũkĩra mathaa ma rũcinĩ.

GŨCARIA ARĨA MAGĨRĨIRE

¹⁰ Jesu eerire arutwo ake ‘macaragie’ arĩa magĩrĩire. (Mat. 10:11) Jesu ndaacaragia arĩa magĩrĩire kũgerera o kũhunjia nyũmba kwa nyũmba tu. Aahunjagia rĩrĩa rĩothe ona kwagĩrĩire, arĩ ũtungata-inĩ na arĩ maũndũ-inĩ mangĩ. (Luk. 8:1; Joh. 4:7-15) O na atũmwo nĩ maahunjagĩria andũ kũndũ gũtiganĩte.​—Atũm. 17:17; 28:16, 23, 30, 31.

¹¹ O na ũmũthĩ, muoroto witũ nĩ gũkinyĩria mũndũ wothe tũngĩhota ndũmĩrĩri ya Ũthamaki. Ũguo nĩ kuuga twĩgerekanie na ũrĩa Jesu na atũmwo ake maarutaga wĩra wa gũtua andũ arutwo na tũkagarũrũka kũringana na mahinda na maũndũ matiganĩte ma andũ arĩa marĩ gĩcigo-inĩ gitũ. (1 Kor. 7:31) Kwa ngerekano, ahunjia nĩ makoretwo na moimĩrĩro mega makĩhunjia icigo-inĩ cia biacara. Kũhunjia barabara-inĩ nĩ gũkoretwo na moimĩrĩro mega mabũrũri-inĩ maingĩ, o hamwe na kũhunjia kũrĩa andũ mahurũkaga, kũrĩa kũigagwo ngaari, kana kũrĩa guothe andũ mangĩoneka. Ciũngano imwe nĩ ihunjagia ikĩhũthĩra metha kana tũkaari twa mabuku. Ningĩ wabici ya rũhonge no ĩbange kũhunjio icigo-inĩ iria ikoragwo na andũ aingĩ thĩinĩ wa mataũni marĩa manene, makĩhũthĩra ahunjia kuuma ciũngano itiganĩte. Na njĩra ĩyo, andũ arĩa matonekaga mĩciĩ rĩrĩa ahunjia mathiĩ kwao no makinyĩrio ũhoro ũrĩa mwega marĩ kũndũ kũngĩ.

¹² Rĩrĩa twacemania na andũ marakenio nĩ ndũmĩrĩri ya Bibilia tũkĩhunjia kũndũ kwa mũingĩ, no tũmahe ibuku rĩrĩa rĩagĩrĩire. Nĩguo ũkũrie wendi wa mũndũ wakenio nĩ ndũmĩrĩri, no ũmũhe ũhoro wĩgiĩ ũrĩa ũngĩkinyĩrĩka na ũbange ũrĩa ũngĩmũcokera, ũmuonie ũrĩa angĩhingũra jw.org, kana ũmwerekerie kĩũngano-inĩ kĩrĩa kĩrĩ hakuhĩ. Wahota kuona atĩ kũhunjia kũndũ kwa mũingĩ nĩ njĩra njega ya kwandandũra ũtungata waku.

¹³ O na kũrĩ ũguo, wĩra ũrĩa Akristiano maheetwo ũmũthĩ ndũhutĩtie o kũhunjia ũhoro ũrĩa mwega. Nĩguo ũhote gũteithia andũ merute ũhoro wa ma ũrĩa ũtongoragia muoyo-inĩ, nĩ ũrabatara gũcokera arĩa marakenio nĩ ũhoro ũrĩa mwega maita maingĩ nĩguo makũre matuĩke Akristiano agima kĩĩroho.

GŨCOKERA ANDŨ

¹⁴ Jesu eerire arũmĩrĩri ake ũũ: “Nĩ mũgaatuĩka aira akwa . . . nginya ituri ciothe cia thĩ.” (Atũm. 1:8) No ningĩ nĩ aameerire ũũ: “Nĩ ũndũ ũcio-rĩ, thiĩi mũgatue andũ arutwo kuuma ndũrĩrĩ-inĩ ciothe, . . . mũkĩmarutaga kũrũmia maũndũ marĩa mothe ndĩmwathĩte.” (Mat. 28:19, 20) Gũcokera andũ no kũrehere mũndũ gĩkeno agĩtungatĩra Jehova. Andũ arĩa maakenirio nĩ ũhoro mwega wamaceerera riita rĩa mbere, mahota gũkena ũngĩcoka rĩngĩ. Rĩrĩa waria nao ũhoro makĩria kuuma Bibilia-inĩ, no wĩkĩre hinya wĩtĩkio wao harĩ Ngai, na ũmateithie kũmenya mabataro mao ma kĩĩroho. (Mat. 5:3) Ũngĩĩhaarĩria wega na ũbange kũmacokera ihinda rĩrĩa rĩmagĩrĩire, no ũhote kwambĩrĩria kwĩruta Bibilia nao. Ũcio nĩguo wagĩrĩire gũkorũo ũrĩ muoroto waku ũgĩcokera andũ. To kũhanda tũhandaga mbeũ cia ũhoro wa ma, no nĩ nginya gũciitĩrĩria maĩ.​—1 Kor. 3:6.

