Kũnyitanĩra Kũhunjia Gĩcigo-inĩ Kĩrĩ na Andũ Maragia Thiomi Itiganĩte

Kaingĩ andũ nĩ mathikagĩrĩria ndũmĩrĩri ya Ũthamaki wega rĩrĩa marahunjĩrio na rũthiomi rwao. No kũhoteke ũndũ ũcio nĩguo watũmire hĩndĩ ya Pentekoste mwaka wa 33 Mahinda Maitũ (M.M.), Jehova abange “Ayahudi etigĩri Ngai kuuma mabũrũri mothe thĩinĩ wa thĩ” mahunjĩrio ũhoro ũrĩa mwega na rũthiomi rũrĩa ‘maatũire maiguĩte kuuma rĩrĩa maaciarirũo,’ o na gũtuĩka hihi nĩ maaragia rũthiomi rũrĩa rwaragio nĩ andũ aingĩ, ta Kĩhibirania kana Kĩngiriki. (Atũ 2:5, 8) Ũmũthĩ, thĩinĩ wa icigo iria ikoragwo na andũ maragia thiomi itiganĩte, ciũngano iria ciĩkaga mĩcemanio na thiomi ngũrani no ikorũo igaĩirũo kũhunjia gĩcigo kĩmwe. Ahunjia a ciũngano ta icio mangĩnyitanĩra atĩa gũtigĩrĩra atĩ mũndũ wothe nĩ ahunjĩrio mategũcokacokera kũrĩa kũhunjĩtio nĩguo matikarakarie ene nyũmba?

• 

  Aranĩriai (Thi 15:22): Arori a ũtungata magĩrĩirũo kwaranĩria nĩgetha maiguithanĩrie mũtaratara ũrĩa ũngĩmaagĩrĩra wa kũhunjia ũhoro ũrĩa mwega. Ciũngano iria ihunjagia na thiomi ingĩ no imũrie mũtikaingĩre mĩciĩ ĩrĩa ĩrĩ gĩcigo-inĩ kĩa rũthiomi rwao angĩkorũo gĩcigo kĩu kĩao ti kĩnene. O na kũrĩ ũguo, angĩkorũo nĩ maremagwo nĩ kũhunjia icigo ciothe kaingĩ tondũ nĩ iraihanĩrĩirie no mamũũrie mũtikarũgĩrĩre mĩciĩ o yothe ĩndĩ mũmeere rĩrĩa mũndũ ũrĩ gĩcigo-inĩ kĩao onania wendi. (od 93 kĩb. 37) Kana morie kĩũngano kĩanyu kĩmateithĩrĩrie gũcaria andũ arĩa maragia rũthiomi rwa kĩũngano kĩao na mũmahe andirethi ciao. (km 7/12 5, gathandũkũ) Ririkana atĩ rĩmwe nĩ gũkoragwo na andũ mararia thiomi itiganĩte thĩinĩ wa mũciĩ ũmwe. Mũtaratara o wothe ũngĩbangwo wa kũhunjia gĩcigo gĩothe wagĩrĩirũo gũkorũo ũkĩrũmĩrĩra mawatho megiĩ kũheana ũhoro wĩgiĩ andũ arĩa angĩ.

• 

  Nyitanĩrai (Ef 4:16): Rũmagĩrĩrai na kinyi ũtongoria o wothe mũngĩheo nĩ mũrori wa ũtungata. Hihi ũrĩ na mũrutwo wa Bibilia wendete rũthiomi rũngĩ tiga rwa kĩũngano kĩanyu? Mũrutwo ũcio no akũre kĩĩroho na ihenya angĩthaamĩra kĩũngano kana gĩkundi kĩrĩa kĩrĩ hakuhĩ kĩaragia rũthiomi rwake.

• 

  Koragwo wĩhaarĩirie (Thi 15:28; 16:1): Angĩkorũo mwene nyũmba gĩcigo-inĩ kĩanyu araria rũthiomi rũngĩ, geria ũrĩa wothe ũngĩhota kũmũhunjĩria. No ũkoragwo wĩhaarĩirie na njĩra ya gwĩciria ũhoro wĩgiĩ thiomi iria andũ maragia gĩcigo-inĩ kĩu na ũkorũo wĩkĩrĩte Bibilia na video cia thiomi icio thimũ-inĩ kana thĩinĩ wa tablet yaku. No ũhũthĩre programu ya JW Language kwĩruta ngeithi cia thiomi imwe.