¹⁵ No ũkorũo ũtarĩ ũndũ mũhũthũ harĩ ahunjia amwe gũcokera andũ. Kwahoteka nĩ ũmenyerete kwaria na njĩra nguhĩ ũkĩhunjĩria andũ ũhoro ũrĩa mwega na nĩ ũkenagĩra ũndũ ũcio. No gwakinya nĩ gũcokera mũndũ nĩguo mũgĩe na ndeereti ya Bibilia, ũkaigua ũndũ ũcio ũgĩkũritũhĩra. Kwĩhaarĩria wega no gũgũteithie gũkorũo na ũmĩrĩru. Hũthagĩra maũndũ marĩa tũrutagwo mũcemanio-inĩ wa gatagatĩ-inĩ ga kiumia. Ningĩ no ũũrie mũhunjia ũrĩ na ũmenyeru agũtware.

KWĨRUTA BIBILIA NA ANDŨ

¹⁶ Hĩndĩ ĩrĩa Filipu aaragia na Mũethiopia ũrĩa wathomaga Kiugo kĩa Ngai, aamũririe ũũ: “Hihi nĩ ũĩ kĩrĩa ũrathoma?” Nake akĩmũcokeria akĩmwĩra: “Atĩrĩrĩ, ingĩkĩmenya atĩa itataarĩirio nĩ mũndũ?” Mũrango wa 8 wa ibuku rĩa Atũmwo ugaga atĩ Filipu aambĩrĩirie na gacunjĩ kau mũndũ ũcio aathomaga, na “akĩmũhunjĩria ũhoro ũrĩa mwega wĩgiĩ Jesu.” (Atũm. 8:26-36) Tũtiũĩ Filipu aahũthĩrire ihinda rĩigana atĩa na mũndũ ũcio, no nĩ aamũtaarĩirie ũhoro ũrĩa mwega nginya agĩtuĩka mwĩtĩkia na akĩũria abatithio. Nĩ aatuĩkire mũrutwo wa Jesu Kristo.

¹⁷ Andũ aingĩ ũmũthĩ matiũĩ ũhoro ũrĩa ũrĩ thĩinĩ wa Bibilia, kwoguo no mabatare gũcokerũo maita maingĩ na kũrutwo kwa ihinda ta rĩa ciumia cigana ũna, mĩeri, kana o na mwaka kana makĩria nĩguo makũrie wĩtĩkio na magĩrĩre kũbatithio. Ĩndĩ ũngĩkorũo na wetereri na ũteithie arĩa marĩ na ngoro njega gũtuĩka arutwo, nĩ ũgũkorũo na gĩkeno o ta ũrĩa Jesu ooigire atĩ “kũheana nĩ kũrĩ gĩkeno kĩnene gũkĩra kwamũkĩra.”​—Atũm. 20:35.

¹⁸ Hatarĩ nganja nĩ wagĩrĩirũo kwĩruta Bibilia na mũndũ ũkĩhũthĩra mabuku marĩa mahaarĩirio nĩ ũndũ wa gwĩka ũguo. Ũngĩhũthĩra maũndũ marĩa tũrutagwo mũcemanio-inĩ wa gatagatĩ-inĩ ga kiumia na ũnyitanĩre na ahunjia arĩa marĩ ũmenyeru wa kũrutana kĩũngano-inĩ, no ũhote kũgĩa na arutwo marathiĩ na mbere wega, na ũteithie andũ angĩ gũtuĩka arutwo a Jesu Kristo.

¹⁹ Ũngĩbatara ũteithio harĩ kwambĩrĩria na kwĩruta Bibilia na mũndũ, ndũkaigue hinya kwaria na mũthuri ũmwe wa kĩũngano kana mũhunjia ũngĩ ũkoragwo na moimĩrĩro mega harĩ kũruta andũ Bibilia. Ningĩ maũndũ marĩa makoragwo thĩinĩ wa Kabuku ka Mũcemanio wa Ũtũũro na Ũtungata marĩa mekagwo na njĩra ya cionereria mũcemanio-inĩ no magũteithie. Wĩhoke Jehova na ũmũmenyithagie wendi waku. (1 Joh. 3:22) Kwoguo kũngĩhoteka, wĩigĩre muoroto wa kwĩruta Bibilia na mũndũ ũngĩ makĩria ma kwĩruta na famĩlĩ yaku. Gũkorũo na arutwo a Bibilia nĩ gũkuongerera gĩkeno gĩaku ũtungata-inĩ.

KWEREKERIA ANDŨ ITHONDEKA-INĨ RĨA JEHOVA

²⁰ Rĩrĩa twateithia andũ kũmenya Jehova Ngai na gũtuĩka arutwo a Jesu Kristo, nĩ manyitanagĩra na ithuĩ ũthathaiya-inĩ. Arutwo a Bibilia nĩ megũkũra kĩĩroho mangĩmenya ithondeka rĩa Jehova na manyitanĩre narĩo. Kũmaruta ũrĩa mangĩka ũguo nĩ kwa bata. Video imwe na broshua ya Nĩa Mareka Wendi wa Jehova Ũmũthĩ? ihaarĩrĩirio nĩguo ihingie muoroto ũcio. Ningĩ thĩinĩ wa Gĩcunjĩ gĩa 4 kĩa ibuku rĩrĩ, nĩ harĩ ũhoro ũngĩmateithia.

²¹ Kuuma o wambĩrĩria kwĩruta Bibilia na mũndũ, mũteithie kuona atĩ Jehova arahũthĩra ithondeka gũtongoria wĩra wa kũhunjia thĩinĩ wa thĩ ũmũthĩ. Mũteithie one bata wa indo iria tũhũthagĩra kwĩruta Bibilia, na ũmũtaarĩrie ũrĩa ihaaragĩrio na ikaheanwo thĩinĩ wa thĩ yothe nĩ erutĩri meyamũrĩire Ngai. Nyita ũgeni mũrutwo waku wa Bibilia oke mĩcemanio-inĩ thĩinĩ wa Nyũmba ya Ũthamaki. Mũtaarĩrie ũrĩa mĩcemanio ĩkagwo na ũmũmenyithanie na aarĩ na ariũ a Ithe witũ kĩũngano-inĩ. Ningĩ mũteithie amenyane na aarĩ na ariũ a Ithe witũ angĩ hĩndĩ ya igomano. Mahinda-inĩ macio na mangĩ, reke eyonere ũrĩa andũ a Jehova makoragwo na wendo, ũrĩa ũmenyithanagia Akristiano a ma. (Joh. 13:35) O ũrĩa egũthiĩ na mbere kwenda ithondeka rĩa Jehova, noguo egũkuhĩrĩria Jehova makĩria.

KŨHŨTHĨRA MABUKU MARĨA MARAGĨRĨRIA BIBILIA

²² Akristiano a tene nĩ maahunjagia na kĩyo Kiugo kĩa Ngai. Nĩ maandĩkaga kobĩ cia Maandĩko cia kũhũthĩra o ene na cia gũthomwo nĩ kĩũngano. Nĩ meekagĩra andũ ngoro mathome Kiugo kĩa Ngai kĩa ũhoro wa ma. Kobĩ icio maandĩkaga itiarĩ nyingĩ na cionagwo irĩ cia bata mũno. (Kol. 4:16; 2 Tim. 2:15; 3:14-17; 4:13; 1 Pet. 1:1) Ũmũthĩ Aira a Jehova mahũthagĩra njĩra cia kĩĩrĩu gũcaba Bibilia milioni nyingĩ, o hamwe na indo ingĩ cia kwĩruta Bibilia. Indo icio nĩ hamwe na trakti, broshua, mabuku, na ngathĩti iria irutagwo na thiomi magana maigana ũna.

²³ Rĩrĩa ũrahunjĩria andũ ũhoro ũrĩa mwega, hũthagĩra indo iria irutĩtwo nĩ ithondeka rĩa Jehova cia kwĩruta Bibilia. Nĩ ũndũ wa kũmenya ũrĩa ũgunĩkĩte nĩ gũthoma na kwĩruta mabuku marĩa marutagwo nĩ ithondeka rĩa Jehova, nĩ ũrĩkoragwo na wendi wa kũhe andũ angĩ mabuku macio.​—Ahib. 13:15, 16.

²⁴ Andũ aingĩ rĩu nĩ marahũthĩra Intaneti kwamũkĩra ũhoro. Kwoguo makĩria ma kũhũthĩra mabuku tũkĩhunjia, nĩ tũhũthagĩra website itũ ya jw.org na nĩ ĩkoragwo na moimĩrĩro mega mũno. Andũ aingĩ thĩinĩ wa thĩ no mahote kũhũthĩra kompiuta gũthoma kana gũthikĩrĩria Bibilia ĩgĩthomwo hamwe na mabuku marĩa maragĩrĩria ũhoro wa Bibilia na thiomi magana maingĩ. Arĩa metigagĩra kwaria na ithuĩ kana arĩa maikaraga kũndũ matonanaga kaingĩ na Aira a Jehova, no mathome maũndũ marĩa twĩtĩkĩtie thĩinĩ wa jw.org marĩ o kwao mĩciĩ.

²⁵ Kwoguo rĩrĩa rĩothe tuona mweke nĩ tũmenyithagia andũ ũhoro wa jw.org. Mwene nyũmba angĩtũũria kĩũria kĩgiĩ wĩtĩkio witũ, no tũhũthĩre thimũ, tablet, kana kompiuta kũmuonia macokio o rĩo. Tũngĩcemania na mũndũ ũraria rũthiomi rũngĩ nginya rwa kwaria na ciĩko, no tũmuonie ũrĩa angĩona Bibilia na mabuku ma rũthiomi rwake thĩinĩ wa website itũ. Ahunjia aingĩ nĩ mahũthĩrĩte video kuuma jw.org kwambĩrĩria ndeereti ya Bibilia.

KŨHUNJIA TŨRĨ MAŨNDŨ-INĨ MA O MŨTHENYA

²⁶ Jesu eerire arĩa maamũthikagĩrĩria ũũ: “Nĩ inyuĩ ũtheri wa thĩ. . . . Rekei ũtheri wanyu waragĩre andũ, nĩguo monage ciĩko cianyu njega na makagooca Ithe wanyu wa igũrũ.” (Mat. 5:14-16) Arutwo acio nĩ moonanagia njĩra cia Ngai kũgerera kwĩgerekania na Jesu ũrĩa woigire ũũ igũrũ rĩake: “Nĩ niĩ ũtheri wa thĩ.” Jesu nĩ aaigĩire Akristiano kĩonereria na njĩra ya kũreka “ũtheri wa muoyo” warĩre na ũgune arĩa othe mangĩamũthikĩrĩirie.​—Joh. 8:12.

²⁷ O na mũtũmwo Paulo nĩ aatũigĩire kĩonereria kĩega tũngĩrũmĩrĩra. (1 Kor. 4:16; 11:1) Rĩrĩa aarĩ Athene, o mũthenya nĩ aahunjagĩria arĩa maakoragwo thoko-inĩ, arĩa othe maangĩonekire. (Atũm. 17:17) Akristiano a Filipi nĩ maarũmĩrĩire kĩonereria gĩake. Nĩ ũndũ ũcio, Paulo aameerire atĩ maatũũraga “gatagatĩ-inĩ ka rũciaro ruogomu na rũhĩngĩcanu,” na ‘maaraga ta ũtheri thĩinĩ wa thĩ marĩ gatagatĩ-inĩ karuo.’ (Afil. 2:15) O na ithuĩ ũmũthĩ no tũrekage ũhoro wa ma ware kũgerera ciugo na ciĩko citũ rĩrĩa rĩothe twagĩa na mweke wa kwaria na andũ ũhoro ũrĩa mwega. Nĩ ma, kĩonereria gitũ kĩega gĩa gũkorũo tũrĩ ehokeku na arũngĩrĩru no kĩgucĩrĩrie andũ tondũ nĩ mekuona tũrĩ ngũrani na andũ a thĩ. No tũngĩaria nao igũrũ rĩgiĩ ũhoro ũrĩa mwega, no mamenye kĩrĩa gĩtũmaga tũkorũo tũrĩ ngũrani.

²⁸ Andũ aingĩ a Jehova nĩ maragia na andũ ũhoro ũrĩa mwega marĩ wĩra-inĩ, cukuru, thabarĩ-inĩ, kana kũndũ kũngĩ marĩ maũndũ-inĩ mao ma o mũthenya. Tũrĩ thabarĩ-inĩ no tũkorũo na mweke wa kwaria na arĩa tũratwarana nao. Nĩ twagĩrĩirũo gũcaria mĩeke ya kũhunjia na njĩra ya gũtwarithia ndeereti ũndũ tũkũheana ũhoro ũrĩa mwega. Rekei tũkoragwo twĩhaarĩirie kwaria na andũ rĩrĩa rĩothe tuona kwagĩrĩire.

²⁹ Nĩ tũrĩtindĩkagwo gwĩka ũguo twaririkana atĩ nĩ tũragoocithia Mũũmbi witũ na tũgatĩithia rĩĩtwa rĩake. Makĩria ma ũguo, no tũteithie arĩa marĩ na ngoro njega kũmenya Jehova nĩguo o nao mamũtungatĩre na magĩe na kĩĩrĩgĩrĩro kĩa muoyo kĩrĩa kiumanaga na gũkorũo na wĩtĩkio harĩ Jesu Kristo. Jehova nĩ akenagio nĩ kĩyo ta kĩu na onaga ũndũ ũcio ũrĩ ũtungata mũtheru.​—Ahib. 12:28; Kũg. 7:9, 10.

GĨCIGO GĨA KŨHUNJIA

³⁰ Wendi wa Jehova nĩ atĩ ndũmĩrĩri ya Ũthamaki ĩhunjio thĩ yothe, mataũni-inĩ na icagi-inĩ. Nĩguo ũndũ ũcio ũhoteke, wabici ya rũhonge nĩ ĩheanaga icigo cia kũhunjia kũrĩ ciũngano kana andũ arĩa matungataga kũndũ gũtarĩ kĩũngano. (1 Kor. 14:40) Mũbango ũcio no ta ũrĩa wathanĩtwo nĩ Ngai karine-inĩ ya mbere. (2 Kor. 10:13; Gal. 2:9) Tondũ wĩra wa Ũthamaki ũrathiĩ wongererekete matukũ-inĩ maya ma kũrigĩrĩria, nĩ kũgĩaga moimĩrĩro mega rĩrĩa kwagĩa na mũbango mwega wa kũhunjia gĩcigo kĩrĩa kĩũngano kĩgaĩirũo.

³¹ Mũbango ũcio ũrũgamagĩrĩrũo nĩ mũrori wa ũtungata. Ndungata ya kĩũngano no ĩrute wĩra wa kũgaya icigo. Gũkoragwo na mĩthemba ĩĩrĩ ya icigo cia kũhunjia, iria ihunjagio nĩ ikundi cia kĩũngano na iria cioyagwo nĩ mũhunjia ũmwe ũmwe. Kũrĩa gũtakoragwo na icigo cia kũhunjia cia kũigana, arori a ikundi nĩ maheagwo icigo ingĩhunjio nĩ ikundi ciao. Nakuo kũrĩa gũkoragwo na icigo nyingĩ cia kũhunjia, ahunjia no maheo icigo ciao.

³² Mũhunjia angĩkorũo na gĩcigo gĩake no ahunjie rĩrĩa gũtarĩ na mũcemanio wa ũtungata kana rĩrĩa atangĩhota kũhunjia na gĩkundi kĩao. Kwa ngerekano, ahunjia amwe nĩ moyaga icigo iria ikuhĩrĩirie kũrĩa marutagĩra wĩra nĩguo makahunjagia mathaa ma mĩaraho kana thutha wa wĩra. Famĩlĩ imwe nĩ cioyaga icigo hakuhĩ na kũrĩa cikaraga nĩguo rĩmwe ikahunjagia hwaĩ-inĩ. Mũhunjia angĩkorũo na gĩcigo gĩa kũhunjia kĩmũkuhĩrĩirie no ahote kũhũthĩra mahinda maingĩ ũtungata-inĩ. Icigo cia kũhunjia iria cioetwo nĩ ahunjia no ihunjio nginya nĩ andũ marĩ gĩkundi. Angĩkorũo no wende gĩcigo gĩa kũhunjia, no ũũrie ũrĩa ũheanaga icigo cia kũhunjia akũhe.

³³ O na angĩkorũo nĩ gĩcigo gĩa gĩkundi kĩoetwo nĩ mũrori wa gĩkundi kana gĩcigo kĩoetwo nĩ mũhunjia, ũrĩa woete gĩcigo kĩu agĩrĩirũo gũtigĩrĩra atĩ o mũciĩ nĩ wahunjio. Mĩbango ya kũhunjia yagĩrĩirũo gũtwarana na mawatho marĩa marĩ kuo ma kũgitĩra ũhoro wa andũ. Mũrori wa gĩkundi kana mũhunjia ũrĩa woete gĩcigo agĩrĩirũo kwĩrutanĩria gũkĩrĩkia kwa ihinda rĩa mĩeri ĩna. Gĩcigo kĩarĩka, agĩrĩirũo kũmenyithia ũrĩa ũheanaga icigo cia kũhunjia. Gũkĩringana na maũndũ matiganĩte, mũrori wa gĩkundi kana mũhunjia ũrĩa woete gĩcigo gĩa kũhunjia, no aikare na gĩcigo kĩu nĩguo akĩhunjie rĩngĩ kana acokerie ũrĩa ũheanaga icigo cia kũhunjia.

³⁴ Rĩrĩa ahunjia othe thĩinĩ wa kĩũngano manyitanĩra, no mahote kũhunjia icigo ciao kĩhinyio. Ningĩ ahunjia matiganĩte nĩ marĩĩthemaga kũhunjia gĩcigo-inĩ kĩmwe ihinda-inĩ rĩmwe, tondũ ũndũ ũcio no ũrakarie ene nyũmba. Na njĩra ĩyo, nĩ tũrĩonanagia atĩ nĩ tũrarũmbũiya aarĩ na ariũ a Ithe witũ o hamwe na arĩa tũhunjagĩria.

KŨNYITANĨRA HARĨ KŨHUNJĨRIA ANDŨ A THIOMI CIOTHE

³⁵ Andũ othe nĩ marabatara kwĩruta ũhoro wĩgiĩ Jehova, Mũriũ wake, na Ũthamaki wake. (Kũg. 14:6, 7) Nĩ twendaga mũno gũteithia andũ a thiomi ciothe mahote gũkaĩra rĩĩtwa rĩa Jehova nĩgetha makaahonokio, o na mehumbe ũmũndũ mwerũ. (Rom. 10:12, 13; Kol. 3:10, 11) Nĩ moritũ ta marĩkũ meyumĩragia rĩrĩa kũrahunjio icigo-inĩ iria ciaragio thiomi itiganĩte? Na mangĩhiũranio namo atĩa nĩguo andũ aingĩ o ũrĩa kwahoteka magĩe na mweke wa kũigua ndũmĩrĩri ya Ũthamaki na rũthiomi rũrĩa megũtaũkĩrũo wega?​—Rom. 10:14.

³⁶ O kĩũngano kĩheagwo gĩcigo gĩa kũhunjia kũringana na rũthiomi. Kwoguo thĩinĩ wa icigo iria ciaragio thiomi itiganĩte, ahunjia a ciũngano ngũrani nĩ mahunjagia icigo o imwe. Ciũngano-inĩ ta icio, nĩ ũndũ mwega ahunjia kũhunjĩria o andũ arĩa maragia rũthiomi rwa kĩũngano kĩao. Magĩrĩire gwĩka ũguo nginya hĩndĩ ya kambĩini cia o mwaka cia kũheana tũratathi twa kũnyita andũ ũgeni. No rĩrĩa marahunjia kũndũ kwa mũingĩ kana rĩrĩa marahunjia marĩ maũndũ-inĩ mao ma o mũthenya, ahunjia no marie na mũndũ o wothe na maheane mabuku na rũthiomi o ruothe.

³⁷ Rĩmwe na rĩmwe, ciũngano cia thiomi ingĩ no iremwo nĩ kũhunjagia kaingĩ icigo ciao iria irĩ kũraihu. Hĩndĩ ta ĩyo, arori a ũtungata a ciũngano icio magĩrĩirũo kwaranĩria nĩguo mabange njĩra ĩrĩa njega ya kũhunjagia icigo icio. Ũndũ ũcio nĩ ũgũteithia andũ othe magĩe na mweke wa kũigua ndũmĩrĩri ya Ũthamaki na ũgirĩrĩrie ahunjia gũcokagĩra kũrĩa kũhunjĩtio.​—Thim. 15:22.

³⁸ Twagĩrĩirũo gwĩka atĩa tũngĩkora mũndũ ũraria rũthiomi ngũrani na rwitũ tũkĩhunjia nyũmba kwa nyũmba? Tũtiagĩrĩirũo gũtua atĩ ahunjia arĩa maragia rũthiomi rwake nĩ marĩmũhunjĩria. Ahunjia amwe nĩ merutaga ciugo nini cia rũthiomi rũngĩ rũrĩa rwaragio nĩ andũ arĩa macemanagia nao gĩcigo-inĩ kĩao gĩa kũhunjia. No tuonie mũndũ ũrĩa angĩthoma kana arute mabuku kana indo ingĩ cia rũthiomi rwake thĩinĩ wa jw.org, kana tũmwĩre nĩ tũrĩmũrehera ibuku kana kĩndũ kĩngĩ kĩa rũthiomi rwake.

³⁹ Mũndũ angĩonania arĩ na wendi wa kũmenya makĩria, twagĩrĩirũo gũcaria mũndũ ũngĩhota kũmũteithĩrĩria na rũthiomi rũrĩa ataũkagĩrũo. Ningĩ no tũmwĩrĩre kĩũngano kĩa rũthiomi rwake kĩrĩa kĩrĩ hakuhĩ. Angĩkorũo no ende gũceererũo nĩ mũndũ waragia rũthiomi rwake no tũmuonie ũrĩa angĩiyũria andirethi ciake thĩinĩ wa jw.org. Nayo wabici ya rũhonge nĩ ĩkũgeria gwetha mũhunjia, gĩkundi, kana kĩũngano kĩrĩa kĩrĩ hakuhĩ nĩguo ateithĩrĩrio makĩria.

⁴⁰ Twagĩrĩirũo gũthiĩ na mbere kwaranĩria na mũndũ ũcio nginya rĩrĩa agaatwĩra atĩ nĩ araceererũo nĩ mũndũ waragia rũthiomi rwake. Rĩmwe wabici ya rũhonge no ĩmenyithie athuri atĩ gũtironeka mũndũ waragia rũthiomi rwa mũndũ ũcio. Kũngĩthiĩ ũguo, twagĩrĩirũo gũthiĩ na mbere gũkũria wendi wa mũndũ ũcio. Kũngĩhoteka no twĩrute Bibilia nake tũkĩhũthĩra kĩndũ kĩa rũthiomi rwake. Tũngĩhũthĩra mbica wega na tũmũũrie athome Maandĩko marĩa monanĩtio, no ataũkĩrũo nĩ morutani ma mũthingi ma Bibilia. Hangĩkorũo na mũndũ wa famĩlĩ yao ũĩ rũthiomi rwake, na nĩ oĩ rũthiomi rũrĩa rwaragio gĩcigo-inĩ kĩu, no amũtaũrĩre.

⁴¹ Nĩguo twerekerie mũndũ ũcio ithondeka-inĩ rĩa Ngai, twagĩrĩirũo kũmũnyita ũgeni oke mĩcemanio-inĩ o na akorũo ndegũtaũkĩrũo nĩ maũndũ mothe. No tũmũteithie kũhumbũria Bibilia maandĩko magĩthomwo akĩhũthĩra Bibilia ya rũthiomi rwake angĩkorũo kũrĩ nayo. Kũnyitanĩra na arĩa angĩ kĩũngano-inĩ nĩ gũkũmwĩkĩra hinya na kũmũteithie gũkũra kĩĩroho.

⁴² Tũkundi tũnini: Tũkundi tũnini tũkoragwo na ahunjia maigana ũna marahunjia na rũthiomi rũngĩ tiga rũthiomi rũrĩa rũhũthagĩrũo nĩ kĩũngano kĩu, o na gũtuĩka gũtikoragwo na mũthuri wa kĩũngano kana ndungata ya kĩũngano ĩngĩtongoria mũcemanio wa o kiumia na rũthiomi rũu. Wabici ya rũhonge no ĩtĩkĩrie kĩũngano gĩkorũo na gakundi ta kau kũngĩkorũo na maũndũ maya:

1. (1) Gũkorũo na andũ aingĩ maragia rũthiomi rũngĩ tiga rũrĩa rũhũthagĩrũo nĩ kĩũngano.

2. (2) Gũkorũo na ahunjia anini moĩ rũthiomi rũu kana mehaarĩirie kwĩruta rũthiomi rũu.

3. (3) Kĩama gĩa athuri gĩkorũo nĩ kĩĩhaarĩirie kũbanga wĩra wa kũhunjia na rũthiomi rũu.

Angĩkorũo kĩama gĩa athuri nĩ kĩrenda gũkorũo na gakundi ta kau, athuri magĩrĩirũo kwaranĩria na mũrori wa mũthiũrũrũko. No akorũo oĩ ciũngano ingĩ irerutanĩria kũhunjĩria andũ maragia rũthiomi rũu na no aheane ũhoro wa bata ũrĩa ũngĩteithia kũmenya kĩũngano kĩrĩa kĩngĩkorũo kĩagĩrĩire makĩria kwambĩrĩria gakundi ka rũthiomi rũu. Kwamenyeka kĩũngano kĩrĩa gĩkwambĩrĩria, athuri magĩrĩirũo gũtũmĩra wabici ya rũhonge marũa na mahoe kĩũngano kĩu gĩtĩkĩrio kwambĩrĩria gakundi kau.

⁴³ Ikundi: Wabici ya rũhonge no ĩtĩkĩrie kĩũngano gĩkorũo na gĩkundi kũngĩkorũo na maũndũ maya:

1. (1) Gũkorũo kũrĩ na andũ maragia rũthiomi rũna na nĩ marakenio nĩ ũhoro ũrĩa mwega, na nĩ kũroneka atĩ gĩkundi kĩngĩambĩrĩrio no gĩkũre.

2. (2) Gũkorũo na ahunjia maigana ũna moĩ rũthiomi rũu kana mareruta rũthiomi rũu.

3. (3) Gũkorũo na mũthuri wa kĩũngano kana ndungata ya kĩũngano ĩngĩtongoria o na akorũo nĩ mũcemanio ũmwe harĩ kiumia na rũthiomi rũu, kana gĩcunjĩ kĩmwe kĩa mũcemanio wa o kiumia, ta mĩario ya andũ othe kana Wĩruti wa Mũrangĩri.

Angĩkorũo maũndũ macio nĩ mahingĩtio na gĩkĩro kĩrĩa kĩagĩrĩire, kĩama gĩa athuri kĩagĩrĩire kwandĩkĩra wabici ya rũhonge gĩtaarĩrie maũndũ mothe megiĩ gĩkundi kĩu, na kĩhoe kĩũngano kĩu gĩtĩkĩrio kwambĩrĩria gĩkundi. Mũthuri wa kĩũngano kana ndũngata ya kĩũngano ũrĩa ũrĩtongoragia gĩkundi kĩu, arĩkoragwo arĩ we ũrakĩrũmbũiya arĩ “mũrori wa gĩkundi” kana “ndungata ya gĩkundi.”

⁴⁴ Gĩkundi kĩambĩrĩrio, kĩama gĩa athuri gĩa kĩũngano kĩu nĩkĩo kĩrĩtuaga kana icunjĩ iria ingĩ cia mĩcemanio nĩ irĩkagwo na mĩcemanio ĩrĩkagwo maita maigana harĩ mweri na rũthiomi rũu. Ningĩ gĩkundi kĩu no gĩkoragwo na mĩcemanio ya ũtungata. Arĩa marĩ gĩkundi-inĩ kĩu marĩkoragwo rungu rwa ũrũgamĩrĩri wa kĩama gĩa athuri kĩrĩa kĩrũgamĩrĩire gĩkundi kĩu. Athuri magĩrĩirũo kũheanaga ũtongoria marĩ na ũigananĩru na magakoragwo mũhari-inĩ wa mbere kũrũmbũiya mabataro ma gĩkundi kĩu. Rĩrĩa mũrori wa mũthiũrũrũko anyitanĩra na gĩkundi kĩu rĩrĩa aceereire kĩũngano kĩrĩa kĩrũgamĩrĩire gĩkundi kĩu, nĩ arĩtũmagĩra wabici ya rũhonge riboti nguhĩ ĩgiĩ ũrĩa gĩkundi kĩu kĩrathiĩ na mbere na akagweta mabataro makĩo. Thutha wa ihinda no kũhoteke gĩkundi kĩu gĩtuĩke kĩũngano. Rĩrĩa acio othe marũmĩrĩra ũtongoria wa gĩtheokrasi, Jehova nĩ arĩkenaga.​—1 Kor. 1:10; 3:5, 6.

KŨHUNJIA HAMWE NA ANDŨ ARĨA ANGĨ

⁴⁵ Mũkristiano o wothe wĩyamũrĩire Ngai nĩ agĩrĩire kũhunjia ũhoro ũrĩa mwega. Nĩ harĩ njĩra nyingĩ cia gwĩka ũguo, no aingĩ aitũ nĩ tũkenagĩra kũhunjia hamwe na arĩa angĩ. (Luk. 10:1) Nĩ ũndũ ũcio, ciũngano nĩ ikoragwo na mĩcemanio ya ũtungata gatagatĩ-inĩ ga kiumia na mũthia-inĩ wa kiumia. Mahinda ma thigũkũ ahunjia nĩ magĩaga na mweke mwega wa kũhunjia na kĩũngano tondũ aarĩ na ariũ a Ithe witũ aingĩ nĩ maheagwo rũtha wĩra-inĩ. Kamĩtĩ ya Ũtungata ya Kĩũngano nĩyo ĩbangaga kũrĩa mĩcemanio ya ũtungata ĩgwĩkĩrũo na mathaa marĩa mekwagĩrĩra ahunjia mahinda-inĩ ma mũthenya na ma hwaĩ-inĩ.

⁴⁶ Kũhunjia na kĩũngano nĩ gũteithagia ahunjia marutithanie wĩra hamwe na makagĩa na mweke wa ‘gwĩkĩrana ngoro.’ (Rom. 1:12) Ahunjia arĩa erũ nĩ marĩgĩaga na mweke wa kũhunjia na arĩa marĩ na ũmenyeru, na njĩra ĩyo magathiĩ na mbere kũmenyerio. Kũndũ kũmwe, no ũkorũo ũrĩ ũndũ mwega ahunjia erĩ kana makĩria kũhunjia hamwe nĩ ũndũ wa ũgitĩri. O na angĩkorũo ũbangĩte kũhunjia ũrĩ wiki, gũcemania hamwe na gĩkundi nĩ gwĩkĩraga andũ othe ngoro. Kũmenya atĩ ndũrĩ wiki tondũ kũrĩ na angĩ marahunjia gĩcigo-inĩ o kĩu, no gũkũhe ũmĩrĩru. Mapainia na ahunjia arĩa angĩ matiagĩrĩirũo kuona ta arĩ o mũhaka makorũo mĩcemanio-inĩ yothe ya ũtungata ĩrĩa ĩbangĩtwo nĩ kĩũngano, makĩria angĩkorũo ĩkagwo o mũthenya. Ĩndĩ no kũhoteke manyitanĩre mĩcemanio-inĩ ĩmwe ya ũtungata o kiumia.

⁴⁷ Rekei ithuothe tũrũmagĩrĩre kĩonereria kĩa Jesu na atũmwo ake. Nĩ tũrĩkoragwo na ma atĩ Jehova nĩ arĩrathimaga kĩyo gitũ rĩrĩa twerutanĩria kũnyitanĩra biũ wĩra-inĩ ũyũ wa bata wa kũhunjia ũhoro mwega wa Ũthamaki.​—Luk. 9:57-62.